ކުރިއަށް އޮތް މަސް ދުވަސް ތެރޭގައި ރައްޔިތުން ބޭނުންވާ ކަންކަން ސީދާ ރައީސްއަށް ހުށަހެޅޭ ގޮތަށް ހާއްސަ ޕޯޓަލްއެއް ރައީސް އޮފީހުން ހުޅުވައިލަން ނިންމާފައިވާ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
ރިޔާސީ ބަޔާން އިއްވަމުން ރައީސް ޑރ. މުއިއްޒު ވިދާޅުވީ ރައްޔިތުންގެ ހުށަހެޅުންތަކަށް ސީދާ ޖަވާބުދާރީ ވާނެ ކަމަށާއި އުންމީދަކީ ރައްޔިތުންގެ އެކި ޖަމާއަތްތަކާ ބައްދަލުކޮށް ރައްޔިތުންގެ ގޭގެއަށާއި އާއިލާތަކަށާއި ރާއްޖޭގެ އެކި ރަށްރަށައް ޒިޔާރަތްކުރުން ކަމަށެވެ.
"އަޅުގަނޑުގެ ވިސްނުމަކީ އަދި އުންމީދަކީވެސް މީޑިއާތަކާ އަދި ރައްޔިތުންނާ ވީހައިވެސް ގާތުން ސަރުކާރުން މަސައްކަތް ކުރުން. ވަޒީރުން، ސީދާ ރައްޔިތުންގެ ސުވާލުތަކަށް ކޮންމެ ދެމަހުން އެއްމަހަކު ޖަވާބުދާރީވުމަށް ބާއްވާ 'އަހާ' ފޯރަމް، މިދިޔަ ޖެނުއަރީމަހު ވަނީ ފަށާފައި،" ރައީސް ޑރ. މުއިއްޒު ވިދާޅުވިއެވެ.
އޭގެ އިތުރުން، ކޮންމެ ތިން މަހުން އެއް މަހަކު ރައްޔިތުންގެ ސުވާލުތަކަށް ސީދާ ޖަވާބުދޭން ބާއްވާ ހާއްސަ ސިލްސިލާއެއް މި މަހު ފަށާނެ ކަމަށާއި މި ފެބްރުއަރީ މަހުގެ ފުރަތަމަ ދުވަހުން ފެށިގެން މަދުވެގެން ކޮންމެވެސް އެއް ރައްޔިތެއްގެ ވީޑިއޯ ސުވާލަކަށް ސީދާ އެމަނިކުފާނު ކޮންމެ ދުވަހަކު ޖަވާބުދޭން ފަށާފައިވާ ކަމަށް ޑރ. މުއިއްޒު ވަނީ ވިދާޅުވެފަ އެވެ.
ބޭނުންވަނީ ރައްޔިތުންގެ ހާދިމެއްގެ ގޮތުގައި މަގާމުގެ ވާޖިބު އަދާކުރައްވަން ކަން ފާހަގަ ކުރައްވާ ރައީސް ޑރ. މުއިއްޒު ވިދާޅުވީ، ލޮބުވެތި ރައްޔިތުންގެ އަޑު އަހާނެ ކަމަށާއި މަޝްވަރާ ވެސް ކުރައްވާނެ ކަމަށެވެ. އަދި ގައުމުގެ ކަންކަން ހިންގުމުގައި ތިރިން މައްޗަށް، ރައްޔިތުން ގާތުން އޮޅުން ފިލުވައިގެން ރައްޔިތުން އެދޭ އަމާޒަށް ކަންކަން ގެންދާނެ ކަމަށް ވެސް އެމަނިކުފާނު ވަނީ ވިދާޅުވެފަ އެވެ.
ރައީސް ޑރ. މުއިއްޒު ރައްޔިތުންނާއި، މީޑިއާތަކާ ގާތުން މަސައްކަތް ކުރައްވާނެ ކަމަށް ވިދާޅުވެފައި ވާއިރު، އެމަނިކުފާނުގެ ސަރުކާރުގައި ތަރުޖަމާނަކު ނެތުމުގެ ކަންބޮޑުވުން ގިނަ ނޫސްވެރިން އަންނަނީ ފާޅު ކުރަމުންނެވެ. މިއާއެކު، ރައްޔިތުންގެ ކަންބޮޑުވުންތަކާ ގުޅޭ ގިނަ ސުވާލުތައް ސަރުކާރުން ހޯދުމަށް ވަނީ ދަތިތައް ކުރިމަތިވެފަ އެވެ.
