ޕާޓީ ތެރޭގައި ފިތުނަ އުފެއްދިކަމުގެ ތުހުމަތުކޮށް، ބައެއް މެންބަރުންނަށް ރައްޔިތުން މަޖިލީހުގެ ޕްރައިމަރީގައި ވާދަ ކުރަން ފުރުސަތު ނުދިނުމުން ވެރިކަން ހިންގާ ޕީޕަލްސް ނެޝަނަލް ކޮންގްރެސްގެ އޮފީހުގައި މިއަދު މަސްލަހަތު ގެއްލި، ބޮޑު ޒުވާބެއް ހިނގައިފި އެވެ.
ކެންޑިޑެސީ ބާތިލު ކުރި މައްސަލައިގައި މިއަދު ޕީއެންސީ އޮފީހަށް ބައެއް މެންބަރުން ދިޔުމުން އެތަނުގައި ޕާޓީގެ ނިންމުމަށް ތާއީދު ކުރާ މީހުންނާއި ކެންޑިޑެސީ ގެއްލުނު ކެންޑިޑޭޓުންނާ ދެމެދު ވަނީ ޒުވާބެއް ހިނގައިފަ އެވެ.
ވާދަ ކުރުމުގެ ފުރުސަތު ނުލިބުނު ބައެއް މެންބަރުންނާއި އެ މެންބަރުންނަށް ތާއީދު ކުރާ މީހުން ގޮސް ޕާޓިގެ އޮފީޝަލުން ކައިރީ ޝަކުވާ ކުރާ މަންޒަރު ފެންނަ ވީޑިއޯއެއް ސޯޝަލް މީޑިއާގައި ވެސް ދަނީ ދައުރުވަމުންނެވެ.
އަންނަ ހޮނިހިރު ދުވަހު ބާއްވަން ނިންމާފައިވާ ޕްރައިމަރީގައި ބައެއް ކެންޑިޑޭޓުންނަށް ވާދަ ކުރުމުގެ ފުރުސަތު ނުދޭން ޕީއެންސީން ނިންމީ ޕާޓީގެ ޕްރައިމަރީ ދެ ފަހަރަކަށް ފަސް ކުރުމަށްފަހެވެ.
މާޗް 17، ގައި ބާއްވާ ރައްޔިތުންގެ މަޖިލީހުގެ އިންތިހާބުގެ ޕްރައިމަރީގައި ބައިވެރިވުމުގެ ފުރުސަތު ޕީއެންސީ/ޕީޕީއެމް ކޯލިޝަނުގެ ބައެއް މެމްބަރުންނަށް ނުދިނީ، ޕީޕީއެމްގެ ބާނީ ކުރީގެ ރައީސް އަބްދުﷲ ޔާމީން އާއި މިހާރުގެ ރައީސް ޑރ. މުހައްމަދު މުއިއްޒާ މައްސަލަ ޖެހުނު ވަގުތު، ޔާމީންއަށް ތާއީދު ކުރި ކަމަށް ތުހުމަތުކޮށްފަ އެވެ.
"މި ކޯލިޝަނުން ރިޔާސީ އިންތިހާބު ކާމިޔާބު ކުރުމަށްފަހު ޕާޓީގެ އެތެރޭގައި އުފެދިގެންދިޔަ ޕާޓީގެ ސިޔާސަތުތަކާ އިދިކޮޅު އޮއިވަރުގައި ޖެހިވަޑައިގެން ޕާޓީގެ އާންމު މެމްބަރުންގެ މެދުގައި ފިތުނަ އުފެދޭ ގޮތަށް ބަޔަކު ކުރަމުންގެންދާ މަސައްކަތުގައި ބައިވެރިވެ، އެ ސިޔާސަތު ކުރިއެރުވުމުގެ މަސައްކަތްތަކެއް ކުރައްވާ، ޕާޓީގެ އެތެރޭގައި ބައިބައިވުން އުފެދޭ ގޮތަށް ކަންކަން ކުރައްވާފައިވާތީ ...،" ޕީއެންސީގެ ޗެއާޕާސަން އަދި ރައީސް އޮފީހުގެ އިސް ވަޒީރު އަބްދުއްރަހީމް އަބްދުﷲ ބައެއް މެމްބަރުންނަށް ފޮނުވި ސިޓީތަކުގައި ބުނެފައިވެ އެވެ.
ބައެއް އެހެން މެންބަރުން ކައިރީ ޕާޓީން ބުނީ ކެންޑިޑެސީ ބަލައިނުގަންނަން ނިންމީ ޕާޓީއަށް އެކަށީގެންވާ މިންވަރަކަށް ހިދުމަތްކޮށްދީފައި ނެތުމުން ކަމަށެވެ.
"ޕާޓީއަށް އެކަށީގެންވާ ހިދުމަތެއް ކޮށްދެއްވާފައިވާ ކަމަށް ނުފެންނާތީ، މަނިކުފާނުގެ ޝަރުތުތައް ފުރިހަމަނުވާ ކަމަށް ނިންމާފައިވާތީ، ކެންޑިޑެސީ ބަލައިގަނެވެން ނެތް ވާހަކަ ދެންނެވިން،" ބައެއް ސިޓީތަކުގައި ބުނެފައިވެ އެވެ.
ޕްރައިމަރީގައި ވާދަ ކުރުމުގެ ފުރުސަތު ނުދިނީ ކިތައް މެންބަރުންނަށް ކަމެއް ޕީއެންސީން ނުބުނެ އެވެ.
ކޮރަޕްޝަނުގެ މައްސަލައެއްގައި 11 އަހަރުގެ ޖަލު ހުކުމެއް ތަންފީޒު ކުރައްވަމުން ގެންދަވާ ޕީޕީއެމްގެ ކުރީގެ ރައީސް ޔާމީން އެ ޕާޓީން ވަކިވެވަޑައިގަތީ ނޮވެމްބަރު، 2023، ގަ އެވެ. އެއަށްފަހު ޔާމީންގެ އަރިސް ބޭފުޅުން ވިދާޅުވެފައި ވަނީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު، ޔާމީންއާ ގުޅުން ކަނޑާލާފައިވާ ކަމަށް ސަރުކާރުން ޕާޓީގެ ހަރަކާތްތައް ހުއްޓުވާފައިވާ ކަމަށެވެ.
އޭގެ ފަހުން ޕީޕަލް ނެޝަނަލް ފްރޮންޓުގެ ނަމުގައި ޕާޓީއެއް އުފެއްދުމުގެ މަސައްކަތް ޔާމީން ގެންދަވަނީ ކުރައްވަމުންނެވެ.
