އަންނަ މަހު ބާއްވާ ރައްޔިތުންގެ މަޖިލީހުގެ އިންތިހާބުގައި ސަރުކާރުގެ ކެންޑިޑޭޓުން ވަކި ނުކުރެވިގެން, ރައީސުލްޖުމްހޫރިއްޔާ ޑރ. މުހައްމަދު މުއިއްޒުއާ ސުވާލުކޮށްފި އެވެ.
ސީދާ ރައީސްއާ ސުވާލު ކުރެވޭގޮތަށް ކުރިއަށް ގެންދިޔަ 'އަހާ' ޕަބްލިކް ފޯރަމްގައި މީހަކު ރައީސްއާ ސުވާލުކުރީ ރައްޔިތުންގެ މަޖިލީހަށް ވާދަކުރާނެ ކެންޑިޑޭޓުން ކަނޑައެޅުމަށް ޕާޓީން ޑިމޮކްރެޓިކް އުސޫލުން ކެންޑިޑޭޓަކު ހޮވާފައި ހުއްޓައި ރައީސްގެ ފޮޓޯ ޖަހައިގެން އިތުރު ކެންޑިޑޭޓަކު ނިކުމެގެން އުޅޭތީ އެވެ.
"ޕާޓީ ނުވަތަ ސަރުކާރަށް ނިސްބަތް ނުވާ އެހެން ކެންޑިޑޭޓަކު ރައީސްގެ ފޮޓޯ ޖައްސަވައިގެން ރައީސްގެ ފުރިހަމަ ތާއިދު އޮތް ކަމަށް މެންބަރުންނަށާއި ރައްޔިތުންނަށް އަންގަމުން ދާތީ, ތިން ރަށުގެ މީހުންގެ މިހަކާ މެދު ހިޔާލު ތަފާތުވުމާއި ނުތަނަވަސްކަމާ އެބަ އޮތް. މިކަމާ މެދު ރައީސް ދެކެވަޑައިގަންނަވަނީ ކިހިނެތްތޯ" ޒުވާނަކު ސުވާލު ކުރި އެވެ.
ޕްރައިމަރީން ހޮވި ކެންޑިޑޭޓަށް ސަރުކާރުގެ އެއްބާރުލުން ލިބޭނެތޯ ވެސް ސުވާލުކޮށްފަ އެވެ.
ސަރުކާރު ކެންޑިޑޭޓުން ވަކިނުވާތީ ޒުވާނަކު ރައީސްއާ ސުވާލުކުރަނީ -- ފޮޓޯ: ރައީސް އޮފީސް
ނަމަވެސް އެއީ ޕާޓީގެ އެތެރޭގެ އަދި ރޭގެ މައުލޫއާ ނުގުޅޭ ކަމަކަަށް ވާތީ ޖަވާބު ދެއްވުމަށް ރައީސް އުޒުރުވެރިވެވަޑައިގެންނެވި އެވެ.
"މިރޭގެ މި ފޯރަމްގެ މައިގަނޑު މައުލޫއާ ނުގުޅާ, ޕާޓީގެ އެތެރޭގެ ކަމެއް ވީމަ ތި ކޭސް ވަކިން އަޅުގަނޑާ ހިއްސާ ކޮށްލަ ދިނިއްޔާ ވަރަށް ރަނގަޅު" ރައީސް ވިދާޅުވި އެވެ.
ސަރުކާރު ކެންޑިޑޭޓުން ވަކިނުވެގެން ރައީސްއާ ސުވާލުކުރި އިރު, ޕީއެންސީގެ ޓިކެޓު ކާމިޔާބުކުރި ކެންޑިޑޭޓުން ތިއްބާ, ރައީސްގެ ކެންޑިޑޭޓުންގެ ގޮތުގައި އިތުރު ކެންޑިޑޭޓުންތަކެއް ބައެއް ދާއިރާތަކަށް ނިކުންނަ ކަމުގެ ކަންބޮޑުވުން އޮތީ އިތުރުވެފަ އެވެ.
ޕްރައިމަރީން ޕީއެންސީގެ ޓިކެޓު ކާމިޔާބު ކުރުމުން ވެސް ސަރުކާރުގެ ތާއިދު ނުލިބުމުން ގައްދޫ ދާއިރާގެ ކެންޑިޑޭޓު މުހައްމަދު ޝަފީގު (މަހާ) ވަނީ އިންތިހާބުގައި ވާދަ ނުކުރަން ނިންމާފަ އެވެ. އޭނާ އިންތިހާބުގައި ވާދަ ނުކުރަން ނިންމީ, ޓިކެޓު ކަށަވަރުވުމަށްފަހު ކެމްޕޭނު ކުރަމުން ދަނިކޮށް އޭނާއާ ޕްރައިމަރީގައި ވާދަކޮށް ނާކާމިޔާބުވި ކެންޑިޑޭޓު މުހައްމަދު އަލީ އަމިއްލަ ގޮތުން ވާދަކޮށް ކެމްޕޭން ކުރަމުން ދަނިކޮށެވެ.
މުހައްމަދު އަލީގެ ކެމްޕޭނުގައި ސަރުކާރުގެ ބައެއް މިނިސްޓަރުންވެސް ބައިވެެރިވި އެވެ. ޝަފީގުގެ ނަން ނެގުމާ އެކު މުހައްމަދު އަލީއަށް ޕީއެންސީގެ ޓިކެޓުގައި ވާދަކުރުމުގެ ފުރުސަތު ދީފައި ވެއެވެ.
މީގެ އިތުރުން ބައެއް ދާއިރާތަކުގައި ސަރުކާރު ކެންޑިޑޭޓުގެ ގޮތުގައި ދެ ކެންޑިޑޭޓުން ވެސް ކެމްޕޭނު ކުރަމުން އެބަދެ އެވެ.
އެގޮތުން, ވިލިނގިލި ދާއިރާގެ ޕީއެންސީ ޕްރައިމަރީ ކާމިޔާބު ކުރި ޔަޒްމީދު މުހައްމަދު އަދި ޕްރައިމަރީއިން ދެވަނައަށް ދިޔަ އާޒިމް އަބްދުލްއަޒީޒު ވެސް ދަނީ ކެމްޕޭނުގައި ރައީސްގެ ފޮޓޯ އަދި ޕީއެންސީގެ ކުލަތައް ބޭނުންކުރަމުންނެވެ.
