މި އަހަރު އެންމެ ހޫނު ގަދަ ވާނެ ކަމަށް ލަފާ ކުރެވޭ ދުވަސްވަރަކީ މި ހިނގާ ރޯދަ މަސް ދިމާވާ މާޗު އަދި އޭޕްރީލް ކަމަށް، މޫސުމާ ބެހޭ ގައުމީ އިދާރާއިން ބުނެފައިވަނިކޮށް މިއަދު މާލެ ސަރަހައްދުގެ އިހުސާސް ކުރެވޭ ހޫނުމިން 41 ޑިގްރީ ސެލްސިއަސްއަށް އަރައިފި އެވެ.
މެޓް އޮފީހުން ހާމަކޮށްފައިވާ ގޮތުން މިއަދުގެ 11:00 ގައި މާލޭގެ ހޫނުމިން ހުރީ 32.1 ޑިގްރީ ސެލްސިއަސް ގަ އެވެ. ނަމަވެސް އިހުސާސް ކުރެވޭ ހޫނުމިން ހުރީ 41.1 ޑިގްރީ ސެލްސިއަސް ގައި ކަމަށްވެސް މެޓުން ބުންޏެވެ.
ރާއްޖޭގެ ހޫނުމިން
- ހަނިމާދޫ : 33 ޑިގްރީ ސެލްސިއަސް (އިހުސާސް ކުރެވޭ ހޫނުމިން 42.2 ޑިގްރީ ސެލްސިއަސް)
- ހުޅުލެ : 32.1 ޑިގްރީ ސެލްސިއަސް (އިހުސާސް ކުރެވޭ ހޫނުމިން 41.1 ޑިގްރީ ސެލްސިއަސް)
- ކައްދޫ : 30.8 ޑިގްރީ ސެލްސިއަސް (އިހުސާސް ކުރެވޭ ހޫނުމިން 38.9 ޑިގްރީ ސެލްސިއަސް)
- ކާޑެއްދޫ : 30.6 ޑިގްރީ ސެލްސިއަސް (އިހުސާސް ކުރެވޭ ހޫނުމިން 37.1 ޑިގްރީ ސެލްސިއަސް)
- ގަން : 30.6 ޑިގްރީ ސެލްސިއަސް (އިހުސާސް ކުރެވޭ ހޫނުމިން 35.7 ޑިގްރީ ސެލްސިއަސް)
މެޓް އޮފީހުގެ އާންމު ވައިބާ ގްރޫޕާއި ސޯޝަލް މީޑިއާ އެކައުންޓްތައް މެދުވެރިކޮށް، ކޮންމެ ދުވަހެއްގެ ހެނދުނު 11:00 އިން މެންދުރުފަހު 2:00 އަށް އަދި ހަވީރު 5:00 ޖަހާއިރު ހުންނަ ވައިގެ ފިނިހޫނުމިނާއި އިހުސާސްކުރެވޭ ފިނިހޫނުމިން އާންމު ކުރެ އެވެ.
ބެލެވޭ ގޮތުގައި މި ނަމްބަރުތައް މިއަދު 2:00 ގައި އިތުރަށް މައްޗަށް ދާނެ އެވެ.
މި އަހަރަކީ ވެސް ކަނޑުގެ ލޮނުގަނޑު އުފުލޭ ނިސްބަތް، އާންމު ވަރަށް ވުރެ މަތި ކަމަށް ބެލިފައިވާ "އެލްނިނޯ" އަހަރަކަށް ވާތީވެ، ހޫނުމިން އިތުރަށް މަތިވުމުގެ ފުރުސަތު އެބަ އޮތް ކަންވެސް މެޓް އޮފީހުން ފާހަގަކޮށްފައިވެ އެވެ. އެއީ ދުނިޔޭގެ މޫސުމާ ބެހޭ އިދާރާއިން ވެސް އަންދާޒާކޮށްފައިވާ ކަމެކެވެ.
