ވިހި ވަނަ ރައްޔިތުންގެ މަޖިލީހަށް މެމްބަރުން ހޮވަން މާޗްމަހު ބާއްވާ އިންތިހާބުގައި ވާދަކުރާނެ ކެންޑިޑޭޓުން ހޯދަން ދަ ޑިމޮކްރެޓްސް އިން ހުޅުވައިލުމުން، އެއްވެސް ކެންޑިޑޭޓަކު ކުރިމަތިނުލި ދާއިރާތަކަށް ކުރިމަތިލުމުގެ ފުރުސަތު އެޕާޓީން އަލުން ހުޅުވާލައިފި އެވެ.
ޑިމޮކްރެޓްސްގެ ވެބްސައިޓްގައި މިއަދު ޖެހި އިއުލާނެއްގައިވާ ގޮތުން އެއްވެސް ކެންޑިޑޭޓަކު ކުރިމަތި ނުލި ދާއިރާތަކަށް ވާދަކުރުމުގެ ފުރުސަތު މިމަހުގެ ހަވަނަ ދުވަހާ ހަމައަށް ވަނީ ހުޅުވާލައިފަ އެވެ. މިމަހުގެ ހަވަނަ ދުވަހުގެ ހަވީރު 6:00 އާ ހަމައަށް ހުޅުވައިލި އެ ފުރުސަތުގައި، ވާދަކުރުމުގެ ފުރުސަތު އެ ދުވަހުގެ އެގަޑިއާ ހަމައަށް ޕާަޓީގެ ދަފުތަރުގައި ޖެހޭ ފަރާތްތަކަށް އޮންނާނެ ކަމަށް ވެސް އެ އިއުލާނުގައި ބުންޏެވެ. ދެވަނަ ޝަރުތަކީ މަޖިލީހަށް ވާދަކުރަން ގާނޫނުގައި ބުނާ ޝަރުތުތައް ހަމަ ވުމެވެ.
ޑިމޮކްރެޓްސްގެ އިއުލާނުގައިވާ ގޮތުން މަޖިލީހުގެ 93 ދާއިރާއަށް ވެސް ކެންޑިޑޭޓުން ހޯދަން، އާ ފުރުސަތެއް ހުޅުވައިލީ އެޕާޓީގެ ކައުންސިލުން އެގޮތަށް ނިންމައިގެންނެވެ. އާ ފުރުސަތުގައި އެއް ދާއިރާއަކަށް އެކަކަށް ވުރެ ގިނައިން ކުރިމަތި ލިޔަސް ޕްރައިމަރީއެއް ދެން ނުބާއްވާނެ އެވެ. ކައުންސިލުން އެގޮތަށް ނިންމީ ޕްރައިމަރީއެއް ބާއްވާނެ ވަގުތު، އެހައިތަނަށް ދާއިރު ނޯންނާނެތީ އެވެ.
މިފަހަރުގެ ފުރުސަތުގައި އެއް ދާއިރާއަކަށް އެކަކަށް ވުރެ ގިނައިން ކުރިމަތިލައިފި ނަމަ ޓިކެޓް ދޭނެ މީހަކު ކަނޑައަޅާނީ ޕާޓީގެ ކައުންސިލުން ކަމަށް ވެސް އެޕާޓީން ބުންޏެވެ.
