ކްރިމިނަލް ކޯޓު ހިންގުން ހުޅުމާލޭ ކޮވިޑް ފެސިލިޓީ ހިންގި އިމާރާތަށް ބަދަލުކުރަން އިތުރު ފަސް މަސް ދުވަސް ހޭދަވާނެ ކަމަށް ޑިޕާޓްމެންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އިން ބުނެފި އެވެ.
ކްރިމިނަލް ކޯޓު ކުރިން ހިންގަމުން ދިޔައީ ޖަސްޓިސް ބިލްޑިންގަ އެވެ. އެސްޓީއޯ ކުރީގެ އިމާރާތަށް އެ ކޯޓު ބަދަލުކުރީ 2016 ވަނަ އަހަރު އެވެ. އަދި އެ އިމާރާތް ބާވެ ހަލާކުވުމުގެ ސަބަބުން އެތަނުގައި ކްރިމިނަލް ކޯޓު ހިންގުން ހުއްޓައިލައި، ކޮވިޑު ފެސިލިޓީއަށް ބަދަލުކުރަން ނިންމީ ފެބްރުއަރީ، 2023 ގަ އެވެ.
މި ނޫހަށް މައުލޫމާތުދެއްވަމުން ޑީޖޭއޭގެ މީޑިއާ އޮފިޝަލަކު މިއަދު ބުނީ، ކޮވިޑި ފެސިލިޓީ ތައްޔާރުކޮށް އެތަނުގައި ކްރިމިނަލް ކޯޓު ހިންގަން އަދި އެހާ އަވަހަށް ނުފެށޭނެ ކަމަށެވެ. އަދި އެ މަސައްކަތްތައް ގާތްގަނޑަކަށް ފަސް މަސް ހޭދަވާނެ ކަމަށް މީޑިއާ އޮފިޝަލު މައުލޫމާތުދިނެވެ.
"ރޯދައަކަށް ނުނިމޭނެ ކޮވިޑް ފެސިލިޓީއަށް ޗޭންޖް ކުރުން. އިތުރު ފަސް މަސް ވަރު ނަގާނެ،" މީޑިއާ އޮފިޝަލު ބުންޏެވެ.
ކްރިމިނަލް ކޯޓުގެ އިމާރާތުން މިހާރު ބޭނުން ކުރަނީ އެއް ބައި ކަމަށްވާތީ ގިނަ މީހުން ހާޒިރުކޮށްގެން ބާއްވަންޖެހޭ ޝަރީއަތްތަކެއް ނުބޭއްވެ އެވެ. އަދި ގިނަ ޝަރީއަތްތައް ކުރިއަށް ގެންދަނީ އޮންލައިންކޮށެވެ.
