ރައްޔިތުންގެ މަޖިލީހުގެ އިންތިހާބު ރޯދަ މަހުގެ ފަހުން ބޭއްވުމަށް ގާނޫނަށް ގެންނަަޖެހޭ ބަދަލާއި މަޖިލީހުން ނިންމަން ހުރި އެހެން ބައެއް މަސައްކަތްތައް އަވަސްކުރުމަށް ދައުރުން ބޭރު ޖަލްސާތަކެއް ބާއްވަން މަޖިލީހުގައި ތަމްސީލުކުރާ ޕާޓީތަކުން މަޝްވަރާ ކުރަން ފަށައިފި އެވެ.
ރައްޔިތުންގެ މަޖިލީހުގައި މެޖޯރިޓީ އޮންނަ އެމްޑީޕީގެ މެމްބަރަކު "އަދަދު" އަށް ވިދާޅުވި ގޮތުގައި ދައުރުން ބޭރު ޖަލްސާތަކެއް ބާއްވަން އެޕާޓީގެ ޕާލަމެންޓްރީ ގްރޫޕުގައި ރޭ މަޝްވަރާކުރި އެވެ. އޭނާ ވިދާޅުވި ގޮތުގައި ދައުރުން ބޭރު ޖަލްސާތަކެއް ބާއްވަނީ މަޖިލީހުގެ އިންތިހާބު ރޯދައިގެ ފަހަށް ބަދަލުކުރުމާއި ވަޒީރުންނަށް ރުހުން ދިނުން އަދި ބައެއް އެހެން މަސައްކަތްތައް އަވަސްކުރުމަށެވެ.
މަޖިލީހުގެ މިއަހަރުގެ ފުރަތަމަ ދައުރު ފަށާނީ ފެބްރުއަރީ 5، ގަ އެވެ. ރައްޔިތުންގެ މަޖިލީހުގެ އިންތިހާބު މިހާރު ތާވަލުކޮށްފައި އޮތީ މާޗް 17، އަށެވެ. އެއީ ރޯދަމަހުގެ ހަތް ވަނަ ދުވަހެވެ.
އެކަން ބަދަލުކުރުމަށް ޓަކައި އިހަވަންދޫ ދާއިރާގެ އެމްޑީޕީ މެމްބަރު މުހައްމަދު ޝިފާއު މިއަދު ވަނީ ހުށަހަޅުއްވައިފަ އެވެ. އިންތިހާބުތަކާ ބެހޭ އާންމު ގާނޫނަށް، ރޯދަ މަހު އިންތިހާބުތައް ބޭއްވުން މަނާކުރާ މާއްދާ ހިމެނޭހެން 20 މާއްދާ އިސްލާހުކުރަން އޭނާ ވަނީ ހުށަހަޅާފަ އެވެ.
އެގޮތުން ވޯޓު ނަގާ ދުވަހާއި ވަގުތާ ގުޅޭ މާއްދާއަށް ހުށަހަޅާފައިވާ އިސްލާހުގައި ވަނީ ރޯދަ މަހުގެ އެއްވެސް ދުވަހެއްގައި އެއްވެސް އިންތިހާބެއް ބާއްވައިގެން ނުވާނެ ކަމަށެވެ. މެމްބަރު ޝިފާއު މި މާއްދާ އިސްލާހުކުރަން ހުށަހެޅި ގޮތަކީ އިންތިހާބު ބާއްވަން ޖެހޭ ތާރީހު ރޯދަ މަހުގެ ދުވަހަކާ ދިމާވާނަމަ އެ އިންތިހާބެއް ބާއްވަން ޖެހޭނީ ރޯދަ މަސް ނިމޭތާ 10 ދުވަސް ފަހުންނެވެ.
އެ އިސްލާހު ހުށަހަޅާ ސަބަބެއް ކަމަށް މެމްބަރު ވިދާޅުވީ ރޯދަ މަހާ ގުޅިފައިވާ ދިވެހިންގެ ހާއްސަ އާދަކާދަތަކާއި އަދި ރޯދަ މަހާ ގުޅިގެން ދައުލަތުގެ މުވައްޒަފުންގެ ވަޒީފާ އަދާކުރުމުގައި ވެސް ގެންނަ ބަދަލުތަކާއި މިއެންމެހާ ކަމަކަށް ރިއާޔަތް ކުރުމުގެ ގޮތުންނާއި ވީހާ ގިނަ ބަޔަކުގެ ބައިވެރިވުން ހިމެނޭފަދަ އިންތިހާބެއްކަން އިތުރަށް ކަށަވަރުކޮށް ޔަގީންކުރުމުގެ ބޭނުމުގައި ކަމަށެވެ.
