ދިވެހިންގެ އިންފާރު ބަލަހައްޓާނީ ދިވެހިން ކަމަށާއި އެކަމަ ބަޔަކު ކަންބޮޑުވާން ނުޖެހޭ ކަމަށް ރައީސް ޑރ. މުހައްމަދު މުއިއްޒު މިރޭ ވިދާޅުވެއްޖެ އެވެ.
އެމްއެންޑީއެފް އެއާ ކޯ އިފްތިތާހު ކުރުމަށް ނ. މާފަރުގައި ބޭއްވި ރަސްމިއްޔާތުގައި ރައީސް މުއިއްޒު ވިދާޅުވީ، ރާއްޖޭގެ ސަރަހައްދު ނުވަތަ ދިވެހި އިންފާރު ބެލެހެއްޓުމަކީ ދިވެހި ރައްޔިތުންގެ ހައްގެއް ކަމަށެވެ.
ރާއްޖެއަކީ މިނިވަން މުސްތަގިއްލު ގައުމެއްކަން ފާހަގަކުރައްވާ ރައީސް މުއިއްޒު ވިދާޅުވީ ރާއްޖޭގެ ސަރަހައްދު ދިވެހިން ބަލެހެއްޓައިގެން އެހެން ބަޔަކު ކަންބޮޑުވާނަމަ، އެއީ ދިވެހިން މާ ބޮޑަށް ކަންބޮޑުވާން ޖެހޭ ކަމެއް ކަމަށެވެ.
"މި ބޮޑު ސަރަހައްދަކީ އަޅުގަނޑުމެންގެ ދަރިންނާއި ދަރިންގެ ދަރިންގެ މިހާރާއި މުސްތަގުބަލު އުޖާލާ ކުރުމަށްޓަކައި ލިބިފައިވާ ބޮޑު ނިއުމަތެއް. މި ބޮޑު ސަރަހައްދު ބެލެހެއްޓުމަކީ އަމިއްލައަށް ކުރާ ކަމަކަށްވާންޖެހޭ" ރައީސް މުއިއްޒު ވިދާޅުވި އެވެ.
އެމަނިކުފާނުގެ ވާހަކައިގައި އަމިއްލަ ބާރުވެރިކަން ގާއިމުކުރުމަކީ ދިވެހިންނަށް ކުރެވިދާނެ ކަމެއްކަން ދިވެހިން ގަބޫލުކުރާ ކަމަށް ވިދާޅުވެ، އެކަމަށް ޓަކައި ދިވެހި އަސްކަރިއްޔާއިން ކުރާ މަސައްކަތަށް ރައީސް މުއިއްޒު ވަނީ ޝުކުރު އަދާ ކުރައްވާފަ އެވެ.
ރައީސް މުއިއްޒު ވިދާޅުވީ ގައުމުގެ މިނިވަންކަން ދިފާއުކުރުމަކީ އަދި ގައުމުގެ އަމިއްލަވަންތަކަން ހިމާޔަތް ކުރުމަކީ ދިވެހިންނަށް ލިބިފައިވާ ހައްގެއްކަން ދިވެހިން ގަބޫލުކުރާ ކުރުމަކީ އެމަނިކުފާނަށް ލިބޭ އެންމެ ބޮޑު ހިތްހަމަޖެހުން ކަމަށާއި، އެއީ ކޮންމެ ދިވެއްސަކު ވެސް ގަބޫލުކުރަން ޖެހޭ ކަމެއް ކަމަށެވެ.
"އަޅުގަނޑުމެން ކޮންމެ މީހަކު އަޅުގަނޑުމެންގެ ފިކުރުގައި ކޮންމެކަހަލަ ތަފާތު ކަމެއް ހުރި ނަމަވެސް، އިސްކުރަންވީ ދިވެހި ފިކުރާއި ދިވެހި ވަންތަކަންކަން ގަބޫލުކުރުމަކީ މިއަދު އެންމެން ގަބޫލުކުރަންވީ ހަގީގަތް" ރައީސް މުއިއްޒު ވިދާޅުވި އެވެ.
މީގެ އިތުރުން ރާއްޖެއަކީ ވަރަށް ކުޑަ ގައުމެއް ގޮތުގައި ދިވެހިން އަމިއްލައަށް ގަބޫލުކުރަމުން އައި ކުރުމަކީ ރަނގަޅު ގޮތެއް ނޫންކަން ގަބޫލު ކުރަން ޖެހޭ ކަމަށާއި، މިއީ ވަރަށް ބޮޑު ގައުމެއް ކަމަށް ވެސް ރައީސް މުއިއްޒު ވިދާޅުވި އެވެ.
ރަައީސް މުއިއްޒު ވިދާޅުވީ ރާއްޖެއަކީ ނުވަ ލައްކަ އަކަ ކިލޯ މީޓަރަށްވުރެ ބޮޑު ކަނޑުގެ އެކްސްކްލޫސިވް އިކޮނޮމިކް ޒޯނެއް ހިމެނޭ ބޮޑު ގައުމެއް ކަމަށާއި، އެ ބޮޑު ސަރަހައްދު މިވީހާ ދުވަހު އަމިއްލަ ބާރުވެރިކަމެއް ނެތިގެން ނުބެލެހެއްޓި އޮތުމަކީ މިހާރު ކަންބޮޑުވާން ޖެހޭ ކަމެއް ނޫން ކަމަށެވެ.
