މިފްކޯއިން ލޯނެއް ނަގައިގެން ވިޔަސް، މަސްވެރިންގެ އަތުން އެ ކުންފުނިން މަސް ގަތުމަށް ފަހު، މި ވަގުތު ނުދެވި ހުރި އޭގެ ފައިސާ ހަމަޖައްސައިދެއްވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
އާންމު ރައްޔިތުންގެ ކަންބޮޑުވުންތަކާ ގުޅިގެން ހުންނަ ސުވާލުތަކަށް، ސޯޝަލް މީޑިއާގައި ސީދާ ރައީސް މުއިއްޒު ޖަވާބު އެރުވުމުގެ ގޮތުން ރައީސް އޮފީހުން ވަނީ "ރައީސްގެ ޖަވާބު" ނަމުގައި ސިލްސިލާއެއް ފަށައިފަ އެވެ.
އެ ގޮތުން ރައީސް އޮފީހާއި ދިވެހި ސަރުކާރުގެ ރަސްމީ އެކްސް އެކައުންޓުން މިއަދު ޕޯސްޓުކުރީ ދިވެހި މަސްވެރިޔަކު ކުރި ސުވާލަކަށް ރައީސް ޖަވާބު ދެއްވާ ވީޑިއޯއެކެވެ. މަސްވެރިޔާގެ ކަންބޮޑުވުން އޮތް ކަމަކީ، އަދިވެސް މަސް ކިރުމަށް ފަހު ވަގުތުން މިފްކޯއިން އެ ގަންނަ މަހުގެ ފައިސާ ނުދިނުމެވެ.
ރައީސް މުއިއްޒު އެ ވީޑިއޯގައި ވިދާޅުވީ އެމަނިކުފާނު ވެރިކަމާ ހަވާލުވެވަޑައިގަތް އިރު ވެސް މަސްވެރިންނަށް ނުދެވި 270 މިލިއަނެއްހާ ރުފިޔާ އުޅުނު ކަމަށެވެ. އޭގެ ތެރެއިން 200 މިލިއަނެއްހާ ރުފިޔާ ދެއްކި ނަމަވެސް މަސް އިތުރަށް ފައިސާ ވަގުތުން ނުދީ ގަތުމުން އަނެއްކާ ވެސް އޭގެ އަދަދު މަތިވެފައިވާ ކަމަށެވެ.
"ދޭން ޖެހިފައި ހުރި ފައިސާ އެބަ ހުރި، މަސް ގަންނަމުންދާ ވަރަކުން، 270 ވަރަކަށް މިލިއަން ރުފިޔާ މިހާރު އަނެއްކާ ވެސް އެބަ އޮތް [މަސްވެރިންނަށް] ދޭން، މިފްކޯއިން ލޯނެއް ނަގައިގެން ވިޔަސް އެ ފައިސާ ދިނުމުގެ މަސައްކަތް ކުރަމުން މި ދަނީ،" ރައީސް މުއިއްޒު ވިދާޅުވި އެވެ.
މި ވަގުތު ވަގުތީ ގޮތަކުން ފައިސާ ހަމަޖައްސައިގެން، މަސްވެރިންނަށް ނުދެވި ހުރި ފައިސާ ހަމަޖެއްސި ނަމަވެސް ކުރިއަށް އޮތް ތަނުގައި މި ގޮތަށް ވިޔަ ނުދިނުމަށް ކުރެވެން ހުރި މަސައްކަތްތަކާއި އިންތިޒާމުތައް ވެސް ހަމަޖެއްސުމަށް މަސައްކަތް ކުރަމުންދާ ކަމަށް ވެސް އެމަނިކުފާނު ވިދާޅުވި އެވެ.
މަސްވެރިން މިފްކޯއަށް ކިރާ މަހަށް ވަގުތުން ފައިސާ ނުދިނުމާއި، މަސް ކިރުމަށް ކިއޫ ހަދައިގެން މަސްވެރި ދޯނިފަހަރުތައް އެތައް ދުވަހަކު ތިބެން ޖެހުމާއި، މަސްވެރިންނަށް އައިސް ލިބުމުގައި ހުރި ދަތިތަކަކީ ކޮންމެ ސަރުކާރެއްގައި މަސްވެރިންގެ ފަރާތުން އިވޭ ޝަކުވާތަކެވެ.
