ސިއްހީ ހާލަތު ދެނެގަންނަން މުޅި އާބާދީގެ 18 އަހަރުން މަތީގެ ހުރިހާ ރައްޔިތުންގެ މައުލޫމާތު އެއްކުރަން ނިންމާފައިވާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ރިޔާސީ ބަޔާން އިއްވަމުން ރައީސް ޑރ. މުއިއްޒު ވިދާޅުވީ، ޑިސްޓްރިކްޓް ހެލްތު އިންފޮމޭޝަން ސޮފްޓްވެއާއެއް މެދުވެރިކޮށް މުޅި އާބާދީގެ 18 އަހަރުން މަތީގެ ހުރިހާ ރައްޔިތުންގެ މައުލޫމާތު އެއްކޮށް، ރައްޔިތުންގެ ސިއްހީ ހާލަތުތައް ދެނެގަނެ ބަލިތަކަށް ފަރުވާ ބޭނުންވާ ފަރާތްތަކަށް ފަރުވާ ފޯރުކޮށްދެވިގެންދާނެ ކަމަށެވެ.
މިގޮތުން ޕްރައިމަރީ ހެލްތު ކެއާގެ ނިޒާމު ފުޅާކުރުމަށް ކަނޑައަޅާފައިވާ ދިހަ އަތޮޅުގައި، ރިޕްރޮޑަކްޓިވް، މެޓާނަލް، ޗައިލްޑް އެންޑް ނިއުޓްރިޝަން، ގައިން ގަޔަށް އަރާ ބަލިތައް، ގައިން ގަޔަށް ނާރާ ބަލިތައް، ނަފްސާނީ ބަލިތައް އަދި ފައިލޭރިއާ ސްކްރީނިންގެ މައުލޫމާތު މި ސޮފްޓްވެއާގެ ދަށުން އެއްކުރެވިގެންދާނެ ކަމަށް ވެސް ރައީސް މުއިއްޒު ވިދާޅުވި އެވެ.
"ދުޅަހެޔޮ ސިއްހީ ވެށްޓެއް ގާއިމުކޮށް، ބަލިވުމުގެ ކުރިން ބަލިން ރައްކާތެރިވެވޭނެ ފިޔަވަޅުތައް އަޅަން ޖެހޭ. އަވަހަށް ބަލި ދެނެގަތުމާއި ވަށާޖެހޭ ސިއްހީ ނިޒާމެއްގެ ތެރެއިން ރައްޔިތުންނަށް ފެންވަރު ރަނގަޅު ސިއްހީ ހިދުމަތް ފޯރުކޮށްދޭން ޖެހޭ" ރައީސް ވިދާޅުވި އެވެ.
މިކަމަށްޓަކައި ޕްރިވެންޓިވް ހެލްތު ކެއާ ނިޒާމު ފުޅާކޮށް ހަރުދަނާކުރުމަށް ބޭނުންވާ ހާއްސަ ޕްރޮގްރާމުތައް ތަންފީޒުކުރުމަށް މި އަހަރަށް ހާއްސަ ބަޖެޓެއް ވެސް ވަނީ ހަމަޖެއްސިފައި ކަމަށް ރައީސް ހާމަކުރެއްވި އެވެ. ހަމައެހެންމެ އިތުރު 10 އަތޮޅެއްގައި ޕްރައިމަރީ ހެލްތުކެއާގެ ނިޒާމު ފުޅާކޮށް، ހިދުމަތްދޭން ފެށުމާއި ނިޒާމުގެ ދަށުން ދަމަނަވެށި ފުޅާކުރުމަށް ސަރުކާރުން ނިންމާފައިވާ ކަމަށް ރައީސް ވިދާޅުވި އެވެ.
އޭގެ އިތުރުން ދިރިއުޅުމުގެ އާދަތަކާ ކެއިންބުއިން ހުންނަގޮތުން ރާއްޖޭގައި އާންމުވަމުންދާ ބަލިތައް ދެނެގަނެ، ރައްޔިތުން ހޭލުންތެރިކުރުމުގެ ގައުމީ ކެމްޕޭނެއް ހިންގަން ހަމަޖެހިފައިވާކަން ފާހަގަކުރައްވާ ރައީސް މުއިއްޒު ވިދާޅުވީ، އާސަންދަ މެދުވެރިކޮށް، އަހަރަކު ދެ ފަހަރު ހިލޭ މެޑިކަލް ޗެކަޕް ހެދޭނެ އިންތިޒާމު ވެސް ހަމަޖައްސާފައިވާ ކަމަށެވެ.
