ރޯދަ މަހު އިންތިހާބުތައް ނުބޭއްވޭ ގޮތަށް އިންތިހާބާބެހޭ އާއްމު ގާނޫނަށް ބަދަލު ގެންނަން ރައްޔިތުންގެ މަޖިލީހުން ފާސްކުރި ބިލު، ދެ ވަނަ ފަހަރަށް ފާސްކުރުމުން ވެސް، އެ ބިލް ތަސްދީގުނުކުރައްވާނެ ކަމުގެ އިޝާރާތް ސަރުކާރާއި ޕާޓީގެ އޮފިޝަލުންނަށް ދޭ ކަމަށް ބައެއް އޮފިޝަލުން ވިދާޅުވެއްޖެ އެވެ.
ސަރުކާރުގެ ބައެއް އިސް ވެރިން "އަދަދު" ނޫހަށް މައުލޫމާތު ދެއްވި ގޮތުގައި ސަރުކާރާއި ޕާޓީގެ އިސް އޮފިޝަލުންނަށް ރައީސް ޑރ. މުހައްމަދު މުއިއްޒުގެ ފަރާތްޕުޅުން އިރުޝާދު ދެއްވަނީ ރައްޔިތުންގެ މަޖިލީހުގެ އިންތިހާބު މާޗް 17، ގައި (ރޯދަ މަހުގެ ތެރޭގައި) އޮންނާނެ ކަމަށް ބަލައިގެން އިތައްޔާރުވުމަށެވެ.
"އަޅުގަނޑުމެންނަށް ދޭ އިންޑިކޭޝަން އަކީ މާޗު 17 އަށް ތައްޔާރުވުމަށް،" ބިލް ތަސްދީގު ކުރައްވާނެތޯ ސުވާލު ކުރުން ސަރުކާރުގެ އިސް އޮފިޝަލަކު ވިދާޅުވި އެވެ.
މި ނޫހާ ވާހަކަ ދެއްކެވި އެހެން ބައެއް އޮފިޝަލުން ވެސް ވިދާޅުވި ގޮތުން ބިލް ތަސްދީގު ކުރައްވާނެ ކަމަށް އެ ބޭފުޅުން ގަބޫލެއް ނުކުރައްވަ އެވެ.
"ބިލް ތަސްދީގު ކުރާނެ ކަމަށް ގަބޫލެއް ނުކުރެވޭ. އަބަދު ވެސް ބުނަމުން ދަނީ އިންތިހާބަށް ތައްޔާރުވުމަށް. މާޗު 17 ގައި އިންތިހާބު އޮންނާނެ ކަމަށް،" މި ނޫހާ ވާހަކަ ދެއްކި އެކަކު ވިދާޅުވި އެވެ.
ރައްޔިތުންގެ މަޖިލީހުގެ އިންތިހާބު ރޯދަ މަހާ ދިމާވާ ގޮތަށް އިލެކްޝަންސް ކޮމިޝަނުން ތާވަލުކުރުމުން ރައްޔިތުންގެ މަޖިލީހުން ފުރަތަމަ މަސައްކަތް ކުރީ އެ ކޮމިޝަނާ ވާހަކަ ދައްކައިގެން އިންތިހާބުގެ ތާރީހު ބަދަލު ކުރެވޭތޯ އެވެ. އެކަން ކާމިޔާބުނުވުމުން މަޖިލީހުން ވަނީ އިންތިހާބާ ބެހޭ އާއްމު ގާނޫނަށް ބަދަލުގެނެސް، ރޯދަ މަހު އެއްވެސް އިންތިހާބެއް ނުބާއްވާ ގޮތަށް ހަދަން ބިލެއް ފާސްކުރި އެވެ.
އެ ބިލު ތަސްދީގު ކުރައްވަން ރައީސް މުއިއްޒަށް ފޮނުވުމުން އެމަނިކުފާނު އެބިލު އަނބުރާ މަޖިލީހަށް ފޮނުއްވައިލެއްވި އެވެ. މަޖިލީހުން އިއްޔެ ވަނީ އެ ބިލު ދެވަނަ ފަހަރަށް ފާސްކުރި އެވެ.
އެގޮތަށް ފާސްކުރުމުން ތަސްދީގުކުރައްވަން ޖެހިވަޑައިގަންނަވާނެ ކަމަށް ގާނޫނުއަސާސީގައި އޮތް ނަމަވެސް ރައީސް މިއަދު ވިދާޅުވީ ބިލު ތަސްދީގުކުރެއްވުމާ މެދު ބަންޑާރަނައިބުގެ ލަފާ ހޯއްދަވާނެ ކަމަށެވެ.
އުތުރުގެ ހަތަރު އަތޮޅަށް ކުރައްވަމުން ގެންދަވާ ދަތުރުގެ ތެރެއިން ނ. ކެނދިކުޅުދޫގައި ވާހަކަ ދައްކަވަމުން ރައީސް ވަނީ އަނެއްކާ ވެސް ގާނޫނު އަސާސީއާ ހިލާފުވެވަޑައިނުގަންނަވާނެ ކަމަށް ވިދާޅުވެފަ އެވެ. މަޖިލީހުގެ އިންތިހާބު ރޯދައިގެ ފަހުން ބާއްވަންޖެހޭ ގޮތަށް ފާސް ކުރި ބިލު އަނބުރާ ފޮނުވާލެއްވުމުން، އިތުރު ބަދަލެއް ނުގެނެސް އިއްޔެ ފާސްކޮށްފައި ވަނިކޮށެވެ.
"80 މެމްބަރުން ކަމަށް ބަލައިގެން ނިންމާ ކޮންމެ ނިންމުމެއް ގާނޫނޫ އަސާސީއާ ހިލާފު ވާނޭ. މަޖިލީހުގެ އަދަދަކީ 87 ކަމަށް ސުޕްރީމް ކޯޓުން ނިންމީ. އެެންވީމާ ބަންޑާރަ ނައިބުގެ ގާނޫނީ ލަފަޔަށް އަޅުގަނޑު މިހާރު ވާނީ ދަންނަވާފައި," ސުޕްރީމް ކޯޓުން މިއަދު ނެރުނު ހުކުމާ ގުޅޭގޮތުން ރައީސް ވިދާޅުވި އެވެ.
އެމަނިފާނު މިހެން ވިދާޅުވި ނަމަވެސް, ގާނޫނުއަސާސީގެ 91 ވަނަ މާއްދާގެ ށ. ގައި ބުނާ ގޮތުން އިންތިހާބު ފަސް ކުރުމާ ބެހޭ ބިލު މިހާރު ތަސްދީގު ކުރައްވައި، ގެޒެޓުގައި ޝާއިއު ކުރަންޖެހިވަޑައިގަންނަވާނެ އެވެ.
