ރާއްޖެއާއި ޗައިނާއާ ދެމެދު ވިޔަފާރީގެ މުއާމަލާތްތައް ބާރު ސްޕީޑުގައި އިތުރުވަމުން އަންނަ ކަމަށާއި, ކުރިއަށް އޮތް ތަނުގައި ދެ ގައުމުގެ ވިޔަފާރީގެ ގުޅުން އިތުރަށް ފުޅާވެ, ކުރިއަރައި ދިއުމަށް އުއްމީދު ކުރައްވާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
މިހާރު ޗައިނާއަށް ކުރައްވަމުން ގެންދަވާ ރަސްމީ ދަތުރުފުޅުގެ ކުރިން އެ ގައުމުގެ ގައުމީ މީޑިއާއަށް ދެއްވި އިންޓަވިއުއެއްގައި ރައީސް ވިދާޅުވީ އެ ދަތުރުފުޅުގެ ތެރެއިން އިގްތިސޯދީ, ވިޔަފާރި, ފަތުރުވެރިކަން, އިންވެސްޓްމަންޓް އަދި ސަގާފީ ގޮތުން އިތުރަށް ގުޅުން ބަދަހި ކުރެއްވުމުގެ ވިސްނުންފުޅު ގެންގުޅުއްވާ ކަމަށެވެ.
ރައީސް ވިދާޅުވީ ރާއްޖޭގެ އިޖްތިމާއީ އަދި އިގްތިސާދީ ކުރިއެރުމުގައި ޗައިނާ އަކީ މުހިންމު ބައިވެރިއެއް ކަމަށާއި ކުރިއަށް އޮތް ތަނުގައި އެ ގައުމު ދެމި އޮންނާނީ ވެސް އެގޮތުގައި ކަމަށެވެ. އެމަނިކުފާނު ވަނީ, ޗައިނާއިން ބޭރުގެ ދަތުރުތައް އަލުން ފެށުމާއެކު އެ ގައުމުން އަންނަ ފަތުރުވެރިންގެ އަދަދު އިތުރުވަމުން އަންނަކަން ފާހަގަކުރައްވާފަ އެވެ.
ރައީސް މުއިއްޒު ވިދާޅުވި ގޮތުގައި ރާއްޖެއާއި ޗައިނާގެ ގުޅުން ބިނާވެފައި އޮތީ ދެ ގައުމުގެ މެދުގައި އޮންނަ އިހްތިރާމާއި، އިތުބާރާއި، އެކަކު އަނެކަކުގެ ދާހިލީ ކަންކަމަށް ނުފޫޒު ނުފޯރުވުމުގެ މައްޗަށެވެ.
މިއީ ރައީސް ކަމަށް އިންތިހާބުވެ ވަޑައިގެންނެވިފަހުން ޗައިނާއަށް ކުރައްވާ ފުރަތަމަ ދަތުރުފުޅު ކަމަށް ވާތީ, މި ދަތުރުފުޅުގައި ޗައިނާއާ ރާއްޖެއާ ދެމެދު އޮތް ގުޅުން ހަރުދަނާކޮށް, އިންވެސްޓްމަންޓްތަކާއެކު ދެ ގައުމުގެ ރައްޔިތުންގެ ލާބައާއި މަންފާއަށް ގުޅިގެން މަސައްކަތް ކުރުމަށް އުއްމީދު ކުރައްވާ ކަމަށް ވެސް އެމަނިކުފާނު ވިދާޅުވި އެވެ.
ޗައިނާއަށް ކުރައްވާ ދަތުރުފުޅުގެ ތެރެއިން ރައީސް ވަނީ ދެ ގައުމުގެ ވިޔަފާރީގެ ގުޅުން ވަރުގަދަ ކުރުމަށްޓަކައި ޗައިނާގައި އިއްޔެ ބޭއްވި "އިންވެސްޓް މޯލްޑިވްސް 2024" ފޯރަމްގައި ވާހަކަ ދައްކަވާފަ އެވެ.
ޗައިނާ އާއި ރާއްޖޭގެ ގުޅުމަކީ ގަދީމީ ސިލްކްރޯޑްގެ ޒަމާނުއްސުރެ އޮތް ގުޅުމެއް ކަން ފާހަގަ ކުރައްވަައި ރައީސް މުއިއްޒު ވިދާޅުވީ ޗައިނާގެ ރައީސް ޝީ ޖިންޕިން 2014 ވަނަ އަހަރު ފެށްޓެވި ބެލްޓް އެންޑް ރޯޑް އިނިޝޭޓިވްގައި ވެސް އެންމެ ފުރަތަމަ ބައިވެރިވި ގައުމުތަކުގެ ތެރޭގައި ރާއްޖެ ހިމެނޭ ކަމަށެވެ. ރާއްޖޭގައި މިހައިތަނަށް ހިންގުނު އެންމެ ފާހަގަކޮށްލެވޭ އުމްރާނީ ތަރައްގީގެ މަޝްރޫއުތައް ހިންގުނީ އޭގެ ނަތީޖާއެއްގެ ގޮތުން ކަމަށް ވެސް އެމަނިކުފާނު ވިދާޅުވި އެވެ.
ބެލްޓް އެންޑް ރޯޑް އިނިޝޭޓިވް އަށް ތައުރީފު ކުރައްވަމުން ރަައީސް ވިދާޅުވީ ޗައިނާއަަށް ވަޑައިގެންނެވުމުގެ ކުރިން އެމަނިކުފާނު އިފްތިތާހު ކުރެއްވި ސެންޓްރަލް އެއާޕޯޓް ތަސައްވުރާއި ކޮމާޝަލް ޕޯޓްގެ ތަސައްވުރަކީ އެ ބެލްޓް އެންޑް ރޯޑް އިނިޝޭޓިވް އާ ގުޅޭ މަަޝްރޫއުތައް ކަމަށެވެ.
އޭގެ އިތުރުން ޗައިނާ އާއި އެކު ރާއްޖޭން ސޮއިކޮށްފައިވާ ފްރީ ޓްރޭޑް އެއްބަސްވުމަށް ވެސް އެމަނިކުފާނު ތައުރީފުކުރެއްވި އެވެ. އަދި ވިދާޅުވީ، އެމަނިކުފާނު ރިޔާސީ ކެމްޕެއިންގެ ދުވަސްވަރު ދިވެހި ރައްޔިތުންނަށް ވައުދުވެވަޑައިގެންނެވި ގޮތަށް، އެ އެއްބަސްވުން ވަރަށް އަވަހަށް ތަންފީޒުކުރައްވާނެ ކަމަށެވެ.
ޗައިނާ-ރާއްޖެ ފްރީ ޓްރޭޑް އެގްރީމަންޓުގައި ސޮއިކުރީ 2017 ގައި، ކުރީގެ ރައީސް އަބްދުﷲ ޔާމީންގެ ސަރުކާރުންނެވެ. މި އެއްބަސްވުމަށް އޭރުގެ ރައްޔިތުންގެ މަޖިލީހުން ރުހުން ވެސް ދިނެވެ. ނަމަވެސް އޭރުގެ އިދިކޮޅު ފަރާތްތަކާއި އެހެނިހެން ގޮތްގޮޮތުން ކުރިމަތިވީ ފިއްތުންތަކާއި ޕްރެޝަރުތަކުގެ ތެރޭގައި އެ އެއްބަސްވުމަށް އަމަލުކުރަން ނުފަށަ އެވެ.
