ސަރުކާރުގެ އިސްވެރިންނާއި އެހެނިހެން ބޭފުޅުން ޑިފެންސަށް ފައިބައި އިދިކޮޅު މައި ޕާޓީ, މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އަށް ރައްދު ދޭން ފެށީ ރައީސް ޑރ. މުހައްމަދު މުއިއްޒު އަންގަވައިގެން ކަމަށް ކުރީގެ ރައީސް އިބްރާހިމް މުހައްމަދު ސޯލިހު ތުހުމަތު ކުރައްވައިފި އެވެ.
ކުރިއަށް އޮތް ރައްޔިތުންގެ މަޖިލިސް އިންތިހާބުގެ ކެމްޕޭނަށް މ. ރަތްމަންދޫއަށް ވަޑައިގެން އެރަށުގައި ހުންނަވައި ވީޑިއޯ މެދުވެރިކޮށް އެމްޑީޕީގެ ރައީސް، އަބްދުﷲ ޝާހިދު ދެއްކެވި ވާހަކައާ ގުޅިގެން ސަރުކާރުގެ މިނިސްޓަރުންނާއި ރައީސުލްޖުމްހޫރިއްޔާ ހިމެނޭހެން މުޅި ސަރުކާރު ގެންދަނީ ސަރުކާރުގެ ދިފާއުގައި ވާހަކަ ދައްކަވަމުންނެވެ.
ރޭ ބޭއްވި އެމްޑީޕީގެ ކެމްޕޭން ހަރަކާތެއްގައި އެ ޕާޓީގެ އެޑްވައިޒަރުކަން ވެސް ކުރައްވާ ސޯލިހު ވަނީ ސަރުކާރުގެ އަމަލުތަކަށް ފާޑުވިދާޅުވެފަ އެވެ. ރައްދު ދިނުމަށް ވެސް ސަރުކާރުން ހަދަމުންދަނީ ދޮގު ކަމަށް ސޯލިހު ވިދާޅުވި އެވެ.
"ވިދާޅުވެފައި އޮތް ކަމަށް ވަނީ މީގެ ދެ ދުވަސް ކުރިން ގެންގޮސްފައި، ތިމަންނައަކީ ރައްޔިތުންގެ ކުރިމަތީގައި މިހާރު ދޮގު ހަދާ މީހަކަށް ވެ ނިމިއްޖޭ. ކަލޭމެން އެއްވެސް މީހަކު ތިމަންނައަކަށް އަޅައެއް ނުލިޔޭ. ތިމަންނަ އެކަނި ހެއްޔޭ މި ދޮގު ހަދަނީ," އެ ތުހުމަތު ކުރައްވަމުން ސޯލިހު ވިދާޅުވި އެވެ.
ކޮންސްޓްރަކްޝަން މިނިސްްޓަރު، އަބްދުއްﷲ މުއްތަލިބާއި ހެލްތު މިނިސްޓަރު، ޑރ. އަބްދުﷲ ހަލީލްގެ އިތުރުން ލޯކަލް ގަވަމަންޓު މިނިސްޓަރު، އާދަމް ޝަރީފްއާއި އިސްލާމިކް މިނިސްޓަރު، ޑރ. މުހައްމަދު ޝަހީމް އަލީ ސައީދުގެ އިތުރުން ހޯމް މިނިސްޓަރު، އަލީ އިހުސާން ވެސް ޝާހިދުގެ ވީޑިއޯއަށް ރައްދުދެއްވައި ޕޯސްޓު ކުރައްވާފައިވެ އެވެ.
އޭގެތެރެއިން މިނިސްޓަރު، މުއްތަލިބާއި މިނިސްޓަރު ޝަހީމްގެ އެކްސް ޕޯސްޓު، ރައީސް މުއިއްޒު ވަނީ ރީ ޕޯސްޓު ކުރައްވައިފަ އެވެ.
އެ ބޭބޭފުޅުންގެ އިތުރުން ސަރުކާރުގެ ބައެއް ކުންފުނިތަކުގެ މެނޭޖިން ޑިރެކްޓަރުންނާއި ސަސްޕެންޝަނުގައި ތިބި ޑެޕިއުޓީ މިނިސްޓަރުންގެ އިތުރުން ވެސް ސިޔާސީ އެކިއެކި މަގާމުތަކުގައި ތިއްބެވި ބޭބޭފުޅުން ޝާހިދުގެ ވީޑިއޯއަށް ރައްދުދެއްވައި ޕޯސްޓު ކުރައްވާފައިވެ އެވެ.
އޭގެތެރެއިން ބައެއް ބޭބޭފުޅުންގެ ޕޯސްޓުތަކުގައި ޒިންމާދާރު މަގާމެއްގައި ހުންނައިރު، ހިފަހައްޓަންޖެހޭ އަހުލާގީ އާންމު މިންގަނޑަށްވުރެ ދަން ފެންވަރުގެ ބަހުރުވަ ބޭނުންކޮށްފައި ވާތީ އާންމުންގެ ފާޑު ކިޔުން ވެސް އެ ބޭފުޅުންނަށް އަމާޒުވެފައިވެ އެވެ.
