މަސްވެރިކަމުގެ ދިރާސާތަކަށް ބޭނުންކުރާ ޗައިނާގެ އިތުރު ރިސާޗު އުޅަނދެއް ރާއްޖޭގެ ހުޅަނގުގައި ހަރަކާތްތެރިވަމުންދާކަން އެނގިއްޖެ އެވެ.
ޗައިނާގެ އެގްރިކަލްޗާ މިނިސްޓްރީއާ އެފިލިއޭޝަން އޮންނަ އިދާރާއެއް ކަމަށްވާ ޔެލޯ ސީ ފިޝަރީޒް ރިސާޗު އިންސްޓިޓިއުޓުގެ "ލަން ހާއި 101" ނުވަތަ "ބްލޫ އޯޝަން 101" ބޯޓު ރާއްޖެ ސަރަހައްދުގައި މަހަކަށްވުރެ ގިނަ ދުވަސް ހޭދަކޮށްފައިވާކަން ސެޓެލައިޓް ޓްރެކިން އިން ދައްކަ އެވެ.
ސެޓެލައިޓް އޭއައިއެސް ޓްރެކިން ބޭނުންކޮށްގެން "އަދަދު" އިން ހޯދި ހޯދުންތަކުން ދައްކާ ގޮތުގައި ޗައިނާގެ އެ އުޅަނދު ދަނީ ރާއްޖޭގެ ހުޅަނގުން އިންޑިއާ ކަނޑުގައި އެއް ޕެޓާނަކަށް ދުއްވަމުންނެވެ. އާންމު ގޮތެއްގައި އެގޮތަށް ރިސާޗު އުޅަނދުތައް ދުއްވަނީ ދިރާސާތައް ކުރަން ކަމަށްވެ އެވެ.
އެ އުޅަނދު ޗައިނާގެ ޝިންދާއޯގެ ބަނދަރުން ފުރާފައިވަނީ ނޮވެމްބަރު 21، 2023 ގަ އެވެ.
ޓްރެކިން އިން ދައްކާ ގޮތުގައި އެކި ފަހަރު މަތިން މި އުޅަނދު ވަނީ ރާއްޖޭގެ އީއީޒެޑުގެ 70 އެއްހާ މޭލު ކައިރިން ދަތުރުކޮށްފަ އެވެ.
ނަމަވެސް ޑިސެމްބަރު 5، 2023 އިން ފެށިގެން އާންމުކޮށް ބޭނުންކުރާ ޓްރެކިން ސައިޓުތަކުން މި އުޅަނދު ދައްކާފައެއް ނުވެ އެވެ. ބެލެވޭ ގޮތުގައި އެ އުޅަނދުގެ ބައެއް ޓްރެކިން ސިސްޓަމްތައް ވަނީ ނިއްވާލާފަ އެވެ.
ޗައިނާގެ ދެވަނަ އުޅަނދު ރާއްޖޭގެ ހުޅަނގުން ދަތުރުކުރަމުންދާ ގޮތް ؛ ރާއްޖޭގެ އީއީޒެޑުގެ 70 މޭލު ބޭރުން ދަތުރުކޮށްފައިވޭ -
ރާއްޖެއަށް މިހާރު ދަތުރުކުރަމުންދާ ޗައިނާގެ ރިސާޗު އުޅަނދު "ޝިއެން ޔެން ހޮން 3" އާ އެއްގޮތަށް، އާންމުކޮށް ބޭނުންކުރާ ސައިޓުތަކުން މި އުޅަނދުވެސް އެންމެ ފަހުން ދައްކަނީ އިންޑޮނީޝިއާ ބޭރުން ޖާވާ ކަނޑުންނެވެ.
ފަޅުވެރިން ބަދަލުކުރުމަށް ކަމަށް ބުނެ ރާއްޖެ ދަތުރުކުރަމުންދާ އެ އުޅުނދު، ޖެނުއަރީ 30، އިން ފެށިގެން ފެށިގެން ދަނީ ރާއްޖޭގެ އީއީޒެޑުގެ ކައިރީގައި ބުރު އަޅަމުންނެވެ. އެގޮތުން އެއް ޕެޓާނަކަށް އުޅަނދު ދަތުރުކުރަމުންދާއިރު، ތިން ފަހަރެއްގެ މަތިން މި އުޅަނދު ވަނީ ރާއްޖޭގެ އީއީޒެޑުގެ ތެރެއަށް ވެސް ވަދެފަ އެވެ.
އުޅަނދުގެ ގާބިލުކަމާއި ތަފުސީލުތައް
ފިޝަރީޒް ސައިންސް އަދި ސާވޭ އަށް ބޭނުންކުރާ ލަން ހާއީއަކީ ގާތްގަނޑަކަށް 85 މީޓަރުގެ ދިގުމިނުގެ އުޅަނދެކެވެ.
ޔެލޯ ސީ ފިޝަރީޒް ރިސާޗް އިންސްޓިޓިއުޓުން 2019 އިން ފެށިގެން ބޭނުންކުރާ، ޖުމްލަ 3،289 ޓަނުގެ މި އުޅަނދަކީ މިވަގުތު ޗައިނާގައި އޮތް މަސްވެރިކަމުގެ ރިސާޗަށް ބޭނުންކުރާ އެންމެ ބޮޑު އުޅަނދެވެ.
އެ އިދާރާއިން މި އުޅަނދު ފަރުމާ ކޮށްފައިވަނީ ޔެލޯ ސީ އަދި ބޮހާއީ ސީގެ މާހައުލާއި މަސްވެރިކަން ދިރާސާ ކުރުމަށެވެ. ނަމަވެސް، ދުރު ކަނޑުތަކުގެ ދިރާސާ ކުރުމުގެ ގާބިލުކަންވެސް މި އުޅަނދަށް ލިބިފައިވެ އެވެ.
މަސްވެރިކަމުގެ ދިރާސާތައް ކުރުމުގައި ޗައިނާގެ އެންމެ އެޑްވާންސް އުޅަނދު ކަމަށް އެ ގައުމުންވެސް ސިފަ ކުރާ ލަން ހާއި 101 ގައި ލެބޯޓަރީތަކުގެ އިތުރުން އެކި ބާވަތްތަކުގެ ކަނޑުގެ ދިރުންތަކުގެ އަދި ކަނޑުގެ މާހައުލުގެ ސާވޭތައް ކުރުމަށް ބޭނުންކުރާ އެންމެ ފަހުގެ އާލަތްތައް އެކުލެވެ އެވެ.
އެގޮތުން، އިކޯ ސައުންޑާ (އީކޭ80) ސިސްޓަމް، ދާ އެޅުމުގެ އާލަތްތައް، އަދި ސޯނާ ސްކޭން ސިސްޓަމެއްވެސް މި އުޅަނދުގައި ހުރެ އެވެ.
އޭގެ އިތުރުން މަސްވެރިކަމުގެ އާ އީޖާދުތައް ޓެސްޓު ކުރުމާއި މަސްވެރިކަން ކުރާނެ އާ ސަރަހައްދުތައް ހޯދުމަކީވެސް މި އުޅަނދުގެ ސްކޯޕުގެ ތެރޭގައި ހިމެނޭ ކަންކަމެވެ.
