ވެރިކަން ހިންގާ ޕީއެންސީ އަދި ޕީޕީއެމްއިން މިއަދު ބާއްވާ މަޖިލިސް ޕްރައިމަރީގެ އިންތިހާބުގައި ވޯޓުލެވޭ މީހުންގެ ދަފުތަރުގައި ރެއާ ހަމައަށް ވެސް އޮތް ބައެއް މީހުންގެ ނަންތައް ޕާޓީ އަދި ވޯޓާސް ލިސްޓުގައި ވެސް މިއަދު ނެތް އިރު، ދުވަހަކު ވެސް ޕާޓީއަށް ސޮއި ނުކުރާ އަދި އެ ޕާޓީގެ ދަފުތަރުގައި ވެސް ނެތް ބައެއް މީހުންގެ ނަން ވޯޓާސް ލިސްޓުގައި އޮތް ކަން ހާމަވެއްޖެ އެވެ.
"އަދަދު"އާ ވާހަކަ ދައްކަމުން މެދު ހެންވޭރު ދާއިރާގެ މީހަކު ބުނީ އޭނާގެ ނަން ރޭ ދަންވަރު ވެސް ޕާޓީ އަދި ވޯޓާސް ލިސްޓުގައި ވެސް ރޭ އޮތް ކަމަށާއި އެކަމަކު މިއަދު ވޯޓުލާން ދިޔައިރު ޕާޓީގައި ވެސް ވޯޓާސް ލިސްޓުގައި ވެސް އޭނާގެ ނަން ނެތް ކަމަށެވެ.
"ރޭ ދަންވަރު ވެސް އަޅުގަނޑު ބެލިއިރު ނަން އޮތް. މިއަދު ނެތް ޕާޓީ ލިސްޓަކު ވެސް. ބައިވަރު މީހުންގެ ނަން ނެތް. އަޅުގަނޑުމެން ބަލަހައްޓާ ބޮޑު ލިސްޓެއް އޮވޭ. އޭގައި ހިމެނޭ މަދު ބައެއްގެ ނަން މިއަދު އޮތީ،" މެދު ހެންވޭރަށް ނިސްބަތްވާ އަހުމަދު ޝާހީން މި ނޫހާ ވާހަކަ ދައްކަމުން ބުންޏެވެ.
އޭނާ ބުނީ ގާތްގަނޑަކަށް 329 މީހުންގެ ނަން މިއަދުގެ ވޯޓާސް ލިސްޓުގައި ނެތްކަން ފާހަގަ ކުރެވޭ ކަމަށެވެ.
ރެއާ ހަމައަށް ޕާޓީގެ ދަފުތަރު އަދި ވޯޓާސް ލިސްޓުގައި އޮތް ބައެއް މީހުންގެ ނަންތައް މިއަދު އެ ދެ ލިސްޓުގައި ވެސް ނެތް އިރު، އެއްވެސް އިރަކު ސިޔާސީ ޕާޓީއަކަށް ސޮއި ނުކުރާ ބައެއް މީހުންގެ ނަން މިއަދުގެ ވޯޓާސް ލިސްޓުގައި އެބަ އޮތެވެ.
އެގޮތުން ޕާޓީގެ ދަފުތަރުގައި ނަން ނެތް ނަމަވެސް ވޯޓާސް ލިސްޓުގައި ނަން އޮތް އެކަކީ، ޕީއެސްއެމްގެ އިސް މަގާމެއްގައި ހުންނެވި މުހައްމަދު އަފުޒަލް އެވެ. ސޯޝަލް މީޑިއާ ޕްލެޓްފޯމް އެކްސްގައި އޭނާ ވިދާޅުވެފައި އޮތީ އޭނާއަކީ ދުވަހަކު ވެސް ޕާޓީއަކަށް ސޮއިކޮށްފައިވާ މީހެއް ނޫން ކަމަށާއި އެކަމަކު މިއަދު ކުރިއަށްދާ އިންތިހާބުގެ ވޯޓާސް ލިސްޓުގައި އޭނާގެ ނަން އެބަ އޮތް ކަމަށެވެ.
