ރައީސް ޑރ. މުހައްމަދު މުއިއްޒު މިހާރު ޗައިނާއަށް ކުރައްވަމުން ގެންދާ ރަސްމީ ދަތުރުފުޅުގެ ތެރެއިން އެ ގައުމުގެ ބޮޑުވަޒީރު ލީ ޗޭންއާ ބައްދަލުކުރައްވައިފި އެވެ.
ޗައިނާގެ ވެރިރަށް ބެއިޖިންގައި ކުރިއަށް ގެންދިޔަ އެ ބައްދަލުވުމުގައި ރާއްޖޭގެ ވަފުދުގެ އިސް ބޭފުޅުންނާއި ޗައިނާގެ ވަފުދެއް ވެސް ބައިވެރިވި އެވެ.
ރައީސް އޮފީހުން ބުނި ގޮތުގައި މި ބައްދަލުވުމުގައި ދެ ގައުމުގެ ދެމެދުގައި އީ ކޮމާސްގެ ދާއިރާއިން ގުޅުން ބަދަހި ކުރުމަށާއި ޗައިނާގެ އެހީގައި ކުރިއަށް ގެންދަން ރާވާފައިވާ މަޝްރޫއުތަކާ ބެހޭގޮތުން މަޝްވަރަވާ ކުރި ކަމަށެވެ. މަޝްވަރާކުރި ކަންތައްތަކުގެ ތެރޭގައި ރަސްމާލެ މަޝްރޫއާއި ވެލާނޭ އިންޓަނޭޝަނަލް އެއާޕޯޓު ތަރައްގީ ކުރުމުގެ މަޝްރޫއު ހިމެނެ އެވެ.
އެހެން ގިނަ ދާއިރާތަކަކުން ރާއްޖެއަށް ޗައިނާއިން އެހީވުމަށް ބޮޑުވަޒީރު ހުށަހެޅުއްވި ކަމަށްވެސް ރައީސް އޮފީހުން ބުންޏެވެ. އޭގެ ތެރޭގައި ސްކޮލާޝިޕް ފުރުސަތުތައް، ވޮކޭޝަނަލް ޓްރެއިނިން، ކުޅިވަރު ޓްރެއިނިން، މަސްވެރިކަމާއި ދަނޑުވެރިކަމުގެ ދާއިރާ އިން އެކުގައި މަސައްކަތް ކުރުމުގެ އިތުރުން، އަދި މޫސުމާ ބެހޭ ޓެކްނޮލޮޖީގެ ދާއިރާއިން ދެ ގައުމު އެކުގައި މަސައްކަތް ކުރުމެވެ.
މި ދަތުރުގެ ތެރެއިން ރައީސް މުއިއްޒު އިއްޔެ ވަނީ ޗައިނާގެ ރައީސް ޝީ ޖިންޕިންއާ ބައްދަކުރައްވާ ދެ ގައުމުގެ މެދުގައި ރަސްމީ މަޝްވަރާތައް ކުރިއަށް ގެންދަވާފަ އެވެ. އެ މަޝްވަރާތަކަށްފަހު ދެ ގައުމުގެ މެދުގައި ޖުމްލަ 20 އެއްބަސްވުމެއްގައި ސޮއިކޮށްފައިވެ އެވެ.
އިއްޔެގެ ބައްދަލުވުމުގައި ޗައިނާގެ ރައީސް ޝީގެ ވާހަކައިގައި އެމަނިކުފާނު ވަނީ ރިޔާސީ އިންތިހާބުގައި ރައީސް މުއިއްޒު ހޯއްދެވި ކާމިޔާބީއަށް މަރުހަބާ ދަންނަވަމުން، މި ދަތުރަކީ ރާއްޖެ-ޗައިނާ ގުޅުމުގެ މުޅިން އާ ބާބެއްގެ ފެށުމަކަށް ވާނެ ކަމުގެ ޔަގީންކަށް އެބައޮތް ކަމަށް ވިދާޅުވެފަ އެވެ. އޭގެ އިތުރުން އެމަނިކުފާނު ވަނީ ބްލޫ، ގްރީން އަދި ޑިޖިޓަލް އިކޮނޮމީގެ ދާއިރާއިން ދެ ގައުމުގެ ގުޅުން އިތުރަށް ވަރުގަދަކުރުމަށް އުއްމީދު ކުރާ ކަމަށް ވިދާޅުވެފަ އެވެ.
ރައީސް އޮފީހުން ބުނީ ދެ ލީޑަރުން ވެސް ތިއްބެވީ ދެ ގައުމުގެ ގުޅުން މުސްތުގުބަލުގައި އިތުރަށް ވަރުގަދަވެގެން ދިޔުމުގެ ފޮނި އުއްމީދުގައި ކަމަށެވެ.
