ކުރިއަށް އޮތް ރައްޔިތުންގެ މަޖިލީހުގެ އިންތިހާބުގައި ސަރުކާރަށް މެޖޯރިޓީ ނުލިބިއްޖެ ހާލަތެއްގައި ރާއްޖޭގައި ތިބި އިންޑިއާ ސިފައިން ނުބޭލޭނެ ކަމުގެ އިޝާރާތެއް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދުގައި އައްޑޫގައި ހުންނަވައި ދެއްވައިފި އެވެ.
ރާއްޖޭގައި ހިންގާ ސާޗް އެންޑް ރެސްކިއު އޮޕަރޭޝަންތަކުގައި މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އާއެކު ހަރަކާތްތެރިވާ އިންޑިއާގެ ސިފައިން ބޭލުމަކީ ރައީސްގެ އެންމެ މައި ރިޔާސީ ވައުދެވެ.
އައްޑޫ ހުޅުމީދޫގައި މިއަދު ބޭއްވި ބައްދަލުވުމެއްގައި ރައީސް ވިދާޅުވީ އިންޑިއާ ސިފައިން ބާލަން ދެ ގައުމުން އެއްބަސްވުމެއްގައި ސޮއިކޮށްފައިވާ ކަމަށާއި އެހެން ނަމަވެސް ސިފައިން ފޮނުވައިލުމުގެ ކަންތައް ނިންމުމަށް ޓަކައި މަޖިލީހުގެ މެޖޯރިޓީ ސަރުކާރަށް ބޭނުންވާ ކަމަށެވެ.
"10 ގެ ކުރިން މި ރާއްޖޭގައި ތިބި ބޭރުގެ ހުރިހާ ސިފައިން ގެންދިޔުމަށްޓަކައި މިހާރު ދެ ގައުމުގެ ދޭތެރޭ ސޮއިކުރެވިފައިވާ ލެޓާ އޮފް އެކްސްޗޭންޖް އެކަން ކޮށް ނިންމުމަށްޓަކައި ވެސްމެ މިކަން ކުރައްވަން ޖެހޭ [ސަރުކާރަށް ތާއީދު ކުރާ މެމްބަރުން ހޮވަން ޖެހޭ]," ރައީސް ވިދާޅުވެފައިވެ އެވެ.
އެ އެއްބަސްވުމަށް އިންޑިއާގެ ސަރުކާރުން ވެސް އަމަލުކުރާނެ ކަމުގެ ޔަގީންކަން ދީފައިވާ ކަމަށް ވިދާޅުވުމަށް ފަހު ރައީސް ވަނީ މަޖިލިސް އިންތިހާބުގެ ނަތީޖާ ނުކުންނަ ގޮތަކުން އަނެއްކާ ވެސް އިންޑިއާ ސިފައިން ތިބޭނެ ފަދަ މޭރުމަކުން ވާހަކަ ދައްކަވާފަ އެވެ. އަދި, މަޖިލިސް އިންތިހާބުގައި ވިސްނުމަށް ފަހު ވޯޓު ދެއްވުމަށް އެދިވަޑައިގެންނެވި އެވެ.
"އެވަަރު ކަމެއް ހާސިލުވެގެންދިޔައިރު އެކަން 'އަންޑޫ ވާގޮތަށް' [އިއާދަވާ ގޮތަށް] ގޮތަށް އަނެއްކާ ވެސް ބަދަލުތަކެއް އަންނަ ނިންމުމެއް ރައްޔިތުންގެ މަޖިލީހުގެ އިންތިހާބު ނިންމައިފިއްޔާ އަޅުގަނޑުމެން އަމިއްލައަށް ނޫންތޯ އަޅުގަނޑުމެންގެ މިސްރާބު ބަދަލު މިކުރަނީ. އެހެން ވާކަށް ނުވާނެ. އެއީ އަޅުގަނޑުމެންގެ ޒިންމާ އަދާކުރި ކަމަކަށް ނުވާނެ," ރައީސް ވިދާޅުވި އެވެ.
ރައީސް މިހެން ވިދާޅުވިއިރު އިންޑިއާ ސިފައިން ރާއްޖެއަށް ގެނައީ މަޖިލީހުގެ އެއްވެސް ދައުރެއް ނެތި އެވެ. އަދި, މި ސަރުކާރު ވެރިކަމާ ހަވާލުވުމަށް ފަހު ސިފައިން ފޮނުވާލުމަށް ކުރަމުންދާ މަސައްކަތުގައި ވެސް މަޖިލީހުގެ އެއްވެސް ބައިވެރިވުމެއް ނެތެވެ.
އަންނަ މެއި މަހުގެ 10 ގެ ކުރިން އިންޑިއާގެ ސިފައިން ރާއްޖެއިން ބޭލުމަށްފަހު ޑޯނިއާ އާއި ދެ ހެލިކޮޕްޓަރު އޮޕަރޭޓު ކުރަން "ޓެކްނިކަލް" މީހުން ގެންނަން ދިވެހި ސަރުކާރާއެކު އިންޑިއާއިން ވަނީ އެއްބަސްވެފަ އެވެ.
ދިވެހި ހާރިޖިއްޔާއިން ނެރުނު ބަޔާނެއްގައި ބުނެފައިވަނީ ދެ ގައުމުގެ ކޯ ގްރޫޕްގެ ބައްދަލުވުމުގައި އިންޑިއާ ސިފައިންގެ ފުރަތަމަ ބެޗު މާޗް 10، ގެ ކުރިން ފޮނުވާލަން އެއްބަސްވެފައިވާ ކަމަށް ހާމަކޮށްފަ އެވެ.
