ޕްރޮސެކިއުޓާ ޖެނެރަލް ހުސެއިން ޝަމީމަށް މިއަދު މަރުތޭލަކުން މީހަކު ހަމަލާދިނީ ސިޔާސީ މަގުސަދެއްގައި ކަމަށް ކުރީގެ ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
ޝަމީމަށް ހަމަލާދިން މީހުން އިންސާފުގެ ކުރިމައްޗަށް ގެންނަން ވެސް އިދިކޮޅު އެމްޑީޕީގެ ރައީސް ސޯލިހު މިއަދު ސޯޝަލް މީޑިއާ ޕްލެޓްފޯމް އެކްސްގައި ކުރެއްވި ޕޯސްޓެއްގައި ވިދާޅުވި އެވެ.
"ޕްރޮސެކިއުޓާ ޖެނެރަލް ހުސެއިން ޝަމީމަށް ދިން އަނިޔާވެރި ހަމަލާ އަޅުގަނޑު ކުށްވެރި ކުރަން އަދި އޭނާއަށް އަވަސް ޝިފާއަކަށް އެދެން. ސިޔާސީ ގޮތުން ހިންގާ ޖަރީމާތަކަށް ޑިމޮކްރެޓިކް ވެއްޓެއްގައި ޖާގައެއް ނޯންނާނެ،" ސޯލިހު ވިދާޅުވި އެވެ.
ޝަމީމަށް ހަމަލާދިނީ އޭނާ ދިރިއުޅޭ ގެ ކައިރީގައި ސައިކަލު ޕާކު ކުރި ތަނުންނެވެ. ހަމަލާގެ ސަބަބުން ޝަމީމުގެ އަތުގައި ރެނދެއް ލާފައިވާ ކަމަށްވެ އެވެ. މީހަކު ހައްޔަރު ނުކުރި ނަމަވެސް އެ މައްސަލަ ފުލުހުން ދަނީ ތަހުގީގު ކުރަމުންނެވެ.
ޝަމީމަށް ދިން ހަމަލާ ކުރީގެ ރައީސް ސޯލިހު ކުށްވެރިކުރިއިރު އެމްޑީޕީން ވެސް ވަނީ އެ މައްސަލައިގައި ބަޔާނެއް ނެރަފަ އެވެ. އެ ޕާޓީން ބުނީ އެފަދަ ހަމަލާތައް ދެނީ ސަރުކާރުގެ ވެރިން ގޭންގުތަކާ އޮންނަ ގާތް ގުޅުމުގެ ސަބަބުން ކަމަށެވެ.
"ރައީސް ޑރ. [މުހައްމަދު] މުއިއްޒުގެ ސަރުކާރުގައި މިފަދަ އަނިޔާވެރި އަދި ދައުލަތުގެ އިސް މަގާމުތަކުގައި ތިއްބަވާ ފަރާތްތަކަށް ޖެހިލުމެއް ނެތި ހަމަލާތައް ދެވެނީ މި ސަރުކާރުގެ އިސްވެރިންނާއި ރާއްޖޭގައި ކުށްކުރާ ގްރޫޕްތަކާ އޮންނަ ގާތް ގުޅުންތަކާހުރެ އެ ކުށްކުރާ ގްރޫޕްތަކަށް މި ސަރުކާރުން ދޭ ހިމާޔަތުގެ ސަބަބުން ކަން މި ޕާޓީން ގަބޫލުކުރަން،" އެ ބަޔާނުގައި ބުނެފައިވެ އެވެ.
ޝަމީމަށް ހަމަލާދިން މައްސަލަ އިދިކޮޅު ދަ ޑިމޮކްރެޓްސްއިން ވަނީ ކުށްވެރިކޮށްފަ އެވެ. އެ ޕާޓީން އެކަން ސިފަ ކުރީ މުޅި ނިޒާމަށް ދިން ހަމަލާއެއްގެ ގޮތުގަ އެވެ.
