ރާއްޖޭގެ ރަށްރަށުގެ ތަރައްގީއަށް ކުރިއަށް ގެންދާ ހުރިހާ މަޝްރޫއެއް ރައީސް ޑރ. މުހައްމަދު މުއިއްޒުގެ ސަރުކާރުން ހުއްޓާލައިފައިވާ ކަމަށް ކުރީގެ ރައީސް އިބްރާހިމް މުހައްމަދު ސޯލިހު މިއަދު މިދާޅުވެއްޖެ އެވެ.
އެމްޑީޕީއިން ށ. އަތޮޅަށް ކުރާ ކެމްޕޭނު ދަތުރުގައި އެ އަތޮޅު މާއުނގޫދޫ ކެމްޕެއިނު ޖަލްސާގައި ވާހަކަ ދައްކަވަމުން ސޯލިހު ވިދާޅުވީ އެމަނިކުފާނުގެ ސަރުކާރުން މާއުނގޫދޫ އާއި ށ. އަތޮޅުގެ ތަރައްގީއަށް ގިނަ މަސައްކަތްތަކެއް ފެށި ކަމަށެވެ.
އެގޮތުން އެރަށު ރައްޔިތުން އެދުނު ގޮތަށް ބަނދަރު ބޮޑުކޮށް މަލްޓި ޕާޕަސް ހޯލު އަދި ގޮނޑުދޮށް ހިމާޔަތްކުރުން އަދި ފެނާ ނަރުދަމާގެ މަޝްރޫއުގެ މަސައްކަތް ސޯލިހު ފާހަގަކުރެއްވި އެވެ.
ސޯލިހު ވިދާޅުވީ އެމަނިކުފާނުގެ ސަރުކާރުން ރާއްޖޭގެ އެކި ކަންކޮޅުތަކުގައި ފެށި ހުރިހާ މަޝްރޫއެއްހެން ރައީސް މުއިއްޒުގެ ސަރުކާރުން ވަނީ ހުއްޓާލައިފަ އެވެ.
ސަރުކާރުން ފަށާފައި އޮތް އެއްވެސް މަޝްރޫއެއް ހުއްޓާނުލާނެ ކަމަށް އަދި ހަދާފައިވާ އެއްބަސްވުންތަކަށް ވެރިކަމުގައި ކަމޭހިތާނެ ކަމަށް ރިޔާސީ އިންތިހާބު ތެރޭގައި ރައީސް މުއިއްޒު ވައުދުވުމަށްފަހު، ދިމާ އިދިކޮޅަށް އަމަލުކުރައްވަމުންދާ ކަމަށް ސޯލިހު ވިދާޅުވި އެވެ.
ދައުލަތުގެ ބަޖެޓަށް ދަތި ވަނީ ހަމައެކަނި ރަށްރަށުގެ މަޝްރޫއުތައް ހިންގަންކަން ފާހަގަކުރައްވާ ސޯލިހު ވިދާޅުވީ ސިޔާސީ ވަޒީފާ ރެކޯޑު އަދަދަކަށް މި ސަރުކާރުން އިތުރުކުރަމުންދާ ކަމަށެވެ.
މީގެ އިތުރުން ބައެއް ކައުންސިލުތަކުން މަޝްރޫއުތައް ހުއްޓުމަކަށް ގެނެސްފައި އޮތީ ކީއްވެތޯ ސުވާލު ކުރުމުން ބަޖެޓުގެ ދަތިކަން ހުރި ކަމަށް ރައީސް މުއިއްޒު ވިދާޅުވާތީ އެކަމަށް ސޯލިހު ވަނީ ފާޑު ވިދާޅުވެފަ އެވެ.
މި ސަރުކާރަށް 100 ދުވަސްވެ، މި ހިސާބަށް އައި އިރު ރައީސް މުއިއްޒު ހަމައެކަނި އިފްތިތާހުކޮށްދެއްވީ ރަސްމާލެ ބިންހިއްކުމުގެ މަޝްރޫއު އެކަނި ކަމަށާއި ނަމަވެސް އެ މަޝްރޫއު ވެސް ވަނީ މިހާރު ހުއްޓިފައި ކަމަށް ސޯލިހު ވިދާޅުވި އެވެ.
