މާލޭ ރައްޔިތުންނަށް ގޯތިދޭން ކުރީގެ ސަރުކާރުން ފެށި "ބިންވެރިޔާ" ސްކީމުން ގޯތި ދިނުމުގައި ގަވައިދާ ހިލާފަށް އަމަލުކޮށްފައިވާ ކަމަށް ތުހުމަތުކޮށް، މައްސަލަތަކެއް ހުށަހަޅާފައިވާ ކަމަށާއި އެ މައްސަލަތައް ވެސް ބަލަމުން އަންނަ ކަމަށް އެންޓިކޮރަޕްޝަން ކޮމިޝަން (އޭސީސީ) އިން މިއަދު ބުނެފި އެވެ.
ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީން މިއަދު ބޭއްވި ބައްދަލުވުމެއްގައި މެމްބަރުންގެ ސުވާލުތަކަށް ޖަވާބުދެއްވަމުން އޭސީސީގެ ރައީސް އާދަމް ޝާމިލް ވިދާޅުވީ ބިންވެރިޔާ ސްކީމާ ގުޅޭ ގޮތުން ހުށަހެޅި މައްސަލަތައް ބަލަމުން އަންނަ ކަމަށާއި ތަހުގީގަށް ފާހަގަވި ކަންތައްތައް ކޮމިޓީން އެދޭ ނަމަ ހިއްސާކުރާނެ ކަމަށެވެ. އެހެން ނަމަވެސް އޭނާ ވިދާޅުވި ގޮތުގައި މިއަދުގެ ބައްދަލުވުމަށް ވަޑައިގެންނެވީ އެ ތަފްސީލާ އެކުގައެއް ނޫނެވެ.
"ބިންވެރިޔާ ސްކީމްގެ ދަށުން ހިނގަމުންދާ ކަންތައްތަކުގެ ވެސް މައްސަލަތަކެއް އޭސީސީއަށް ހުށަހެޅިފައި ހުރީ. ދެން އޭގެ ތަހުގީގެއް އަޅުގަނޑުމެން ކުރިއަށް އެބަ ގެންދަން މިވަގުތު،" ޝާމިލް ވިދާޅުވި އެވެ.
އެހެން ނަމަވެސް އޭގެ ކުރިން ކޮމިޓީގެ މެމްބަރު އަދި ރައްޔިތުންގެ މަޖިލީހުގެ ދާންދޫ ދާއިރާގެ މެމްބަރަކު ސުވާލުތަކަށް ޖަވާބުދެއްވަމުން އޭނާ ވިދާޅުވީ ގެދޮރުވެރިޔާ ސްކީމްގެ މަސައްކަތް ހުއްޓުވި ގޮތަށް ބިންވެރިޔާ ސްކީމް ނުހުއްޓުވީ ޕްރިލިމިނަރީ ތަހުގީގުން އެވަރުގެ މައްސަލަތަކެއް ފާހަގަ ކުރެވިފައި ނުވާތީ ކަމަށެވެ.
