ކުރިއަށް އޮތް ރައްޔިތުންގެ މަޖިލީހުގެ އިންތިހާބުގައި ވާދަކުރަން ވެރިކަން ކުރާ ޕީޕީއެމް/ޕީއެންސީ ކޯލިޝަންގެ ޓިކެޓު ރަސްމީ ގޮތުން ދީފައިވާ ކެންޑިޑޭޓުންނާ ދެކޮޅަށް ސީދާ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ކެންޑިޑޭޓުންތަކެއް ނެރުއްވާ ކަމުގެ ސީރިއަސް ތުހުމަތުތަކެއް ފެންމަތިވެއްޖެ އެވެ.
ތިމަރަފުށީ ދާއިރާ އާއި ގައްދޫ ދާއިރާއަށް ޕީއެންސީގެ ޓިކެޓު ދީފައިވާ ކެންޑިޑޭޓުން ބާކީކޮށް ރައީސްގެ ތާއީދު އޮތީ އެހެން ކެންޑިޑޭޓުންތަކަކަށް ކަމަށް ބުނެ ސަރުކާރުގެ އިސް އޮފިޝަލުން ކެމްޕޭން ކުރާ ހަބަރުތައް "އަދަދު" އިން ވާނީ ފާއިތުވެދިޔަ ދުވަސްތަކުގައި ގެނެސްދީފަ އެވެ.
ވެރިކަން ހިންގާ ކޯލިޝަނުގެ ކެންޑިޑޭޓުންނާ ވާދަ ކުރަން ރައީސް މުއިއްޒުގެ އެދިވަޑައިގަތުމަށް ޖުމުލަ 11 ދާއިރާއަކަށް ކެންޑޭޓުން ވާދަ ކުރަން ނިންމާފައިވާ ކަމަށް މި ނޫހާ ވާހަކަ ދެއްކި އެކި މަސްދަރުތަކުން ވަނީ ޔަގީންކޮށްދީފަ އެވެ.
އޭގެ ތެރޭގައި ސަރުކާރާ ގުޅުން އޮންނަ ބައެއް ފަރާތްތަކާއި ޕީއެންސީގެ ޓިކެޓު ލިބިފައިވާ ބައެއް މީހުން ހިމެނެ އެވެ. "ރައީސްގެ ކެންޑިޑޭޓުން" ގެ ގޮތުގައި ވާދަ ކުރާ މީހުންގެ ލިސްޓެއް މި ނޫހަށް ވަނީ ލިބިފަ އެވެ.
ކޯލިޝަނުގެ ކެންޑިޑޭޓުން ތިއްބާ ސަރުކާރުން އަމިއްލަ ކެންޑިޑޭޓުންތަކެއް ނެރޭކަމުގެ އަޑުތައް ގަދަވި ނަމަވެސް މިހާތަނަށް ސަރުކާރުން އެކަން ދޮގެއް ނުކުރެ އެވެ. އެކަމާ ގުޅޭ ގޮތުން މި ނޫހުން ސުވާލު ކުރުމުން ޕީއެންސީގެ ޗެއާޕާސަން އަދި ރައީސް މުއިއްޒުގެ އިސް ވަޒީރު އެއްވެސް ޖަވާބެއް ނުދެއްވަ އެވެ.
އެގޮތުން, މައްޗަންގޯޅި މެދު ދާއިރާގެ ޕީއެންސީ ޓިކެޓު ހޯއްދެވި މުހައްމަދު އަބްދުލްގާދިރުއާ ދެކޮޅަށް "ރައީސްގެ ކެންޑިޑޭޓް" ގެ ގޮތުގައި ވާދަކުރައްވަނީ ސިޓީ ކައުންސިލަރު އަހްމަދު ޒަމީރު ކަމަށް މަސްދަރުތަކުން ބުނެ އެވެ. އިންތިހާބުގައި އޭނާ އަމިއްލަ ގޮތުން ވާދަކުރާނެކަން ވަނީ މި ނޫހަށް ވަނީ ކަށަވަރުކުރެވިފަ އެވެ.
ވިލިނގިލީ ދާއިރާގެ ޓިކެޓު ހޯއްދެވި ޔަޒްމީދު މުހައްމަދުއާ ދެކޮޅަށް "ރައީސްގެ ކެންޑިޑޭޓް" ގެ ގޮތުގައި ނުކުންނަވާނީ ޕްރައިމަރީން ބަލިވި އާޒިމް އަބްދުލްއަޒީޒު ކަމަށްވެ އެވެ. ޔަޒްމީދު ޓިކެޓު ހޯއްދެވީ 577 ވޯޓާއެކު އެވެ. އާޒިމަށް ޕްރައިމަރީގައި ދެވަނަ ލިބުނީ 485 ވޯޓާއެކު އެވެ. މަޖިލިސް އިންތިހާބުގައި އަމިއްލަ ގޮތުން ވާދަކުރާކަން އާޒިމް ވަނީ ޔަގީންކޮށްދީފަ އެވެ.