"ދުވަހަކުވެސް ޕާޓީއަކަށް ވަންނަން ފޯމެއް ނުފުރަން. އީސީން ބުނީ ޕާޓީއެއްގަ ނެތޭ. އެކަމަކު ޕީޕީއެމް ޕްރައިމެރީގެ ލިސްޓްގައި ނަން އެބަ އޮތް، ވޯޓު ލާން ބަލާ ވެސް އަތުވެއްޖެ. މިކަހަލަ ބައިވަރު ވޯޓުލައިފި. ކިހިނެތް ހަދަންވީ ލަފައެެއް ބޭނުން،" ވޯޓާސް ލިސްޓުގެ ފޮޓޯއަކާއެކު އޭނާ އެކްސްގައި ލިޔެފައި އޮތެވެ.
އިލެކްޝަންސް ކޮމިޝަނުގެ ނައިބު ރައީސް އިސްމާއިލް ހަބީބް ވިދާޅުވީ، ޕާޓީތަކުގެ ދަފުތަރު މެނޭޖް ކުރަނީ ޕޯޓަލަކުން ކަމަށާއި އޭގެ ފުރިހަމަ އެކްސެސް އެ ޕާޓީއެއްގެ ރަޖިސްޓްރާއަށް އޮންނާނެ ކަމަށެވެ.
"ޕޯޓަލްގެ ފުލް އެކްސެސް އޮންނާނެ ޕާޓީގެ ރަޖިސްޓްރިއާއަށް. އެކަމަކު ހަމަ ހުރެފަ ސިޔާސީ ޕާޓީއަކުން ވަތްކެއް ނުކުރެވޭނެ. އެ ޕާޓީއެއްގެ އަސާސީ ގަވާއިދާ އެއްގޮތަށް ވަކި ކުރެވޭނީ،" ހަބީބު ވިދާޅުވި އެވެ.
ވޯޓާސް ލިސްޓުގައި މައްސަލަ އުޅޭތީ ވޯޓުލާ ބައެއް މަރުކަޒުތަކުގައި މިއަދު ހަމަނުޖެހުން ވެސް ހިނގި އެވެ. އެގޮތުން ކަލާފާނު ސްކޫލުގައި ބަހައްޓާފައި ހުރި ދެ ވޯޓު ފޮއްޓެއް ބަޔަކު ވަނީ އެއްލާލައިފަ އެވެ. އެ މަރުކަޒުގެ އަމަން ގާއިމް ކުރަންޖެހުނީ ފުލުހުން ގޮސްގެނެވެ.
މިއަދު ކުރިއަށްދާ އިންތިހާބުގައި ޖުމްލަ 227 ވޯޓު ފޮށި ބަހައްޓައި ވޯޓުލުން ކުރިއަށްދާއިރު، 283 ކެންޑިޑޭޓުން ވާދަކުރެ އެވެ.
މާލެ ސަރަހައްދުގައި މި އިންތިހާބުގެ ވޯޓުލުުން ކުރިއަށް ގެންދާނީ ހަތް ސަރަހައްދެއްގަ އެވެ. އެއީ ހެންވޭރު ދަނޑު، ކަލާފާނު ސްކޫލް، ޖަމާލުއްދީން ސްކޫލް، ތާޖުއްދީން ސްކޫލް، ވިލިމާލެ ޔޫތް ސެންޓަރ، ކާމިލްދީދީ ސްކޫލް، ރެހެންދި ސްކޫލް އެވެ. މީގެ ތެރެއިން މާލޭގައި ދިރިއުޅޭ އަތޮޅުތެރޭ މީހުން ވޯޓުލާނީ ހެންވޭރު ދަނޑުގައި ބަހައްޓާ ވޯޓު ފޮއްޓަށެވެ.
ޖުމްލަ 73 ދާއިރާއަކަށް ވާދަކުރާ ކެންޑިޑޭޓުން މި އިންތިހާބުގައި ހޮވާއިރު، ވޯޓުލުމުގެ ހައްގު ލިބޭ 71،597 މީހުން ތިބިކަމަަށް ޕީޕީއެމުން ވަނީ ހާމަކޮށްފަ އެވެ.
ޕްރައިމަރީ އަކާ ނުލައި 13 މީހަކަށް އެ ކޯލިޝަންގެ ޓިކެޓު އޮތީ ކަށަވަރު ވެފަ އެވެ. މި 13 މީހުންނަށް ޓިކެޓު ކަށަވަރުވީ އެ މީހުން ކުރިމަތިލީ ދާއިރާތަކަށް އިތުރު މީހަކު ކުރިމަތިލާފައި ނުވާތީ އެވެ.
