ވެލާނާ އިންޓަނޭޝަނަލް އެއާޕޯޓުގައި މިއަދު ހުޅުވި އާ ކާގޯ ޓާމިނަލް އަދިވެސް ބޮޑުކޮށް، އިތުރު ކާގޯ ރާއްޖެއަށް ގެނެވޭނެ މަގު ފަހި ކުރައްވާނެ ކަމަށް އިކޮނޮމިކް ޑިވެލޮޕްމަންޓް އެންޑް ޓްރޭޑް މިނިސްޓަރު މުހައްމަދު ސައީދު މިއަދު ވިދާޅުވެއްޖެ އެވެ.
މިއަދު ހުޅުވީ އަހަރަކު 120،000 ޓަނުގެ ކާގޯ ހޭންޑަލް ކުރެވޭ ޓާމިނަލެކެވެ. މިހާތަނަށް ބޭނުން ކުރަމުން އައީ 40 އަށް ވުރެ ގިނަ އަހަރުވެފައިވާ، އަހަރަކު އެންމެ 50،000 ޓަނުގެ ކާގޯ ހޭންޑަލް ކުރެވޭ ޓާމިނަލެކެވެ. އާ ޓާމިނަލް ހުޅުވަން ބޭއްވި ރަސްމިއްޔާތުގައި ވާހަކަ ދައްކަވަމުން މިނިސްޓަރު ސައީދު ވިދާޅުވީ ރައީސްގެ ތަސައްވުރަކީ ޓާމިނަލްގެ ކެޕޭސިޓީ އަދިވެސް އިތުރު ކުރުން ކަމަށެވެ.
"ރައީސްގެ ވިޝަންއަކީ މިހާރުން މިހާރަށް މަސައްކަތް ފައްޓަވައި 300،000 ޓަނަށް މި އަދަދު ބޮޑު ކުރުން. މިތަނަށް އެއާ ކާގޯ އަަންނާނެ މަގު ފަހި ކުރުމަކީ އަޅުގަނޑުމެން އެކުއެކީ ކުރަންޖެހޭ މަސައްކަތެއް،" ސައީދު ވިދާޅުވި އެވެ.
މިނިސްޓަރު ވިދާޅުވީ ޓާމިނަލް ބޮޑު ކުރުމާއެކު ކާގޯ ގެނެވޭ އަދަދު ވެސް އިތުރު ކުރަންޖެހޭ ކަމަށެވެ. އެކަމަށް ސަރުކާރުން މިހާރު ވެސް މަސައްކަތް ކުރަމުންދާ ކަމަށް ސައީދު ވިދާޅުވި އެވެ.
"މި ސަރަހައްދުގެ އެންމެ ބޮޑު ކާގޯ އިކޮނޮމިކް ޒޯނުން އަޅުގަނޑުމެންނަށް މިހާރު އެބަ އޮތް ކޮންމެވެސް ޒާތެއްގެ އެއްބަސްވުމެއް، އެބޭފުޅުން ކުރިއަށް ވަޑައިގަންނަވަން ބޭނުންވާ ގޮތުގެ މަގު ޗާޓެއް ފޮނުވާފައި. އެއީ މި ސަރަހައްދުގެ އެންމެ ބޮޑު ކާގޯ ޓާމިނަލްކަން އަޅުގަނޑު ފާހަގަ ކުރަން،" މިނިސްޓަރު ވިދާޅުވި އެވެ.
އާ ކާގޯ ޓާމިނަލް: ކުރިން ބޭނުން ކުރީ 40 އަހަރުވެފައިވާ ބާ އިމާރާތެއް -- ފޮޓޯ: އަބްދުﷲ އިޔާން / އަދަދު
މިއަދުގެ ރަސްމިއްޔާތުގައި ވާހަކަ ދައްކަވަމުން އެމްއޭސީއެލްގެ ސީއީއޯ އަދި މެނޭޖިން ޑިރެކްޓަރު އިބްރާހިމް ޝަރީފް މުހައްމަދު ވިދާޅުވީ އާ ކާގޯ ޓާމިނަލް މިދިޔަ އަހަރު ނިމުނު ނަމަވެސް ނުހުޅުވުނީ ސަރުކާރުން އެކަމަށް މާ ބޮޑު އިސްކަމެއް ނުދިނުމުން ކަމަށެވެ.
"މި އިމާރާތް ޓެކްނިކަލީ 2022 ވަނަ އަހަރު ނިމުނު ކަމަށް ވިޔަސް ބޭނުން ކުރުމަށް އެހާ ބޮޑު އިސްކަމެއް ނުދެވި ގިނަ ދުވަސްވެ 2023 ވަނަ އަހަރާ ހަމައަށް ވަނީ ދިގުލައިގެން ގޮސްފައި. 2023 ވަނަ އަހަރު ވެސް ރަސްމީކޮށް ތަން ހަވާލު ކުރުމަށްފަހު ވެސް އޮޕަރޭޝަނަލް ނުކުރެވި ދުވަސްތަކެއް ދިޔަ،" ޝަރީފް ވިދާޅުވި އެވެ. "މިފަދަ ފެސިލިޓީއެއް ގާއިމްކޮށް އެތަނުގެ ބޭނުން ނުހިފި ފާއިތުވާ ކޮންމެ ދުވަހަކީ ދިވެހި ރައްޔިތުންގެ ފައިސާތަކެއް އެއްވެސް ފައިދާއެއްނެތި ބޭކާރުވެގެންދާ ދުވަހެއް."
ވީއައިއޭގެ އާ ކާގޯ ޓާމިނަލް ކޮމްޕްލެކްސްގެ މަސައްކަތަކީ ކުރީގެ ރައީސް ޔާމީން އަބްދުލްގައްޔޫމްގެ ވެރިކަމުގައި 2018 ވަނަ އަހަރު ފެށި މަޝްރޫއެކެވެ. ވީއައިއޭ ތަރައްގީކުރުމުގެ ބިޔަ މަޝްރޫއުގެ ތެރޭގައި އާ ކާގޯ ޓާމިނަލުގެ އިތުރުން އާ ރަންވޭގެ މަސައްކަތާއި ފިއުލްފާމްގެ މަސައްކަތް ވެސް ހިމެނެ އެވެ. އާ ރަންވޭ މިހާރު ވެސް ބޭނުންކުރަމުން ދާއިރު އާ ފިއުލް ފާމްގެ މަސައްކަތް ވެސް މިހާރު ވަނީ ނިމުމަކާ ކައިރިވެފަ އެވެ.
