މާލެ އާއި ރަސްމާލެ ކަނޑުއަޑީގެ މަންޒަރުތައް ފެންނާ ޓަނަލަކުން ގުޅާލަން ނިންމައި އެކަމަށް ބޭނުންވާ ދިރާސާތައް ހެދުމުގެ މަސައްކަތް ފަށާފައިވާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވުުމުން އިދިކޮޅު އެމްޑީޕީން ރޭ ފާޑުކިޔައިފި އެވެ.
މާލެ-ރަސްމާލެ ކަނޑުއަޑީގެ ޓަނަލް ރައީސް އިއުލާންކުރެއްވީ މާލެ ސިޓީގެ މޭޔަރު އަލީ އާޒިމް އާއި ކައުންސިލް މެމްބަރުން ހުވާކުރައްވަން ބޭއްވި ރަސްމިއްޔާތުގަ އެވެ. އެ ރަސްމިއްޔާތުގައި ރައީސް ވިދާޅުވީ މި ޓަނަލް ގާއިމުކުރުމުގެ ގާބިލްކަން ހުރި ކުންފުނިތަކާ މަޝްވަރާކޮށް އޭގެ ފީޒިބިލިޓީގެ މަސައްކަތް ވެސް މިހާރު ހިނގަމުންދާ ކަމަށެވެ.
"އެ ޓަނަލް ވެގެންދާނީ އެ ޓަނަލްގައި ދުއްވާ ޓްރެއިން (ރޭލު) ގައި ދާއިރުގައި ކަނޑު އަޑީގެ ރީތި މަންޒަރުތައް ވެސް ފެންނަ ޓަނަލަކަށް، އެތައް މިލިއަން ޓުއަރިސްޓުން އިތުރު ވެގެން ދާނެ މަޝްރޫއަކަށް، އަޅުގަނޑުމެން ގެންދާނީ ފޭރާން ހެޔޮ ސިޔާސަތެއް،" ރައީސް މުއިއްޒު ވިދާޅުވެފައިވެ އެވެ.
މިކަމަށް ފާޑުކިޔަމުން، އެމްޑީޕީ ހަރުގޭގައި ބޭއްވި ޖަލްސާއެއްގައި ވާހަކަ ދެއްކި އެ ޕާޓީގެ މެމްބަރުން، ކުރިން އެއްވެސް ޕްލޭނެއް ކުރެވިފައި ނެތް މަޝްރޫއެއް އިއުލާންކުރީ ނުވާނެ ކަމެއް ކަން އެނގިހުރެ ކަމަށް ބުނެ ރައީސްގެ ޓަނަލް ތަސައްވުރަށް ހަޖޫޖަހާފަ އެވެ.
އޭގެން އެއް ބޭފުޅަކީ އެމްޑީޕީގެ ކުރިގެ ރައީސް ޑރ. އިބްރާހިމް ދީދީ އެވެ. އޭނާގެ މައްސަލައަކަށްވީ ޓަނަލްގެ ވާހަކަ ދެއްކެވިިއިރު ޓަނަލް އަޅާނެ ގޮތެއް ނުވަތަ އެކަން ކުރަން ބޭނުންވާ ފައިސާ ހޯދާނެ ގޮތެއް ރައީސް ހާމަނުކުރައްވާތީ އެވެ. މި މޭރުމުން ވާހަކަދެއްކެވި އަނެއް ބޭފުޅަކީ އެމްޑީޕީގެ ޑެޕިއުޓީ ޗެއާޕާސަން އިބްރާހިމް ވަހީދު (އިބުރޭ) އެވެ. ރައީސްއަށް ބަހުގެ ހަމަލާތަކެއް އަމާޒުކުރައްވަމުން އިބުރޭ ވިދާޅުވީ އެމަނިކުފާނަކީ އެއްވެސް ރޭވުންތެރި ކަަމެއް ހުންނެވި ބޭފުޅެއް ނޫން ކަމަށެވެ.
"ޗެއާޕާސަން (ފައްޔާޒް) ޓަނަލްއެއް އެޅިދާނޭ ވިދާޅުވީމަ އަނެއް ދުވަހު މި ވިދާޅުވަނީ ތިމަންނާމެން ޓަނަލްއެއް އަޅާނަމޭ، މިއީ އެއްގޮތަކަށް ވެސް ރޭވިފައި އޮތް ކަމެއް ނޫން، އެހެން ނޫންނަމަ، ބިންގާ އެޅި ދުވަހު ވެސް ބުނަންވީ ނޫންތޯ އަޅާނީ ޓަނަލްއެކޭ،" އިބުރޭ ވިދާޅުވި އެވެ.
"ބިންގާ އެޅި ދުވަހު މި ބުނަނީ ތިމަންނާމެން ދުއްވާނީ އުޑަކު ނުޖެހި ބިމަކު ނުޖެހި ލޮނަކު ނުޖެހި ދުއްވާފަ ދާ ފެރީއެކޭ ތިމަންނަ ގެންގުޅޭނީ،"
ޓަނަލް އެޅުމުގެ ވާހަކައަކީ ކުރިއަށް އޮތް އިންތިހާބަށް ޖަހާ މަޅިއެއް ކަމަށާއި މި މަޅީގައި ނުޖެހުމަށް އބްރޭ ގޮވާލެއްވި އެވެ. އަދި މިއީ ހުސް "ހޮޅި" ވާހަކަކަމަށް ވިދާޅުވެ ރައީސްގެ ވާހަކަތަކަށް އިޖާބުނުދޭން ރައްޔިތުންގެ ކިބައިން އޭނާ އެދިފައިވެ އެވެ.
"ހޮޅި މުއިއްޒު"އަކީ އިދިކޮޅުން ރައީސްއަށް ނިސްބަތްކޮށް މަލާމާތްކުރަން ބޭނުންކުރާ ވަނަމެކެވެ.