މި ނޫހަށް ލިބުނު ލިސްޓުގައިވާ ގޮތުން މަރަދޫ ދާއިރާއަށް "ރައީސްގެ ކެންޑިޑޭޓް" ގެ ގޮތުގައި އިންތިހާބަށް ނުކުންނާނީ މިހާރު ވެސް އެ ދާއިރާގައި ހުންނެވި މެމްބަރު އިބްރާހިމް ޝަރީފް (މަވޯޓާ) އެވެ.
މި ނޫހާ ވާހަކަ ދައްކަވަމުން މަވޯޓާ ޝަރީފް ވަނީ އިންތިހާބުގައި ވާދަކުރުމާ މެދު އަދި ގޮތެއް ނުނިންމަވާ ކަމަށް ވިދާޅުވެފަ އެވެ. ނަމަވެސް, އިންތިހާބަށް ނުކުތުމާ ގުޅޭ ގޮތުން ޕީއެންސީގެ ނުރަސްމީ ކޯލެއް އައި ކަމަށް އޭނާ ޔަގީންކަން ދެއްވި އެވެ.
ހަމައެހެންމެ, މަތިވެރި ދާއިރާއަށް ވެސް އެ ދާއިރާގެ މެމްބަރު ހަސަން ޒަރީރު "ރައީސްގެ ކެންޑިޑޭޓް" ގެ ގޮތުގައި ނުކުންނަވާނެކަން ވަނީ އެނގިފަ އެވެ. ދާދިފަހުން އެމްޑީޕީ ދޫކޮށް ޕީއެންސީއަށް ދިޔަ ޒަރީރުގެ ބަހެއް މިކަމާ ގުޅޭގޮތުން ލިބިފައި ނުވެ އެވެ. ނަމަވެސް, އެ ލިސްޓުގައި އޭނާގެ ނަން ވެސް އޮތެވެ.
މިދިޔަ މަހު 27، ގައި އޮތް ޕީއެންސީގެ ޕްރައިމަރީގައި ގައްދޫ ދާއިރާގެ މަޖިލިސް ޓިކެޓު ކާމިޔާބު ކުރީ މުހައްމަދު ޝަފީގު (މަހާ) އެވެ. ނަމަވެސް, އޭނާއާ ދެކޮޅަށް "ރައީސްގެ ކެންޑިޑޭޓް" ގެ ގޮތުގައި ނެރެނީ އެޑިއުކޭޝަން މިނިސްޓަރު، އިސްމާއީލް ޝަފީއުއާ އާއިލީ ގޮތުން ގުޅުން އޮންނަ، މުހައްމަދު އަލީ އެވެ. އޭނާގެ ކެމްޕޭނަށް ދެ ވަޒީރަކު ގައްދޫއަށް މިދިޔަ ހަފްތާ ބަންދުގައި ޒިޔާރަތް ވެސް ކުރި އެވެ.
ތިމަރަފުށީ ދާއިރާގައި ވެސް ޕްރޮގްރެސިވް ކޯލިޝަނުގެ ކެންޑިޑޭޓަކު ހުއްޓައި، ރައީސް މުއިއްޒުގެ ތާއީދު ކުރައްވަނީ މިހާރު އެ ދާއިރާގެ މަޖިލިސް މެމްބަރު އަބްދުﷲ ރިޔާޒުގެ ބޭބެ އަހުމަދު ރިޔާޒަށެވެ. ރައީސް ތ. އަތޮޅަށް ކުރެއްވި ދަތުރުފުޅުގެ ތެރެއިން އެމަނިކުފާނާ އެންމެ އަރިސް ދެ ވަޒީރުން ވަނީ އަހްމަދު ރިޔާޒަށް އޭނާއަކީ "ސަރުކާރުގެ ކެންޑިޑޭޓް" ކަމުގެ ޔަގީންކަން އަރުވާފަ އެވެ.
ޕީއެންސީގެ ޕްރައިމަރީއަށް ފަހު މީގެ ތެރެއިން ބައެއް ކެންޑިޑޭޓުންނާ ބައްދަލުކުރައްވައި އިންތިހާބަށް ނުކުތުމަށް އެދިވަޑައިގަތީ ސީދާ ރައީސް މުއިއްޒުކަން ވަނީ ޔަގީން ކުރެވިފަ އެވެ. އެގޮތުން, ބައެއް ބޭފުޅުންނާ ރައީސް އޮފީހުގައި ބައްދަލުކުރައްވައި ތާއީދު ކުރައްވާނެ ކަމުގެ ޔަގީންކަން ސީދާ އެމަނިކުފާނު ދެއްވި ކަމުގެ މައުލޫމާތު ވަނީ ލިބިފަ އެވެ.
