ސްޓެލްކޯގެ ސަބްސްޓޭޝަންތައް ފަޅާ އެ ތަންތަނުގައި ހުންނަ ޓްރާންސްފޯމަރުތަކުން ވައްކަންކުރާ މައްސަލަ ބޮޑުވެފައިވާ ކަމަށް އެ ކުންފުނިން ބުނެފި އެވެ.
އެ ކުންފުނިން މި މައުލޫމާތު މީޑިއާތަކަށް ދީފައިވާއިރު، ސްޓެލްކޯގެ މެނޭޖިން ޑިރެކްޓަރު ހުސެއިން ފަހުމީ ވަނީ އެ ކަމުގެ ކަންބޮޑުވުން ސޯޝަލް މީޑިއާގައިވެސް ފާޅުކުރައްވާފަ އެވެ.
އެގޮތުން ފަހުމީ އެކްސްގައި ކުރެއްވި ޕޯސްޓެއްގައި ވިދާޅުވީ، ރޭ ފަތިހު އަދި މިރޭ ހުޅުމާލޭގެ އެކި ސަރަހައްދުތަކުން ކަރަންޓު ކެނޑެން މެދުވެރިވީ މި ދެންނެވި ގޮތަށް ޓްރާންސްފޯމަރުތަކުން ވައްކަން ކުރުމާއި ގުޅިގެން ކަމަށެވެ.
ރޭ ފަތިހު އަދި މިއަދު ހަވީރު ހުޅުމާލޭގެ އެކި ހިސާބުތަކުން ކަރަންޓު ކެނޑުނުއިރު، ހިޔާ ފުލެޓުތަކުން ކަރަންޓު ކެނޑި ލިފުޓުތަކުގައި ބައެއް މީހުން ގިނަ އިރުތަކެއް ވަންދެން ތާށިވިކަމަށްވެސް މައުލޫމާތު ލިބިފައިވެ އެވެ.
އަދި ވައްކަން ކުރާ މީހުން ސަބްސްޓޭޝަންތަކުގެ ތަޅުތައް ހަލާކޮށް، އެތަންތަނަށް ވަދެ ޓްރާންސްފޯމަރުތައް ނިއްވާލައި، އެ ޓްރާންސްފޯމަރުތަކުގެ އެކި ބައިތައް ވަގަށް ނަގާފައިވާ ކަމަށް އޭނާ ބުނެފައިވެ އެވެ.
"މިއީ މިކަން ކުރާ ފަރާތްތަކަށްވެސް ބޮޑު ނުރައްކަލަކަށް ވާއިރު، މިއީ ކަރަންޓުގެ އަސާސީ ޚިދުމަތް 24 ގަޑިއިރު މެދުނުކެނޑި ދޭން މި ކުންފުނިން ކުރަމުންގެންދާ މަސައްކަތަށްވެސް އެޅޭ ހުރަހެއް،" ފަހުމީ ބުނެފައިވެ އެވެ.
ސްޓެލްކޯގެ ކަންބޮޑުވުމާއެކު ފަހުމީ ވަނީ މިފަދަ މައްސަލަތައް ސީރިއަސްކޮށް ބަލާ މިފަދަ ކަންކަން ކުރަމުންގެންދާ މީހުން ހުއްޓުވައި އެ މީހުންނާއި ވަގަށް ނަގައިގެން ވިއްކާ ތަކެތި ގަންނަ މީހުންނަށްވެސް ފިޔަވަޅު އެޅުމަށް ގޮވާލާފަ އެވެ.
