މި ސަރުކާރުގެ ބޭފުޅުން އިދިކޮޅުގައި ތިއްބެވިއިރު ކުރިއަށްގެންދިޔަ "އިންޑިއާ އައުޓް" ކެމްޕޭން ހުއްޓުވުމަށް އަމާޒުކޮށް "އެކިއެކި ޝިއާރުތަކުގެ ދަށުން ވަކިވަކި ގައުމުތަކާ މެދު ނަފުރަތު އުފެއްދުމަށް ރާވައިގެން ހިންގާ ހަރަކާތްތައް ހުއްޓުވުން" ނަމުގައި އޭރުގެ ރައީސުލްޖުމްހޫރިއްޔާ ނެރުއްވި ގަރާރު ބާތިލުނުކުރާތީ "އިންޑިއާ އައުޓް" ކެމްޕޭންގެ އެންމެ އިސްކޮށް ހުންނެވި ކުރީގެ ރައީސް އަބްދުالله ޔާމީން ނުރުހުން ފާޅުކުރައްވައިފި އެވެ.
"އިންޑިއާ އައުޓް" އެ ހަރަކާތަކީ އެއްވެސް ޖާއިޒު މަގުސަދެއް ނެތި ސިޔާސީ ބޭނުމެއްގައި ވަކި ގައުމަކާ ދެކޮޅަށް ރޭވިގެން ހިންގާ ކެމްޕޭނެއްގެ ގޮތުގައި ސިފަކޮށް އޭރުގެ ރައީސް އިބްރާހިމް މުހައްމަދު ސޯލިހު ސޮއިކުރައްވައި ރިޔާސީ ގަރާރެއް ނެރުއްވީ އެޕްރީލް 21, 2022 ގަ އެވެ.
ފްރަންޓް އޮފީސް ޖަލްސާގައި ވާހަކަ ދައްކަވަމުން ޔާމީން ވަނީ ޕޯޑިއަމަށް އެރުއްވި ބޭފުޅުންނަށް ސުވާލުތަކެއް އަމާޒުކުރައްވާފަ އެެވެ. އޭގެ ތެރެއިން ފުރުސަތެއްގައި ޔާމީން ވަނީ އެ ގަރާރު ބާތިލުނުކުރަނީ ކީއްވެގެންތޯ އައްސަވާފަ އެވެ. އަދި, ބާތިލުކޮށްފައި ނުވާތީ ނުރުހުން ވެސް ފާޅުކުރެއްވި އެވެ.
އެގޮތުން, އެ ހަރަކާތް ފަށަން ޖެހުނީ ކަންބޮޑުވުންްތަކެއް ހުރުމުން ކަމަށާއި އެކަމުގެ ތެރެއިން އެކަށީގެންވާ މަސައްކަތްތަކެއް ކުރެވުނު ކަމަށް ގަބޫލުކުރެއްވޭ ކަމަށް ޔާމީން ވިދާޅުވި އެވެ. ނަމަވެސް, އޭރުގެ ރައީސް ނެރުއްވި ގަރާރަކާ އެކު އެކަން ހުއްޓުވޭ ގޮތަށް ހެދިކަމަށާއި ހަރަކާތްތައް މަޑުޖައްސާލީ ސަލާމާތި ބާރުތަކާ ހަމަނުޖެހުމަކަށް ދާން ބޭނުން ނުވާތީ ކަމަށް އެމަނިކުފާނު ވިދާޅުވި އެވެ.
"ކީއްވެގެންތޯ މި ސަރުކާރަށް ޖަސްޓް ސްޓްރޯކް އޮފް ޕެން (އެންމެ ސޮޔަކުން) އެ ގަރާރު ބާތިލުކޮށް ނުލެވިގެން މި އުޅެނީ. ބާތިލު ކުރީމަ ދެއްތޯ މާދަމާ ވެސް އަޅުގަނޑު ގޭގައި ހަމަ އިންޑިއާ އައުޓްގެ ބެނާ ވެސް ހުންނާނީ. އަދި އިންޑިއާ އައުޓް މަސައްކަތުގައި މަގުމައްޗަށް ވެސް ނުކުމެވޭނީ. އެކަމު އަދިވެސް އެ ގަރާރު ބާތިލެއް ނުކުރޭ," ނުރުހުންވެވަޑައިގެން ހުރެ ވާހަކަ ދައްވަކަވމުން ޔާމީން ވިދާޅުވި އެވެ.
