މާލީ ދަތިކަމުން އަރައިގަތުމަށް ރައީސް ޑރ. މުހައްމަދު މުއިއްޒު ބޯހަރުކަން ދޫކޮށްލައި، އަވައްޓެރިންނާ ވާހަކަ ދެއްކެވުމަށް ކުރީގެ ރައީސް އިބްރާހިމް މުހައްމަދު ސޯލިހު ރޭ ގޮވާލައްވައިފި އެވެ.
ކުރިއަށް އޮތް 20 ވަނަ ރައްޔިތުންގެ މަޖިލީހުގެ އިންތިހާބުގައި މާފަންނު އަވަށުގެ ހަތަރު ދާއިރާއަށް އެމްޑީޕީން ވާދަ ކުރާ ކެންޑިޑޭޓުންނަށް ތާއިދު ހޯދުމަށް ބޭއްވި އިވެންޓުގައި ސޯލިހު ވިދާޅުވީ ދަރަނި ރީސްޓްރަކްޗާކުރުމަށް އިންޑިއާއާ ވާހަކަ ދައްކަވަން މުއިއްޒު ބޭނުންވާ ވާހަކަ މީޑިއާތަކުން ފެނިވަޑައިގެންފައިވާ ކަމަށެވެ. ނަމަވެސް، ކުރިމަތިވެގެން އުޅޭ ދަތިކަމަކީ އިންޑިއާގެ ލޯނުތަކުން ދިމާވެގެން އުޅޭ ކަމެއް ނޫން ކަމަށް އެ މަނިކުފާނު ވިދާޅުވި އެވެ.
ޗައިނާ އަށް ދައްކަންޖެހޭ ދަރަނީގެ ގޮތުގައި 18 ބިލިއަން ރުފިޔާ އޮތް ކަމަށާއި ނަަމަވެސް އިންޑިއާއަށް ދައްކަންޖެހޭ ދަރަނީގެ މިންވަރަކީ އަށް ބިލިއަން ރުފިޔާ ކަމަށާއި އެ ފައިސާ ދައްކަން ޖެހޭނީ 25 އަހަރުން ކަމަށް ސޯލިހު ވިދާޅުވި އެވެ.
"އެހެން ނަމަވެސް އަޅުގަނޑަށް ހަމަ ޔަގީން އަޅުގަނޑުމެންގެ އަވައްޓެރިން އެހީތެރިވެދޭނެ. ބޯހަރުކަން ދޫކޮށްލާފައި މީހުންނާ ވާހަކަ ދައްކަންވީ. އަޅުގަނޑުމެންނަށް އެހީވެދޭނެ ބައިވަރު މީހން އެބަތިބި. އެހެން ނަމަވެސް ގޮތް ދޫކުރައްވަން ނޫޅުއްވާ. އަދި ކިރިޔާ ވިސްނޭހެން އަޅުގަނޑަށް ހީވަނީ،" ސޯލިހު ވިދާޅުވި އެވެ.
ރާއްޖެއަށް އެހީވާން ތިބޭނީ އަވައްޓެރިންނާއި މެދުއިރުމަތީގެ އިސްލާމީ ގައުމުތައް ކަމަށާއި ނަމަވެސް މި ސަރުކާރުގެ އަމަލުތައް ހުރި ގޮތުން މެދުއިރުމަތިން ވެސް މިހާތަނަށް ލިބުނީ ހަމައެކަނި 50 ޓަނުގެ ކަދުރު ކަމަށް ސޯލިހު ސަމާސާ ރާގެއްގައި ސޯލިހު ވިދާޅުވި އެވެ.
އެމްޑީޕީ ސަރުކާރުން ފަށާފައިވާ ކަންކަން މި ސަރުކާރުގެ މަޝްރޫއުތަކުގެ ގޮތުގައި ހަދައި ދޮގު ފަތުރަމުންދާކަން ސޯލިހު ވިދާޅުވީ ބައެއް މިސާލާއެކު އެވެ. އެ ދޮގުތަކުން ސަލާމަތްވުމަށްޓަކައި މިހާރު ވަޒީރުން ނުކުމެ ދޮގު ހަދަމުން ގެންދާ ކަމަށް ވެސް އޭނާ ވިދާޅުވި އެވެ.
"ވިދާޅުވެފައި އޮތް ކަމަށް ވަނީ މީގެ ދެ ދުވަސް ކުރިން ގެންގޮސްފައި ، ތިމަންނައަކީ ރައްޔިތުންގެ ކުރިމަތީގައި މިހާރު ދޮގު ހަދާ މީހަކަށް ވެ ނިމިއްޖޭ. ކަލޭމެން އެއްވެސް މީހަކު ތިމަންނައަކަށް އަޅައެއް ނުލިޔޭ،" ސޯލހު ވިދާޅުވި އެވެ.
ރިޔާސީ އިންތިހާބުގެ ކެމްޕޭނުގައި އަދި އެއަށް ފަހު ވެސް މުއިއްޒު ގެންދަވަނީ އިންޑިއާ ނިސްބަތްކޮށް ބަދު ބަސް ވިދާޅުވަމުންނެވެ. މި ސަރުކާރާއި އިންޑިއާ ގުޅުން ގޯސްވެފައި ވާއިރު، ވެރިކަމަށް ހަތަރު މަސް ވެގެން ދިޔައިރު ވެސް މުއިއްޒު އިންޑިއާ އަށް ވަޑައިނުގަންނަވަ އެވެ. މީގެ ކުރީގެ ރައީސުން ބޭރަށް ކުރައްވާ ފުރަތަމަ ދަތުރަކަށް ވާނީ އިންޑިއާގެ ދަތުރެވެ.
