ރައީސުލްޖުމްހޫރިއްޔާ, ރިޔާސީ ބަޔާން އިއްވާ ދުވަހަކީ ސަރުކާރު ބަންދު ދުވަހެއް ނޫން ކަމަށް ނިންމައިފި އެވެ.
ރިޔާސީ ބޔާން އިއްވަ ދުވަހަކީ ކުރިއްސުރެ ބަންދު ދުވަހެއްގެ ގޮތުގައި އޮތް އޮތުން ނިމުމަކަށް ގެންނެވީ ކުރީގެ ރައީސް އަބްދުﷲ ޔާމީނުގެ ވެރިކަމުގައި 2014 ގަ އެވެ. އޭގެ ފަހުން އެ ދުވަސް ސަރުކާރު ބަންދު ދުވަހެއްގެ ގޮތުގައި އަލުން ކަނޑައެޅުއްވީ ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަމުގައި 2019 ވަނަ އަހަރު, އެމަނިކުފާނުގެ ދެންނެވުމަކުންނެވެ.
ރައީސް ސޯލިހުގެ ވެރިކަމުގައި ރިޔާސީ ބަޔާން އިއްވި ހުރިހާ ދުވަހެއް ވެސް ވަނީ ސަރުކާރު ބަންދުކޮށްފަ އެވެ.
"ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީގެ 84 ވަނަ މާއްދާގައިވާ ގޮތުގެމަތިން، ކޮންމެ އަހަރަކު ރައްޔިތުންގެ މަޖިލީހަށް ރައީސުލްޖުމްހޫރިއްޔާ ރިޔާސީ ބަޔާން އިއްވަވާ ދުވަހަކީ، މީގެފަހުން ސަރުކާރު ބަންދު ނޫން ދުވަހެއްގެގޮތުގައި ހަމަޖައްސަވައިފިކަމުގައި ދަންނަވަން ރައީސުލްޖުމްހޫރިއްޔާ ވިދާޅުވި" އެ ނިންމުން ބަދަލުކޮށް މިއަދު ރައީސް އޮފީހުން ނެރުނު ދެންނެވުމުގައި ވެ އެވެ.
ރައީސް ޑރ. މުހައްމަދު މުއިއްޒުގެ ފުރަތަމަ ރިޔާސީ ބަޔާން އިއްވަވާ ދުވަހެއްގެ ގޮތުގައު ތާވަލުކޮށްފައި ވަނީ ފެބްރުއަރީ ފަސް ވަނަ ދުވަހު އެވެ.
ރައްޔިތުންގެ މަޖިލީހުގެ އިދާރާއިން ބުނީ މި އަހަރުގެ ފުރަތަމަ ދައުރުގެ ޖަލްސާ އޮންނާނީ ފެބްރުއަރީ މަހު ފަސްވަނަ ދުވަހު ކަމަށެވެ. ރައްޔިތުންގެ މަޖިލީހުގެ ރައީސް މުހައްމަދު އަސްލަމް ނިންމަވާފައިވަނީ އެ ދުވަހު ހެނދުނު 9:00 ޖަހާއިރު ޖަލްސާ ބޭއްވުމަށް ކަމަށް އެ އިދާރާއިން ބުންޏެވެ.
ގާނޫނު އަސާސީގައި ބުނަނީ ކޮންމެ އަހަރެއްގެ ރައްޔިތުންގެ މަޖިލީސް ހުޅުވާ ޖަލްސާގައި ރައީސުލްޖުމްހޫރިއްޔާ ބަޔާނެއް އިއްވަވަން ޖެހެ އެވެ. އެ ރިޔާސީ ބަޔާނުގައި ގައުމުގެ އޭރުގެ ހާލަތު ބަޔާންކޮށްދީ، އިތުރަށް ރަނގަޅު ކުރުމަށް އެ އަހަރު ދުވަހަށް ރައީސް ކުރައްވަވަން ރާވާފައިވާ ކަންކަން މަޖިލީހަށް އިއްވަވަން ޖެހެ އެވެ.
ނޮވެމްބަރު 17، ގައި ރައީސުލްޖުމްހޫރިއްޔާގެ މަގާމާ ހަވާލުވެވަޑައިގަތުމަށް ފަހު ރައީސް މުއިއްޒު އެމަނިކުފާނު ރިޔާސީ ބަޔާން އިއްވަވާ ފުރަތަމަ ޖަލްސާއަކަށް ވާނީ އެ ޖަލްސާ އެވެ.
