ރައީސުލްޖުމްހޫރިއްޔާ ޑރ. މުހައްމަދު މުއިއްޒު ޗައިނާގެ ކޮމިއުނިސްޓު ޕާޓީގެ އިންޓަނޭޝަަނަލް ޑިޕާޓްމެންޓުގެ ވައިސް މިނިސްޓަރު ސުން ހައިޔާންއާ މިއަދު ރައީސް އޮފީހުގައި ބައްދަލުކުރައްވައިފި އެވެ.
ވެރިކަމާ ހަވާލުވެވަޑައިގަތުމަށް ފަހު ރައީސްގެ ފުރަތަމަ ސްޓޭޓް ވިޒިޓްގައި މި މަހުގެ ކުރީކޮޅު ވަޑައިގެންނެވީ ޗައިނާއަށެވެ. އެ ދަތުރުގައި ގިނަ އެއްބަސްވުންތަކެއް ދެ ގައުމުން ބަދަލުކުރި އެވެ.
ސުން ހައިޔާން އާއެކު ރައީސް ވަނީ އެ އެއްބަސްވުންތައް އަވަހަށް ތަންފީޒު ކުރެވޭނެ ގޮތްތަކެއް ހޯއްދެވުމަށް މަޝްވަރާ ކުރައްވާފަ އެވެ. ޗައިނާގެ ރައީސް ޝީ ޖިންޕިންގެ ލީޑާޝިޕްގެ ދަށުން އެ ގައުމުގެ ހުރިހާ އިދާރާތަކުން ވެސް އެ އެއްބަސްވުންތަކާ ގުޅޭ ގޮތުން ހަލުވި މަސައްކަތްތަކެއް ކުރައްވާނެ ކަމުގެ ޔަގީންކަން އޭނާ ދެއްވި އެވެ.
އޭގެ އިތުރުން ވެސް ދެ ގައުމުގެ ގުޅުން ހަރުދަނާކޮށް އިތުރު ތަމްރީނު ފުރުސަތުތައް ރާއްޖެއަށް ދިނުމުގެ ޝައުގު ވެސް އޭނާ ފާޅުކުރައްވި އެވެ.
ރައީސް މުއިއްޒު ވެސް ވަނީ ޗައިނާ ސަރުކާރުން ރާއްޖެއަށް ފޯރުކޮށްދެމުންދާ އެހީއަށް ޝުކުރު އަދާކުރައްވާފަ އެވެ. އަދި, ދެ ގައުމުގެ މެދުގައި ސޮއިކުރި އެއްބަސްވުންތައް ތަންފީޒު ކުރުން އަވަސްކުރަން ދިވެހި ސަރުކާރުން މަސައްކަތް ކުރައްވާނެ ކަމުގެ ޔަގީންކަން ރައީސް ދެއްވި އެވެ.
ޗައިނާ އާއި ރާއްޖެއާ ދެމެދު ކުރަމުންދާ ވައިގެ ދަތުރުތައް އިތުރުކުރުމަށާއި ދެ ގައުމުގެ ސިޓީތަކުގެ މެދުގައި އިތުރަށް ގުޅުން ބަދަހިކުރަން ވެސް ދެ ބޭފުޅުން މަޝްވަރާާ ކުރެއްވި އެވެ.
ރައީސްގެ އަރިހުގައި އެމަނިކުފާނުގެ ކެބިނެޓުގައި ހިމެނިވަޑައިގަންނަވާ އިސް ވަޒީރުން މި ބައްދަލުވުމުގައި ބައިވެރިވެވަޑައިގެންނެވި އެވެ.
އެގޮތުން, ސްޕެޝަލް އެޑްވައިޒަރު އަބްދުއްރަހީމް އަބްދުالله, ޑިފެންސް މިނިސްޓަރު ގައްސާން މައުމޫން, ފިޝަރީޒް މިނިސްޓަރު އަހްމަދު ޝިޔާމް, އިކޮނޮމިކް މިނިސްޓަރު އަހްމަދު ސައީދު, ލޯކަލް ގަވަމެންޓް މިނިސްޓަރު އާދަމް ޝަރީފް ހިމެނިވަޑައިގަންނަވަ އެވެ. މި ބޭފުޅުންނަކީ ޕީޕީއެމް/ޕީއެންސީގެ ލީޑާޝިޕްގައި ހިމެނިވަޑައިގަންނަވާ ބޭފުޅުންނެވެ.
އޭގެ އިތުރުން, ޗީފް އޮފް ސްޓާފް އަހްމަދު ފަޔާޒް އާއި ފޮރިން މިނިސްޓަރު މޫސާ ޒަމީރު ވެސް ކޮމިއުނިސްޓު ޕާޓީގެ ވަފުދާއެކު ބޭއްވި ބައްދަލުވުމުގައި ތިއްބެވި އެވެ.
