އުނދަގޫ ބޮޑު، ވަކިވެގަތުމަށް މަސައްކަތް ކުރާ ނުރައްކާތެރި މީހެއްގެ ގޮތުގައި ޗައިނާއިން ސިފަކުރާ، ޓައިވާނުގެ މިހާރުގެ ނައިބު ރައީސް އަދި ވެރިކަންކުރާ ޕާޓީގެ ޗެއާޕާސަން ވިލިއަމް ލައި، އެ ގައުމުގެ އާ ރައީސް އަކަށް ހޮވިވަޑައިގެންފި އެވެ.
ވެރިކަން ކުރާ، ޑިމޮކްރެޓިކް ޕްރޮގްރެސިވް ޕާޓީ (ޑީޕީޕީ)ގެ ކެންޑިޑޭޓު ލައި ހޮނިހިރު ދުވަހުގެ އިންތިހާބު ކާމިޔާބު ކުރެއްވީ ވޯޓުލީ މީހުންގެ 40 ޕަސެންޓުންނެވެ. މިއީ ޑީޕީޕީ ވިދިވިދިގެން އިންތިހާބު ކާމިޔާބު ކުރި ތިން ވަނަ ފަހަރެވެ.
ޓައިވާނުގެ 23 މިލިއަނަށްވުރެ ގިނަ މީހުންގެ އާބާދީއެއް އޮންނައިރު، ވޯޓުލުމުގެ ހައްގު ލިބޭ 19 މިލިއަން މީހުންގެ ތެރެއިން މިފަހަރުގެ ވޯޓުލާން ނުކުތީ 71 ޕަސެންޓު މީހުންނެވެ.
އިންތިހާބު ކާމިޔާބު ކުރެއްވުމަށް ފަހު ލައި ވިދާޅުވީ ޓައިވާނުން އަނެއްކާ ވެސް ދުނިޔެ އަށް ދައްކައި މިދިނީ އެ ރައްޔިތުން ޑިމޮކްރަސީ އާއި މިނިވަން ކަމަށް އަހަމިއްޔަތު ދޭ މިންވަރު ކަމަށެވެ.
"އުއްމީދު ކުރަނީ ބައިނަލްއަގްވާމީ މުޖުތަމައުގައި ރަނގަޅު ބާރެއްގެ ގޮތުގައި ދެމިތިބުމަށް،" އޭނާ ވިދާޅުވި އެވެ.
ލައި ރަސްމީކޮށް މަގާމާ ހަވާލުވެވަޑައި ގަންނަވާނީ އަންނަ މެއި މަހު އެވެ.
ޓައިވާނައަކީ ޗައިނާގެ މައި ސަރުކާރާ ވަކިން އަމިއްލަ ދައުލަތެއް ކަމަށް ދައުވާ ކުރާ ގައުމެކެވެ. ރާއްޖެއިން ޒަމާނުއްސުރެ އަންނަނީ ޗައިނާގެ 'ވަން ޗައިނާ ޕޮލިސީ' އަށް ތާއީދުކޮށް ޓައިވާނަކީ ޗައިނާގެ ބައެއް ކަމަށް ބުނާ ބުނުމަށް ތާއީދުކުރަމުންނެވެ.
