މާލޭ ރައްޔިތުންނަށް ގޯތިދޭން ކުރީގެ ސަރުކާރުން ފެށި "ބިންވެރިޔާ" ސްކީމްގެ މަސައްކަތް ހުއްޓައިނުލާ ކުރިއަށް ގެންދާކަމުގެ ޔަގީންކަން ސަރުކާރުން މިރޭ ދީފި އެވެ.
މާލޭ ރައްޔިތުން ހިންގާ ތަފާތު ތިން ޖަމިއްޔާއެއް ގުޅިގެން، ސަލްޓަން ޕާކްގައި މިރޭ ބޭއްވި " މާލޭ ބިންވެރިންގެ ސައްލާ" ގައި ރައީސް ޑރ.މުހައްމަދު މުއިއްޒުގެ މަންދޫބެއްގެ ހައިސިއްޔަތުން ރައީސް އޮފީހުގެ އަންޑަ ސެކްރެޓަރީ ފޯ ޕަބްލިކް ޕޮލިސީ މުހައްމަދު ފިރުޒުލް އަބްދުﷲ ހަލީލު ބައިވެރިވެވަޑައިގެންނެވި އެވެ. މާލޭ ރައްޔިތުންނަށް ގުޅިފަޅާއި ގިރާވަރު ފަޅު އަދި ހުޅުމާލޭން ދޫކުރަން ކުރީގެ ރައީސް އިބްރާހީމް މުހައްމަދު ސޯލިހުގެ ސަރުކާރުން ނިންމި ގޯތިތައް ހަވާލުނުކުރާތީ އާއްމުންގެ ބައެއް މީހުން އެ ބައްދަލުވުމުގައި ކަންބޮޑުވުން ފާޅުކުރުމުން އެ ބައްދަލުވުމުގައި ފިރުޒުލް ވިދާޅުވީ ގޯތިތަކާ ބެހޭ ހަތަރު މަސައްކަތެއް މިހާރު ވެސް ކުރިއަށްދާ ކަމުގެ ޔަގީންކަން ރައީސް ދެއްވާ ކަމަށެވެ.
އެ ހަތަރު ކަމަކީ އޭނާ ވިދާޅުވި ގޮތުގައި ގޯތިދޭން ކަނޑައެޅި ތަންތަނަށް ބިން އިތުރުކުރުމުގެ މަސައްކަތާއި އެތަންތަނުގެ އަސާސީ އިންފްރާސްޓްރަކްޗާ ގާއިމްކުރުން، ދަތުރުފަތުރުގެ ނިޒާމު ގާއިމްކުރުން އަދި ގޯތިތަކުގެ ރަޖިސްޓްރީ މީހުންނާ ހަވާލުކުރުމެވެ.
"މި ހަތަރު ކަންތައް އޭގެ ޒާތުގައި ހަަމަ ޔަގީނުން ވެސް އަޅުގަނޑުމެންނަށް ފަސޭހަކަމާ އެކު ކޮމިއުނީއެއްގެ ގޮތުގައި އެތަންތަނުގައި ދިރިއުޅެވޭނީ. ރައީސުލް ޖުމްހޫރިއްޔާ ދެއްވާ ޔަގީންކަމަކީ މި ހަތަރު މަސައްކަތް ވެސް އެކު އެކީގައި އެއްވެސް ހުއްޓުމެއް ނެތި ކުރިއަށް ދާކަމުގެ ޔަގީންކަން،" ފިރުޒުލް ވިދާޅުވި އެވެ.
އޭނާ ވިދާޅުވި ގޮތުގައި ގޯތިތައް ހިކެމުންދާ ވަރަކަށް ސަރުކާރުން ގެންދާނީ ރަޖިސްޓްރީތައް ދޫކުރަމުންނެވެ. އަދި ވަގުތީ ގޮތުން ލިއުމެއް ދެވެން އޮތް ފަރާތްތަކަށް އެފަދަ ލިއުމެއް ދޭނެ ކަމުގެ ޔަގީންކަން ރައީސް ދެއްވި ކަމަށް ވެސް އޭނާ ވިދާޅުވި އެވެ.
ގުޅިފަޅާއި ގިރާވަރުފަޅު އަދި ހުޅުމާލޭގެ ތިން ވަނަ ފިޔަވަހީގެ މަސައްކަތް މިހާރު ކުރިއަށް ގޮސްފައިވާ މިންވަރުގެ ތަފްސީލު ވެސް ފިރުޒުލް މިރޭ ދެއްވި އެވެ.
"ގިރާވަރުފަޅުން ގާތްގަނޑަކަށް 50 ނުވަތަ 54 ހެކްޓަރު ހިއްކައި ނިންމާފައި ވަނީ. ގުޅިފަޅުން ގާތްގަނޑަކަށް 94 ހެކްޓަރު ހިއްކާ ނިންމާފައި ވަނީ. ހުޅުމާލެ ފަޅުން ވެސް އަޅުގަނޑަށް މައުލޫމާތު ލިބިފައިވާ ގޮތުން މިހާރު ދެވަނަ ސެގްމެންޓް ހިއްކުމުގެ މަސައްކަތް ކުރިއަށް އެދަނީ،" އޭނާ ވިދާޅުވި އެވެ.
ގޯތިދޫކުރާ ސަރަހައްދުތައް ހިއްކުމުގެ އެއްވެސް މަސައްކަތެއް ނުހުއްޓޭ ކަމަށާއި އެތަންތަން ހިއްކަމުން އަންނަނީ ކުރިން ކަނޑައެޅި ވަރަށް ވުރެ ބޮޑުކޮށް ކަމަށް ވެސް އޭނާ ވިދާޅުވި އެވެ.
