ކުރީގެ ދެރައީސުންނަށް ޝަކުވާ ހުށަހަޅަން ފުރުސަތު ދިނީ ކާކުކަން ނޭނގޭ ގޮތަށް ޝަކުވާ ހުށަހެޅުމުގެ ފުރުސަތާ އެކުގައި ކަމަށް ވިޔަސް ރައީސް ޑރ. މުހައްމަދު މުއިއްޒަށް ޝަކުވާ ހުށަހަަޅަން ގާއިމް ކުރި ޕޯޓަލް އެއާ ތަފާތު ވެއްޖެ އެވެ.
ސީދާ ރައީސަށް ޝަކުވާ އާއި ހިޔާލު ހުށަހަޅަން އިއްޔެ އިފްތިތާހުކުރި "ރައްޔިތުންގެ އަޑު" ގެ ނަމުގައި ގާއިމްކުރި ޕޯޓަލް އަށް ވަންނަން ލޮގިން ވެވޭ ހަމަ އެކަނި މަގަކަށް އޮތީ ދައުލަތުގެ މުއައްސަސާތަކުން ދޭ ހިދުމަތްތައް އޮންލައިންކޮށް ހޯދަން ގާއިމްކޮށްފައިވާ "އީ ގަވަމެންޓް" އަށް ވަންނަ "އީފާސް" މެދުވެރިކޮށެވެ.
ކުރީގެ ރައީސް އަބްދުﷲ ޔާމީނުގެ ވެރިކަމުގައި އާންމުންގެ ހިޔާލު ހޯދަން ގާއިމްކުރި "ޑިއާ ޕްރެޒިޑެންޓް" ގެ ނަމުގައި ރައީސް އޮފީހުގެ ވެބްސައިޓްގައި ގާއިމްކުރި ޕޯޓަލް މެދުވެރިކޮށް ކާކުކަން ނޭނގޭ ގޮަތަށް ވެސް ހިޔާލާއި ޝަކުވާ ހުށަހެޅެވެ އެވެ. އޭގެ ފަހުން ރައީސް އިބްރާހީމް މުހައްމަދު ސޯލިހު ވެސް އެކަން ހަމަ އެގޮތަށް ކުރިއަށް ގެންދެވި އެވެ.
ރައީސްއަށް ޝަކުވާ އާއި ހިޔާލު ހުށަހެޅާ ޕޯޓަލް އަށް އީފާސް މެދުވެރިކޮށް ވަންނަ ގޮތަށް ހެދި ސަބަބާ ބެހޭ ގޮތުން ރައީސް އޮފީހުގެ ކޮމިއުނިކޭޝަން މިނިސްޓަރު އިބްރާހީމް ހަލީލު ވިދާޅުވީ، އެގޮތަށް ހަމަޖެއްސީ ޝަކުވާ ހުށަހަަޅަކީ "ޖެނުއިން މީހެއްކަން" ކަށަވަރުކުރުމާ އެކު ހުށަހަޅާ ޝަކުވާ އަކީ "ޖެނުއިން ޝަކުވާ" އަކަށް ހެދުމުގެ ބޭނުމުގައި ކަމަށެވެ.
"މިހާރު ވެސް ރައީސް އޮފީހަށް ފޮނުވާނެ ދެއްތޯ މީހުން ސުވާލު، ސިޓީ ވެސް ފޮނުވާނެ. ސިޓީ ވެސް އެެއީ ކޮންފިޑެންޝަލް އެއްޗިހި. ސިޓީ ފޮނުވުމުގެ ބަދަލުގައި ތަންކޮޅެއް ސާފު، ފަަސޭހަ ގޮތެއް ދެއްތޯ މިއީ،" ހަލީލު ވިދާޅުވި އެވެ.
ކާކުކަން ނޭނގޭ ގޮތަށް ޝަކުވާ ހުށަހަޅަން ފުރުސަތު ދިން އިރު އެގޮތަށް އިންތިޒާމު ހަމަޖެއްސި ސަބަބެއް ކަމަށް ކުރީ ސަރުކާރުން ބުނީ ޝަކުވާ ހުށަހަޅަނީ ކާކުކަން އެނގިދާނެތީ ޝަކުވާ ހުށަހަޅަން ފަސްޖެހޭ މީހުންނަށް ވެސް އެ ފުރުސަތު ދިނުމެވެ.
