ފެނަކަ ކޯޕަރޭޝަނުގެ މަސައްކަތްތަކަށް ބޭނުންވާ އެކި އެކި ފަންނީ އެހީތެރިކަން ހޯދުމަށް ސްޓެލްކޯ އާއެކު އެެއްބަސްވުމެއްގައި ސޮއިކޮށްފި އެެވެ.
ސްޓެލްކޯ ހެޑް އޮފީހުގައި މިއަދު ކުރިއަށްދިޔަ ހާއްސަ ރަސްމިއްޔާތުގައި މި އެއްބަސްވުމުގައި ސޮއިކުރެއްވީ ފެނަކަ ކޯޕަރޭޝަނުގެ މެނޭޖިން ޑިރެކްޓަރު މުއާޒް މުހައްމަދު ރަޝީދު އާއި ސްޓެލްކޯގެ މެނޭޖިން ޑިރެކްޓަރު ހުސެން ފަހުމީ އެވެ.
މި އެއްބަސްވުމުގެ ދަށުން ސްޓެލްކޯއިން ފެނަކަ ކުންފުނީގެ މުވައްޒަފުންނަށް ބޭނުންވާ ފަންނީ ތަމްރީނުތައް ފޯރުކޮށްދޭނެ އެވެ. އަދި ފެނަކައިގެ ޖަނަރޭޓަރުތަކާއި ޕަމްޕުތައް ސާވިސް ކުރުމުގެ މަސައްކަތްވެސް ދެން ކުރާނީ ސްޓެލްކޯ އިންނެވެ. މީގެ ކުރިން ފެނަކައިން ޖަނަރޭޓަރުތައް ސާވިސްކުރަމުން އައީ މައިގަނޑުގޮތެއްގައި އަމިއްލަ ކުންފުނިތަކާއި ހަވާލުކޮށްގެންނެވެ.
ފެނަކައިގެ މެނޭޖިން ޑިރެކްޓަރު މުއާޒު ވިދާޅުވި ގޮތުަގައި އެގޮތަށް ޖަނަރޭޓަރުތަކާއި ޕަމްޕުތައް ސާވިސްކުރުމުން އެކުންފުނިން ބޭނުންވާ ފެންވަރަށް އެ ހިދުމަތް ނުލިބޭއިރު އެކަމަށް ކުންފުނިން ބޮޑު ހޭދައެއް ކުރަމުންދާ ކަމަށެވެ. އަދި ފެނަކަ އޮތް ދިމާވެފައިވާ މާލީ ދަތިކަން ފާހަގަކުރައްވަމުން މުއާޒު ވިދާޅުވީ މިދިޔަ އަހަރު އެކަނިވެސް ޖަނަރޭޓަރުތައް ސާވިސް ކުރަން 117 މިލިއަން ރުފިޔާ ހަރަދުކުރި ކަމަށެވެ.
"117 މިލިއަން ރުފިޔާ ސާވިސިން އަށް ހަރަދުކުރާއިރު އެކަށީގެންވާ ހިދުމަތެއް ނުލިބޭ ކަމުގެ ޝަކުވާ އަޅުގަނޑުމެންގެ ޓެކްނިކަލް ސްޓާފުންގެ ފަރާތުން އާދޭ. މިގޮތަށް ސާވިސް ކުރަން ސްޓެލްކޯ އާއި ހަވާލުކުރުމުން ހަރަދު ކުޑަވެފަ ލިބޭ ހިދުމަތަށް އަޅުގަނޑުމެންނަށް ބަރޯސާ ވެވޭނެ،" މުއާޒު ވިދާޅުވި އެވެ.
މުއާޒު ވިދާޅުވީ އަމިއްލަ ފަރާތްތަކާއި ހަވާލުކޮށްގެން އެކުންފުނީގެ ޖަނަރޭޓަރުތަކާއި ޕަމްޕުތައް ސާވިސްކޮށް ނިމިގެން ގެންނަ އިރު ކުރިން ހުންނަ ކޮންޑިޝަނުގައި އެތަކެތި ނުހުންނަކަމުގެ ޝަކުވާ ކުންފުނީގެ އެކި އެކި ބްރާންޗްތަކުންވެސް ލިބިފައިވާ ކަމަށެވެ.
ސްޓެލްކޯގެ މެނޭޖިން ޑިރެކްޓަރު ފަހުމީ ވިދާޅުވި ގޮތުގައި ފެނަކައިގެ ޖަނަރޭޓަރުތަކާއި ޕަމްޕުތައް ސާވިސްކުރުމުގެ ހިދުމަތަށް އެކުންފުނިން އެއްވެސް ފީއެއް ނުނަގާނެ އެވެ.
