ވެލާނާ އިންޓަނޭޝަނަލް އެއާޕޯޓުގެ އާ ކާގޯ ޓާމިނަލްގެ މަސައްކަތް 2022 ވަނަ އަހަރު ނިމުނު ނަމަވެސް އެތަން ބޭނުންނުކޮށް އޮތީ ކުރިން އެކަމަށް އިސްކަން ނުދިނުމުން ކަމަށް އެމްއޭސީއެލްގެ ސީއީއޯ އަދި މެނޭޖިން ޑިރެކްޓަރު އިބްރާހިމް ޝަރީފް މުހައްމަދު މިއަދު ވިދާޅުވެއްޖެ އެވެ.
މިއަދު ހުޅުވީ އަހަރަކު 120،000 ޓަނުގެ ކާގޯ ހޭންޑަލް ކުރެވޭ ޓާމިނަލެކެވެ. މިހާތަނަށް ބޭނުން ކުރަމުން އައީ 40 އަށް ވުރެ ގިނަ އަހަރުވެފައިވާ، އަހަރަކު އެންމެ 50،000 ޓަނުގެ ކާގޯ ހޭންޑަލް ކުރެވޭ ޓާމިނަލެކެވެ.
އާ ޓާމިނަލް ހުޅުވަން ބޭއްވި ރަސްމިއްޔާތުގައި ޝަރީފް ވިދާޅުވީ 2022 ވަނަ އަހަރު ޓާމިނަލްގެ މަސައްކަތް ނިންމައި 2023 ވަނަ އަހަރު އެ ތަން ހަވާލުކޮށްފައިވާ ކަމަށެވެ. ނަމަވެސް ޓާމިނަލް ހުޅުވަން ސަރުކާރުން އިސްކަން ދީފައިނުވާ ކަމަށް އޭނާ ވިދާޅުވި އެވެ.
"މި އިމާރާތް ޓެކްނިކަލީ 2022 ވަނަ އަހަރު ނިމުނު ކަމަށް ވިޔަސް ބޭނުން ކުރުމަށް އެހާ ބޮޑު އިސްކަމެއް ނުދެވި ގިނަ ދުވަސްވެ 2023 ވަނަ އަހަރާ ހަމައަށް ވަނީ ދިގުލައިގެން ގޮސްފައި. 2023 ވަނަ އަހަރު ވެސް ރަސްމީކޮށް ތަން ހަވާލު ކުރުމަށްފަހު ވެސް އޮޕަރޭޝަނަލް ނުކުރެވި ދުވަސްތަކެއް ދިޔަ،" ޝަރީފް ވިދާޅުވި އެވެ.
ޝަރީފް ވިދާޅުވީ ބާ ޓާމިނަލުގައި އޯވާކެޕޭސިޓީގައި އެއާޕޯޓުގެ މުވައްޒަފުން މަސައްކަތް ކުރަމުންދިޔައިރު ވެސް އާ ޓާމިނަލް ނުހުޅުވައި ދިޔުމަކީ ބޮޑު އިސްރާފެއް ކަމަށެވެ.
"މިފަދަ ފެސިލިޓީއެއް ގާއިމްކޮށް އެތަނުގެ ބޭނުން ނުހިފި ފާއިތުވާ ކޮންމެ ދުވަހަކީ ދިވެހި ރައްޔިތުންގެ ފައިސާތަކެއް އެއްވެސް ފައިދާއެއްނެތި ބޭކާރުވެގެންދާ ދުވަހެއް،" އޭނާ ވިދާޅުވި އެވެ.
އެ ރަސްމިއްޔާތުގައި ވާހަކަ ދައްކަވަމުން އިގްތިސާދާ ބެހޭ މިނިސްޓަރު މުހައްމަދު ސައީދު ވިދާޅުވީ ރައީސް ޑރ. މުހައްމަދު މުއިއްޒުގެ ތަސައްވުރަކީ ކާގޯ ޓާމިނަލްގެ ކެޕޭސިޓީ މިހާރަށްވުރެ ވެސް އިތުރު ކުރުން ކަމަށެވެ.
"ރައީސްގެ ވިޝަންއަކީ މިހާރުން މިހާރަށް މަސައްކަތް ފައްޓަވައި 300،000 ޓަނަށް މި އަދަދު ބޮޑު ކުރުން. މިތަނަށް އެއާ ކާގޯ އަަންނާނެ މަގު ފަހި ކުރުމަކީ އަޅުގަނޑުމެން އެކުއެކީ ކުރަންޖެހޭ މަސައްކަތެއް،" ސައީދު ވިދާޅުވި އެވެ.
މިނިސްޓަރު ވިދާޅުވީ ޓާމިނަލްގެ ކެޕޭސިޓީ އިތުރު ކުރުމާއެކު ކާގޯ ރާއްޖެއަށް ގެންނަ މިންވަރު ވެސް އިތުރު ކުރަންޖެހޭ ކަމަށެވެ. އެކަމަށް ސަރުކާރުން މަސައްކަތްތަކެއް ކުރަމުން އަންނަ ކަމަށް ވެސް އޭނާ ވިދާޅުވި އެވެ.
"މި ސަރަހައްދުގެ އެންމެ ބޮޑު ކާގޯ އިކޮނޮމިކް ޒޯނުން އަޅުގަނޑުމެންނަށް މިހާރު އެބަ އޮތް ކޮންމެވެސް ޒާތެއްގެ އެއްބަސްވުމެއް، އެބޭފުޅުން ކުރިއަށް ވަޑައިގަންނަވަން ބޭނުންވާ ގޮތުގެ މަގު ޗާޓެއް ފޮނުވާފައި. އެއީ މި ސަރަހައްދުގެ އެންމެ ބޮޑު ކާގޯ ޓާމިނަލްކަން އަޅުގަނޑު ފާހަގަ ކުރަން،" މިނިސްޓަރު ވިދާޅުވި އެވެ.
ވީއައިއޭގެ އާ ކާގޯ ޓާމިނަލް ކޮމްޕްލެކްސްގެ މަސައްކަތަކީ ކުރީގެ ރައީސް ޔާމީން އަބްދުލްގައްޔޫމްގެ ވެރިކަމުގައި 2018 ވަނަ އަހަރު ފެށި މަޝްރޫއެކެވެ. ވީއައިއޭ ތަރައްގީކުރުމުގެ ބިޔަ މަޝްރޫއުގެ ތެރޭގައި އާ ކާގޯ ޓާމިނަލުގެ އިތުރުން އާ ރަންވޭގެ މަސައްކަތާއި ފިއުލްފާމްގެ މަސައްކަތް ވެސް ހިމެނެ އެވެ. އާ ރަންވޭ މިހާރު ވެސް ބޭނުންކުރަމުން ދާއިރު އާ ފިއުލް ފާމްގެ މަސައްކަތް ވެސް މިހާރު ވަނީ ނިމުމަކާ ކައިރިވެފަ އެވެ.
