ރައްޔިތުންގެ މަޖިލީހުގެ ހުރާ ދާއިރާއަށް އަމިއްލަ ގޮތުން ވާދަކުރައްވާ ކެންޑިޑޭޓު އަނާރާ ނައީމުގެ ކެމްޕެއިނުގައި ބައިވެރިވެވަޑައިގަތީ ރައީސް ޑރ. މުހައްމަދު މުއިއްޒު ވިދާޅުވެގެން ކަމަށް ސްޕޯޓްސް މިނިސްޓަރު އަބްދުﷲ ރާފިއު މިއަދު ވިދާޅުވެއްޖެ އެވެ.
މިނިސްޓަރު ރާފިއު "އަދަދު" އަށް ވިދާޅުވީ ސަރުކާރުގެ ކެންޑިޑޭޓަކީ މިހާރު އަނާރާ ކަމަށާއި ކެމްޕޭނުގައި ބައިވެރިވީ ރައީސް މުއިއްޒުގެ އެންގެވުމަށް ކަމަށެވެ.
ޕްރޮގްރެސިވް ކޮންގްރެސް ކޯލިޝަން (ޕީއެންސީ) ގެ ފަރާތުން މަޖިލީހަށް ވާދަކުރާނެ ކެންޑިޑޭޓުން ހޮވުމަށް ބޭއްވި ޕްރައިމަރީގައި ނާކާމިޔާބުވުމުން، ހުރާ ދާއިރާ އަށް އަނާރާ ވާދަކުރައްވަނީ އަމިއްލަ ގޮތުންނެވެ.
އެކަމާ ގުޅޭ ގޮތުން މި ނޫހާ ވާހަކަ ދައްކަވަމުން އާނާރާ ވިދާޅުވީ މި ސަރުކާރު ގެންނަން އޭނާ ވަރަށް މަސައްކަތް ކުރިން ކަމަށާއި، ސަރުކާރުގެ ބޭފުޅުން ކެމްޕޭނުގައި ބައިވެރިވަނީ އެބޭފުޅުންގެ އިތުބާރު އޭނާއަށް އޮންނާތީ ކަމަށެވެ.
"ސަރުކާރުގެ އިތުބާރު އަޅުގަނޑަށް އެބަ އޮތް. އެ އިތުބާރާއި ޔަގީންކަން އޮންނަ ބަޔަކު މަޖިލީހަށް ގެންނަން ބޭނުންވެސް ވާނެ. ރައީސް މުއިއްޒުގެ އިތުބާރު އޮވެގެން ސަރުކާރުގެ ބޭފުޅުން ކެމްޕޭނުގައި ބައިވެރިވަނީ،" އަނާރާ ވިދާޅުވި އެވެ.
ޕީއެންސީގެ ޕްރައިމަރީ ކާމިޔާބުކުރި ގިނަ ކެންޑިޑޭޓުންނަށް އޮތް ތާއީދު އަނބުރާ ގެނެސް، ރައީސް މުއިއްޒުގެ އަދި ސަރުކާރުގެ އިސް ބޭފުޅުން އަންނަނީ ޕީއެންސީ ޕްރައިމަރީން ބަލިވެގެން ބައެއް ދާއިރާތަކުގައި އަމިއްލަ ގޮތުން ވާދަކުރައްވާ ކެންޑިޑޭޓުންނަށް ތާއީދުކޮށް އަމަލީ ގޮތުން ކެމްޕެއިނުގައި ވެސް ބައިވެރިވަމުންނެވެ.
ސަރުކާރު ކެންޑިޑޭޓު އޮޅިފައިވާ ދާއިރާތަކުގެ ތެރޭގައި ހުރާ ދާއިރާގެ އިތުރުން ތިމަރަފުށި ދާއިރާ، ގއ. ވިލިނގިލި ދާއިރާ، ނ. ވެލިދޫ ދާއިރާ، އއ. މަތިވެރި ދާއިރާ އަދި މައްޗަންގޮޅީ މެދު ދާއިރާ ހިމެނެ އެވެ.
