ނިލަންދޫ ދާއިރާގެ ކުރީގެ މެމްބަރު އަދި މިހާރު ހެލްތު މިނިސްޓަރު އަބްދުﷲ ހަލީލު ފައުންޑޭޝަން (އޭކޭ ފައުންޑޭޝަން) އިން ފ. ނިލަންދޫ ސްކޫލުގައި ދެ ބުރީގެ އިމާރާތެއް އެޅުމަށް ކުރިއަށް ގެންދިޔަ މަޝްރޫއުއަށް ކުވައިތު ފަންޑުން ދިން ފައިސާ އޭނާގެ އަމިއްލަ އެކައުންޓަށް ޖަމާކުރި މައްސަލަ އެންޓި ކޮރަޕްޝަން ކޮމިޝަން (އޭސީސީ) އަށް ހުށަހަޅައިފި އެވެ.
"އަދަދު" ނޫހަށް ކަށަވަރުވެފައިވާ ގޮތުގައި މި މައްސަލަ އޭސީސީ އަށް ހުށަހަޅާފައި ވަނީ އަމިއްލަ ފަރާތަކުންނެވެ.
އެ މައްސަލަ ހުށަހެޅި ފަރާތުން ބުނީ އެ މަޝްރޫއު ކުރިއަށް ގެންދަން ލިބުނު ފައިސާ ހަލީލުގެ އަމިއްލަ އެކައުންޓަށް ޖަމާކުރުގެ ސަބަބުން އެ ރަށުގެ ރައްޔިތުންނަށް ލިބެން އޮތް ތައުލީމީ މަރުކަޒެއްގެ ބޭނުން ނުހިފި އެ ރަށުގެ ރައްޔިތުންނަށް ލިބުނު ބޮޑު ގެއްލުމެއްކަމަށެވެ.
ހަލީލުގެ އޭކޭ ފައުންޑޭޝަނަށް ކުވެއިތުން ދިން ފައިސާއިން އަޅަން އުޅުނު އިމާރާތުގެ މަސައްކަތް ހުއްޓި އަހަރުތަކެއް ވެފައިވާއިރު، އެ ފައިސާއަށް ވީގޮތް އަދަދު ނޫހުން ވަނީ ރިޕޯޓުކޮށްފަ އެވެ. "އަދަދު" ނޫހުން އެއްކުރި މައުލޫމާތުން އެނގޭ ގޮތުން ކުވެއިތުން ދިން 200،000 ޑޮލަރުގެ ތެރެއިން 89،000 އެއްހާ ޑޮލަރު ވަނީ ހަލީލުގެ އަމިއްލަ އެކައުންޓަށް ޖަމާކޮށްފަ އެވެ.
މިކަމާ ގުޅިގެން އިއްޔެ ރައްޔިތުންގެ މަޖިލީހުގެ ޖަލްސާގައި ވެސް ހަލީލުއާ ވަނީ ސުވާލުކޮށްފަ އެވެ. ނަމަވެސް އޭނާ އެ ސުވާލަށް ޖަވާބު ދެއްވަން ވަނީ އިންކާރުކުރައްވައިފަ އެވެ. ހަލީލު ވިދާޅުވީ ހަގީގަތް ހޯދަން ބޭނުން ނަމަ މަޖިލީހުން އިންކުއަރީއެއް ހަދަންވީ ކަމަށެވެ.
"ކުވައިތު ފަންޑުން އަޅުގަނޑުގެ އެކައުންޓަށް ޖަމާވެފަ ހުރިއްޔާ އަޅުގަނޑު އެދެން އިއްޒަތްތެރި މެންބަރު ރައްޔިތުންގެ މަޖިލީހުގެ ކަމާބެހޭ ކޮމިޓީއަށް ހުށަހަޅުއްވައިގެން ރަނގަޅު އިންކުއަރީއެއްވެސް ހައްދަވަން، އޭރުން އޭގެ ހަގީގަތްތައްވެސް އިނގިވަޑައިގަންނަވާނެ" ޖަވާބުގައި ހަލީލު ވިދާޅުވި އެވެ.
ހަލީލުގެ ފައުންޑޭޝަނުން ހަދަން ފެށި އިމާރާތަށް ހަ އަހަރުވެ، ފަންޑު ހުސްވިއިރު، ފެންނާ ހުރީ އެ އިމާރާތުގެ ދަގަނޑު ސްޓްރަކްޗާ އެކަންޏެވެ.
