ރޯދަ މަސް ފެށުމާއެކު މި އަހަރުގެ ފިތުރު ޒަކާތް ބަލައިގަންނަން ފަށައިފި އެވެ.
އިސްލާމިކް މިނިސްޓްރީގެ ޒަކާތު ހައުސް އިން ވަނީ ޒަކާތް ދެއްކޭނެ ގޮތްތަކާއި ދައްކަންޖެހޭ އަދަދުތައް ވެސް އާންމުކޮށްފަ އެވެ. ފިތުރު ޒަކާތް ބަލައިގަންނަނީ ކަނޑައަޅާފައިވާ ގޮވާމުގެ ބާވަތްތަކުގެ 2.4 ކިލޯއަށްވާ ފައިސާއިންނެވެ.
ފިތުރު ޒަކާތުގެ ގޮތުގައި ދައްކަން ޖެހޭ ފައިސާގެ އަދަދު:
- އާދައިގެ ހަނޑޫ: 12 ރުފިޔާ
- ތައިލެންޑް ހުދު ހަނޑޫ: 70 ރުފިޔާ
- ރަތް ހަނޑޫ: 80 ރުފިޔާ
- އާދައިގެ ބާސްމަތީ ހަނޑޫ: 70 ރުފިޔާ
- މޮޅު ބާސްމަތީ ހަނޑޫ: 100 ރުފިޔާ
- އެންމެ މޮޅު ބާސްމަތީ ހަނޑޫ: 125 ރުފިޔާ
- އާދައިގެ ފުށް: 10 ރުފިޔާ
- އާޓާ ފުށް: 75 ރުފިޔާ
ކުރީ އަހަރުތަކެކޭ އެއްފަދައިން މިއަހަރު ވެސް ހަ މަންސައަކުން ޒަކާތް ދެއްކޭނެ އެވެ.
އޭގެ ތެރޭގައި އުރީދު އާއި ދިރާގު އަދި މޯލްޑިވްްސް އިސްލާމިކް ބޭންކް އަދި ފަހިޕޭ ހިމެނޭއިރު، ބޭންކް އޮފް މޯލްޑިވްސް އާއި ފިނޭންސް މިނިސްޓްރީގެ ބަނޑޭރި ޕޯޓަލުން ވެސް ޒަކާތް ދެއްކޭނެ އެވެ.
އޭގެ އިތުރުން، އުމުރުން ދުވަސްވީ މީހުންނާއި އޮންލައިންކޮށް ޒަކާތް ދެއްކުމަށް އަހުލުވެރި ނޫން ފަރާތްތަކަށް ހާއްސަކޮށްގެން، މިއަދުން ފެށިގެން އިސްލާމިކް މިނިސްޓްރީގެ ހޯލުގައި ޒަކާތް ބަލައިގަންނާނެ އިންތިޒާމުތައް ވެސް ހަމަޖައްސާފައިވާ ކަމަށް ޒަކާތު ހައުސްއިން ބުނެ އެވެ. އެ އިދާރާއިން ބުނީ ޒަކާތް ބަލައިގަންނާނީ މިމަހު 28އާ ހަމައަށް ރަސްމީ ކޮންމެ ދުވަހަކު ހެނދުނު 9:30 އިން 13:00 އަށް ކަމަށެވެ.
އަދި ރޯދަ މަހު ފަހު 10 އެއް ކަމަށްވާ މާޗް, 31 އިން އޭޕްރީލް, 9ގެ ނިޔަލަށް ހުކުރު އަދި ހޮނިހިރު ދުވަސް ފިޔަވައި ކޮންމެ ދުވަހަކު ހެނދުނު 11:00 އިން 14:00 އަށް ވެސް މިނިސްޓްރީގެ ކައުންޓަރުން ޒަކާތް ބަލައިގަންނާނެ އެވެ. މިގޮތަށް ހަމަޖެއްސީ, ރޯދަ މަހު ފަހު 10 އަކީ ސަރުކާރު ބަންދު ދުވަސްތަކެއްގެ ގޮތުގައި ރައީސް ހަމަޖައްސަވާފައި ވާތީ އެވެ.
ރޯދަ މަހުގެ ފުރަތަމަ ދުވަހުން ފެށިގެން އެންމެ ފަހު ދުވަހާ ހަމައަށް ޒަކާތް ބަލައިގަންނާނެ އެވެ. ރަށްރަށުގައި ޒަކާތް ބަލައިގަންނާނީ އެ ރަށެއްގެ ކައުންސިލުންނެވެ. ނަމަވެސް އޮންލައިންކޮށް ޒަކާތް ދެއްކޭނީ އޭޕްރީލް, 6ގެ ނިޔަލަށެވެ. އެއީ ރޯދަ މަހުގެ 27 ވަނަ ދުވަހެވެ.
