ސަރުކާރުން ރާއްޖޭގައި އީ-ވޮލެޓުގެ ހިދުމަތް ތައާރަފު ކުރުމަށް މަސައްކަތް ކުރަމުންދާ ކަމަށާއި އެންމެ ލަސްވެގެން މެއި މަހު އެ މަސައްކަތް ނިމޭނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ރައީސް މިހެން ވިދާޅުވެފައިވަނީ ސަރުކާރުން މީގެ ކުރިން މި ކަމުގައި ދައްކާފައިވާ ވާހަކަތަކުގެ އަދާހަމައެއް ހޯދުމަށް، އާންމުންގެ މީހަކު "ރައީސްގެ ޖަވާބު" ޕްރޮގްރާމުގެ މެދުވެރިކޮށް އެހި ސުވާލަކަށް ޖަވާބުދެއްވަމުންނެވެ.
"އެކަމުގެ މަސައްކަތްތައް ވަރަށް ބާރަށް އެބަ ހިނގާ، އަޅުގަނޑުމެން މި އުއްމީދުކުރަނީ މެއި މަހުގެ ތެރޭގަ އެންމެ ލަސްވެގެން އީވޮލެޓުގެ ތައާރަފުކުރެވުން،" ޖަވާބު ދެއްވަމުން ރައީސް ވިދާޅުވި އެވެ.
ރާއްޖެއަށް އޮންލައިން ޕޭމަންޓު ސިސްޓަމްތައް ގެނެސް އެ ސިސްޓަމްތައް މެދުވެރިކޮށް ފައިސާ ނެގޭނެ ގޮތް ހެދުމަކީ ރައީސް މުއިއްޒުގެ ރިޔާސީ ވައުދެކެވެ. އެގޮތުން ރިޔާސީ ކެމްޕޭނުގައި އޮގަސްޓު 21، 2023 ގައި އައްޑޫ ސިޓީ ހިތަދޫގައި ހުންނަވާ ރައީސް ވަނީ އެމަނިކުފާނުގެ ވެރިކަމުގައި އިންޓަނެޓް ވިޔަފާރިއަށް ފަސޭހަކޮށްދ،ީ ފުޅާކޮށް އެކަން ކުރެވޭނެ މަގު ފަހިކުރުމަށްޓަކައި ގާނޫނީ ގޮތުން ގެންނަންޖެހޭ ކުރިއެރުންތަކާ ބަދަލުތައް ގެންނާނެ ކަމަށް ވެސް ވިދާޅުވެފަ އެވެ.
"އޮންލައިން ޕޭމަންޓް ސިސްޓަމްތަކުގެ ތެރޭގައި ހިމެނޭ ޕޭޕަލ،ް ޕޭއޮނިއ،ާ ސްޓްރައިޕް، ސްކްރިލް، ނެޓެލް، މިފަދަ އޮންލައިން ޕޭމަންޓް ސިސްޓަމްތައް ރާއްޖޭގައި ވިޔަފާރިކުރާ ފަރާތްތަކަށް ބޭނުންކުރެވޭގޮތަށް އިރާދަކުރެއްވިއްޔާ ކަންކަން ބައްޓަންކޮށްދޭނަން،" އެ ދުވަހު ރައީސް ވިދާޅުވި އެވެ.
ރާއްޖޭން މިހާރު ޕޭޕަލް މެދުވެރިކޮށް ކުރެވޭ ކަމަކީ ފައިސާ ފޮނުވުމެވެ. ނަމަވެސް ޕޭޕަލް މެދުވެރިކޮށް ފައިސާ ނެގުމުގެ ފުރުސަތެއް ނޯވެ އެވެ.
މިކަމާ ގުޅޭގޮތުން އެމެރިކާގެ ސަރުކާއެކު މަޝްވަރާތަކެއް ކުރަން ތައްޔާރުވަމުންދާ ކަމަށް ޖެނުއަރީ 7، 2024 ގައި ރައީސް އޮފީހުން ބުނެފައިވެ އެވެ. ނަމަވެސް އޭގެ ފަހުން އެކަމުގެ ތަފުސީލެއް ސަރުކާރުން ދީފައެއް ނުވެ އެވެ.
ވިޔަފާރީގެ މަޝްވަރާތަކަކަށް ރާއްޖޭގެ ސަރުކާރެއްގެ ވަފުދެއް މި އަހަރުގެ ޖުލައިގައި އެމެރިކާގެ ވެރިރަށް ވޮޝިންޓަނަށް ދިއުމަށް ހަމަޖެހިފައިވާ ކަމަށް ވެސް އިކޮނޮމިކް މިނިސްޓަރު އަހުމަދު ސައީދު ވަނީ ވިދާޅުވެފަ އެވެ. ކުރިން ބެލެވުނު ގޮތުގައި ޕޭޕަލްގެ މަޝްވަރާތައް ކުރާނީ އެ ދަތުރުގަ އެވެ.
