ކުރިއަށް އޮތް ރައްޔިތުންގެ މަޖިލީހުގެ އިންތިހާބުގެ ޕީޕީއެމް/ޕީއެންސީ ޕްރައިމަރީގައި ގަލޮޅު އުތުރު ދާއިރާއަށް ވާދަކުރައްވަން ނިންމެވީ ގަލޮޅުގެ އަޑު މަޖިލީހުގައި ފުރިހަމައަށް އިއްވުމަށް ކަމަށް އިޝާން އަލީ ވިދާޅުވެއްޖެ އެވެ.
"އަދަދު" އަށް ދެއްވި ހާއްސަ އިންޓަވިއުއެއްގައި އިޝާން ވިދާޅުވީ މަޖިލިސް މެންބަރުންގެ ގޮތުގައި މިހާރު ތިއްބެވި ބޭފުޅުންގެ ފަރާތުން ފެންނަނީ ރައްޔިތުންނަށް ހިދުމަތް ކުރުމުގެ ނިޔަތެއް އޮވެގެން މަސައްކަތް ކުރާތަން ނޫން ކަމަށެވެ.
"މަޖިލީހުގައި ރާއްޖެ މީހުންގެ، މާލެ މީހުންގެ އަޑު ހަމަ ވަރަށް ފަނޑުކޮށް އިވެނީ، އަބަދުވެސް އަޅުގަނޑުމެންނަށް ފެންނަނީ އެތަނުގައި އެ ބޭފުޅުންގެ ކޯޅުމެއްގެ ތެރޭގައި އުޅޭތަން، ފޯކަސް ގެއްލިފައި ތިބި ބައެއްގެ ގޮތުގައި އަޅުގަނޑަށް [މަޖިލިސް މެންބަރުން] ފެންނަނީ،" އިޝާން ވިދާޅުވި އެވެ.
އިޝާން ވިދަޅުވީ އަންނަ ހޮނިހިރު ދުވަހު އޮންނަ ޕްރައިމަރީގައި އޭނާއަށް ވޯޓު ދޭންޖެހޭ ސަބަބަކީ އޭނާއަކީ ރަައްޔިތުންގެ ހާދިމެއްގެ ގޮތުގައި ރައްޔިތުންގެ އަޑު މަޖިލީހުގައި އިއްވާނެ ކެންޑިޑޭޓަށް ވާތީ ކަމަށެވެ.
"އިޝާން މިއަންނަނީ ރައްޔިތުން ބާރުވެރި ކުރުމަށްޓަކައި، ރައްޔިތުންގެ މަޖިލީހުގައި ރައްޔިތުންނަށް ހިދުމަތް ކޮށްދިނުމުގެ ހެޔޮ ނިޔަތުގައި، ރައްޔިތުންގެ ހާދިމެއްގެ ގޮތުގައި ހިދުމަތް ކޮށްދިނުމުގެ ހެޔޮ ނިޔަތުގައި،" އިޝާން ވިދާޅުވި އެވެ.
ގަލޮޅު އައިނާ އެޑަމްސް، އިޝާން އަލީއަކީ 2008 ވަނަ އަހަރުން ފެށިގެން ސިޔާސީ މައިދާނުގައި ތަފާތު އެކި މަސައްކަތްތައް ކުރައްވަމުން ގެންދަވާ ބޭފުޅެކެވެ. އޭނާ އަކީ އިނގިރޭސިވިލާތުގެ އީސްޓް ލަންޑަން ޔުނިވަސިޓީން މާކެޓިން މެނޭޖްމަންޓްގެ ދާއިރާއިން މާސްޓާސް ހާސިލުކޮށްފައިވާ ބޭފުޅެކެވެ. އޭގެއިތުރުން އިޝާން ވަނީ މާސް ކޮމިއުނިކޭޝަންސްއާއި ޕަބްލިކް ރިލޭޝަންސްގެ ދާއިރާއިން ވެސް މަތީ ތައުލީމު ހާސިލުކޮށްފަ އެވެ.
