އިންތިހާބާބެހޭ އާންމު ގާނޫނަށް އިސްލާހު ގެނައުމުގެ ބިލު ތަސްދީގު ނުކުރައްވާ ކޮންމެ ސިކުންތަކު ރައީސް ޑރ. މުހައްމަދު މުއިއްޒު އެ ހުންނަވަނީ ގާނޫނުއަސާސީއާ ހިލާފުވެވަޑައިގެންފައި ކަމަށް ދަ ޑިމޮކްރެޓްސްގެ ރައީސް އަދި ހެންވޭރު ހުޅަނގު ދާއިރާގެ މެމްބަރު ހަސަން ލަތީފު ވިދާޅުވެއްޖެ އެވެ.
އެ ބިލް ތަސްދީގު ނުކުރައްވާ ހުންނެވުމުން ވޯޓުލުމުގެ ހައްގު ރައްޔިތުންނަށް ގެއްލިގެންދާ ކަމަށާއި ބިލް ތަސްދީގު ކުރެއްވުމަކީ ވަރަށް ޒިންމާދާރުކަން ކުޑަ އަމަލެއް ވެސް ހަސަން ވިދާޅުވި އެވެ.
"ރައްޔިތުންނަށް ތަސައްލީއެއް ނުލިބޭ ގޮތަށް މިވަރު ބޮޑު ހައްގެއް ހިފަހައްޓާފައި ބާއްވައިގެން ނުވާނެ ރައީސްއެއް. ވަރަށް ޒިންމާދާރުކަން ކުޑަ އަމަލެއް އެ ހިންގަވަނީ. ރައްޔިތުންނަށް ލިބިފައި އޮންނަ އެންމެ ބޮޑު ހައްގަކީ ވޯޓުލުމުގެ ހައްގު," ހަސަން ވިދާޅުވި އެވެ.
ގާނޫނުއަސާސީގެ 91 ވަނަ މާއްދާގެ ށ. ގައި ބުނާ ގޮތުން އިންތިހާބު ފަސްކުރުމާބެހޭ ބިލު މިހާރު ތަސްދީގު ކުރައްވައި، ގެޒެޓުގައި ޝާއިއު ކުރަންޖެހިވަޑައިގަންނަވާނެ އެވެ. ނަމަވެސް ރައީސް ނިންމެވީ އެކަން ނުކުރައްވައި ބަންޑާރަ ނައިބުގެ ލަފައެއް ހޯއްދެވުމަށެވެ
ބިލެއް ތަސްދީގު ކުރެއްވުމަށް ގާނޫނުއަސާސީގައި ލިޔެފައިވާ ހަމަތައް ސާފުކޮށް އޮތުމުން، އެއީ ގާނޫނީ ލަފައެއް ހޯއްދަވަންޖެހޭ ކަމެއް ނޫން ކަމަށް ވެސް ހަސަން ވިދާޅުވި އެވެ.
"ބަހަނާ ނުދައްކަވައި, ރައްޔިތުންނަށް ޖެއްސުން ނުކޮށް, ގާނޫނުއަސާސީގައި އޮތް ގޮތަށް އަމަލު ކުރައްވަންވީ," އޭނާ ވިދާޅުވި އެވެ.
ބިލު ތަސްދީގު ނުކުރައްވަން ރައީސް މުއިއްޒު ބޭނުން ވަނީ ސަރުކާރަށް ތާއިދު ނެތި, މަޖިލީސް އިންތިހާބުން ޕީއެންސީން ގެއްލިގެން ގޮސްފައިވާނެތީ ކަމަށް ވެސް ހަސަން ވިދާޅުވި އެވެ.
މަޖިލީހުގައި ތިއްބަވާ އެމްޑީޕީގެ މެންބަރުންނަކީ "ޕަޕެޓުން" ތަކެއްގެ ގޮތުގައި ސިފަ ކުރައްވައި، އަދި އެ މެންބަރުންގެ "ޖޮއިސްޓިކް" އޮތީ އެހެން ފަރާތެއްގައި ކަމަށް ރައީސް މުއިއްޒު ވިދާޅުވެފައި ވާއިރު، ހަސަން ވިދާޅުވީ ރައީސް ކުރައްވަން ޖެހިވަޑައިގަންނަވާނެ ކަމަކީ ފާޑު ކިޔުއްވުމުގެ ބަދަލުގައި ގާނޫނީ ޒިންމާ އަދާކުރެއްވުން ކަމަށެވެ.