ކުރީގެ ރައީސް ސޯލިހު ނެރުއްވި ގަރާރުގައި އެ ހަރަކާތް ހުއްޓުވުމަށް ދައުލަތުގެ އިދާރާތަކަށް އަންގާފައި އޮތްއިރު އެއާ އެކު ކޯޓު އަމުރެއްގެ ދަށުން މާލޭގެ އެކި އިމާރާތްތަކުގައި ދަމާފައި ހުރި "އިންޑިއާ އައުޓް" ބެނާތަކެއް ވެސް ފުލުހުން ނެގި އެވެ. އޭގެ ތެރެއިން ޔާމީންގެ ގޭގައި ނަގާފައި ހުރި ބެނާ ވެސް ސަރުކާރުން ނެގި އެވެ.
އެމްޑީޕީގެ ސަރުކާރުގެ ވާދަވެރިންގެ ގޮތުން އިދިކޮޅުގެ ތިބެ މަގުމަތީގައި އިހުތިޖާޖު ކުރީ އެ ގަރާރު ގޯސްކަމަށް ބުނަމުން ކަމަށާއި އަދި އިންޑިއާ އައުޓް ހަރަކާތް ހުއްޓުވަން ސަރުކާރުން މަސައްކަތް ކުރުން ވެސް އިހުތިޖާޖުގެ ސަބަބަކަށް ވެގެންދިޔަ ކަމަށް ޔާމީން ވިދާޅުވި އެވެ.
"އެކަމަކު މިކަންކަމަށް ގޮވެލިފަތި ގޮވަމުން އައި ސަރުކާރެއް އަދިވެސް މި އުޅެނީ އެ ބާތިލުކޮށްނުލައިގެން. ކޮބައިތޯ މީގެ ސިއްރަކީ," ޔާމީން ސުވާލު ކުރެއްވި އެވެ.
ސަރުކާރުން އެންމެ ފަހުން ގަރާރާ ގުޅޭގޮތުން ހާމަކޮށްފައިވާ ގޮތުގައި ގާނޫނީ ގޮތުން ކުރަންޖެހޭ ދިރާސާތަކުގެ މަސައްކަތް ކުރިއަށްދެ އެވެ. ގަރާރު ބާތިލުކުރުމުގެ މަސައްކަތް ކުރިއަށްދޭތޯ އެހުމުން ސަރުކާރުން ބުނެފައި ވަނީ ދިރާސާ ކުރަމުންދަނީ "ވަކި ނިޔަތެއް އޮވެގެން ނޫން," ކަމަށެވެ.
އެ ގަރާރު ނެރުނު ދުވަހު މިހާރުގެ ރައީސް ޑރ. މުހައްމަދު މުއިއްޒު އާއި އެމަނިކުފާނުގެ ހާއްސަ އެޑްވައިޒަރު އަބްދުރަހީމް އަބްދުالله އާއި ޑިފެންސް މިނިސްޓަރު ގައްސާން މައުމޫން އަދި ލޯކަލް ގަވަމެންޓު މިނިސްޓަރު އާދަމް ޝަރީފް ނޫސްވެރިންނާ ބައްދަލުކުރެއްވި އެވެ.
އޭރު އިދިކޮޅުގައި ތިއްބެވި މިހާރު ސަރުކާރުގެ ބޭފުޅުން އެ ގަރާރު ގާނޫނާ ހިލާފު ކަމަށް ގަބޫލުކުރެއްވީ، އެ ގަރާރުގެ ސަބަބުން ގާނޫނު އަސާސީން ކަށަވަރުކޮށްދީފައިވާ ހިޔާލު ފާޅު ކުރުމާއި އެއްވެ އުޅުމުގެ މިނިވަން ކަމާއި ސިޔާސީ ހަރަކާތް ހިންގުމުގެ ހައްގު ހަނި ކުރެވިގެންދާތީ ކަމަށް ބުނެ އެވެ.
