ކުރީ ސަރުކާރުން ހިންގި ބޯހިޔާވަހިކަމުގެ ސްކީމުގެ ދަށުން ފްލެޓު ލިބުނު މީހުން އެންޓި ކޮރަޕްޝަން ކޮމިޝަނަށް ގޮސް މުޒާހަރާ ކުރަން ފެށުމުން ރަޔަޓް ފުލުހުންގެ ޓީމެއް ގޮސް މުޒާހަރާގެ ބައިވެރިން އެތަނުން ނެރެލައިފި އެވެ.
ބޯހިޔާވަހިިކަމުގެ ސްކީމެއްގެ ދަށުން ކުރީ ސަރުކާރުގައި 4000 ދޫކުރި ނަމަވެސް އެކަމުގައި ކޮރަޕްޝަން އެކުލެވޭ ކަމަށް ބުނެ އޭސީސީން ދަނީ އެ މައްސަލަ ބަލަމުންނެވެ. މައްސަލަ ބަލައި ނިމުމުން ނޫނީ އެއްވެސް ފްލެޓެއް ދޫނުކުރަން ކޮމިޝަނުން އޮތީ ހައުސިން މިނިސްޓްރީއަށް އަންގައިފަ އެވެ.
"އަހަރުމެން ޑިމާންޑު ކުރީ މައްސަލަ ބަލައި ނިމޭނެ ތާރީހެއް ދޭށޭ. ހެނދުނު 10:30 ގައި ދިޔައީ. 2:30 ގަ ވެސް އެއްވެސް ޖަވާބެއް ނުދިން. ދެން ފުލުހުން އައިސް އަހަރުމެން ގަދަކަމުން ގެންދިޔައީ،" ފްލެޓު މައްސަލައިގައި ވަކާލާތު ކުރާ އިސްމާއިލް ނާއިފް ބުންޏެވެ.
މިއަދު އޭސީސީއަށް ދިޔަ 30 ވަރަކަށް މީހުންގެ ތެރެއިން ގިނައީ އަންހެނުންނެވެ. ފުލުހުން އެމީހުން ބޭރު ކުރަން އުޅުނު ވަގުތު ދެ މީހަކަށް ހާނީއްކަވި ކަމަށް އިސްމާއިލް ބުންޏެވެ. ނަމަވެސް އެކަކަށް ވެސް ބޮޑު ގެއްލުމެއް ނުވާ ކަމަށް އޭނާ ބުންޏެވެ.
ފްލެޓު މައްސަލައިގައި މުޒާހަރާ ކުރާ މީހުން ކައިރި އޭސީސީން މިދިޔަ ހަފުތާގައި ބުނީ ފްލެޓު މައްސަލައިގެ 96 ޕަސެންޓު މިހާރު ބަލައި ނިމިފައިވާ ކަމަށެވެ. ނަމަވެސް އެ މައްސަލަ އެއްކޮށް ބަލައި ނިމޭނެ ތާރީހެއް މިއަދު ވެސް އޭސީސީއަކުން ނުދެ އެވެ.
އޭސީސީން ފްލެޓުތަކުގެ މައްސަލަ ބަލަމުންދާއިރު، މީގެ ކުރިން މުޒާހަރާގެ ބައިވެރިން އެ އޮފީހަށް ދިޔުމުން ދެ ހަފުތާގެ ތެރޭގައި ފްލެޓާއި ގޯތީގެ ރަޖިސްޓްރީ ދޫކުރައްވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވި އެެވެ. ނަމަވެސް ދޫކުރަން ވިދާޅުވި ތާރީހު މިދިޔަ ހަފުތާގައި ވަނީ ހަމަވެފަ އެވެ.
"ގޯތި އަދި ފްލެޓު ލިބޭނެ ކަމަށް ފައިނަލް ލިސްޓުގައި ހިމެނި ގެޒެޓުކޮށްފައިވާ ފަރާތްތަކަށް ރަޖިސްޓްރީ ހަދައިދީ ގޯތި/ފްލެޓު ހަވާލު ކުރުމަކީ އަޅުގަޑު ވައުދުވީ ގޮތަށް ކުރިއަށް ދާނެ ކަމެއް. މި ހަފުތާ އާއި މި އަންނަ ހަފުތާ ތެރޭ ރަޖިސްޓްރީ ހަވާލުކޮށް ނިންމުމުގެ މަސައްކަތް ހައުސިން މިނިސްޓްރީ އިން ކުރިއަށް ގެންދާނެ،" ޖެނުއަރީ 2، ގެ މެންދުރު 2:29 ގައި ރައީސް މުއިއްޒު އެކްސްގައި ލިޔުއްވާފައިވެ އެވެ.
ބޯހިޔާވަހިކަމުގެ ސްކީމުގެ ދަށުން ދޫކުރި ފްލެޓާއި ގޯތިތައް ދޫކުރުމަކީ ރައީސް މުއިއްޒުގެ ރިޔާސީ ވައުދެކެވެ.
"ރަސްމީކޮށް ގެެޒެޓްކޮށްފައި އޮވެއްޖެއްޔާ އެމީހާއަށް އެއޮތީ [ފްލެޓް ނުވަތަ ގޯތި] ލިބިފައި. އަދި ލިޔުން ނުލިބިވެސް ހުރެދާނެ ބައެއް ފަރާތްތަކަށް، ރަޖިސްޓްރީ ނުހެދި ވެސް ހުރެދާނެ. އެއީ އަދި އެހެން ކަމެއް، އެެހެންވީމާ ފައިނަލް ލިސްޓެއް ގެޒެޓްކުރެވިފައި އޮވެއްޖެއްޔާ އެއޮތީ ސަރުކާރުގެ ނިންމުމެއް. ދެން ސަރުކާރުގެ ނިންމުމެއް އޮވެއްޖެއްޔާ ލިބޭނެ،" ޑިސެމްބަރު 5، ގައި ވެސް ރައީސް ވިދާޅުވި އެވެ.
