ސަރުކާރިގެ ޑެޕިއުޓީ މިނިސްޓަރުންތަކެއް އިންޑިއާގެ ބޮޑުވަޒީރު ނަރެންދުރަ މޯދީއަށް މަލާމާތްކުރި މައްސަލާގައި ސަރުކާރުން އިންޑިއާގެ ކިބަިއން މާފަށް ނޭދޭ ސަބަބު ސާފުކުރަން ފޮރިން މިނިސްޓަރު މޫސާ ޒަމީރާ ސުވާލުކުރަން މަޖިލީހަށް ހާޒިރުކުރަން ހުށަޅައިފި އެވެ.
އެ މައްސަލާގައި މިނިސްޓަރާ ސުވާލުކުރަން އެދިވަޑައިގެންނެވީ ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމެވެ. ސަރުކާރުން ރަސްމީކޮށް އިންޑިއާ ކިބައިން މާފަށް ނޭދޭ ސަބަބު ސާފުކުރަން މީކާއިލް ހުށަހަޅުއްވި އިރު ފާހަގަކުރެއްވީ މޯދީއަކީ ރާއްޖޭގެ އެންމެ މަތީ އެއް އިއްޒަތް ކަމަށްވާ ނިޝާން އިއްްޒުއްދީންގެ އިއްޒަތް އަރުވާފައިވާ ބޭފުޅެއް ކަމެވެ.
އެ މި އަމަލު ހިންގި ޑެޕިއުޓީ މިނިސްޓަރުން މަގާމުން ވަކި ނުކުރަނީ ކީއްވެތޯ ސުވާލުކުރަން ވެސް މީކާއިލް ހުށަހެޅުއްވި އެވެ.
އިންޑިއާގެ ޖަޒީރާ އަތޮޅެއްގެ ގޮތުގައި އޮންނަ ލަކްޝަދީޕް އަށް އިންޑިއާގެ ބޮޑުވަޒީރު ނަރެންދުރަ މޯދީ ކުރެއްވި ޒިޔާރަތުގެ ވީޑިއޯއަކާއެކު އިންޑިއާ މީހަކު ކުރި ޕޯސްޓަކަށް، ދިވެހި ސަރުކާރުގެ ތިން ޑެޕިއުޓީ މިނިސްޓަރުން ރައްދު ދިނުމުން ހޫނުވި މައްސަލައާހެދި އިންޑިއާގެ ރައްޔިތުން ދަނީ ރާއްޖެ ބޮއިކޮޓް ކުރުމަށް ގޮވާލަމުންނެވެ.
ލަކްޝަދީޕް އަށް މޯދީ ކުރެއްވި ޒިޔާރަތުގެ ޕޯސްޓުތަކާ ގުޅިގެން ޔޫތު މިނިސްޓްރީގެ ތިން ޑެޕިއުޓީން ވަނީ ސޯޝަލް މީޑިއާގައި އެމަނިކުފާނަށް މަލާމާތްކޮށްފަ އެވެ. އެ މައްސަލާގައި އެ ތިން މީހުން މިހާރު ވަނީ ސަސްޕެންޑު ވެސް ކޮށްފަ އެވެ.
މި މައްސަލަ މަޖިލީހަށް ހުށަހެޅުއްވި މެންބަރު, މީކާއިލް ވިދާޅުވި ގޮތުގައި ސޯޝަލް މީޑިއާގައި މޯދީއަށް ފުރައްސާރަކޮށް ކުޑައިމީސް ކުރުމާ ގުޅިގެން ދެ ގައުމުގެ ގުޅުމަށް މިއިން ޒަމާނަކު ނާންނަ ވަރަށް ހީނަރުކަން އަތުވެއްޖެ އެވެ. އަދި އެކަމާ ގުޅިގެން އިންޑިއާއގެ ޓުއާ އޮޕަރޭޓަރުންނާއި ޓްރެވެލް އެޖެންޓުން ވަނީ އިންޑިއާ ފަތުރުވެރިން ރާއްޖެ އައުމަށް ހަދާފައިވާ ބުކިންތައް ކެންސަލް ކުރަމުން އަންނަ ކަން އޭނާ ފާހަގަކުރެއްވި އެވެ.
"ރާއްޖޭގެ އިގްތިސޯދަށް ފޫނުބެއްދޭ ވަރުގެ ބޮޑު ގެއްލުމެއް ލިބި, ބޭސް ފަރުވާއަށާއި އެހެނިހެން އަސާސީ ބޭނުންތަކަށް އިންޑިއާއަށް ބަރޯސާވާ ދިވެހިންނަށް އުނދަގޫތަކާ ކުރިމަތިލާންޖެހި, ރާއްޖެއަށް ޒަމާނުއްސުރެ އެންމެ ގާތް ގުޅުމެއް އޮންނަ އަވައްޓެރޮ އިންޑިއާއާއި މޫނު ކެނޑެން ޖެހިދާނެ ވަރުގެ ހާލަތަކަށް ގައުމު ހިނގައިދާނެ" މަޖިލީހުގެ ރައީސަށް މީކާއިލް ފޮނުއްވި ސިޓީގައި ވިދާޅުވި އެވެ.
އޭނާ ވަނީ މި މައްސަލާގައި ޝާމިލުވާ ޑެޕިއުޓީ މިނިސްޓަރުންނާއި ސަރުކާރުގެ ކަމާ ބެހޭ ފަރާތްތައް މަޖިލީހުގެ ހާރިޖީ ކޮމިޓީއަށް ހާޒިރުކޮށް, ސަރުކާރުން އެކަށީގެންވާ ފިޔަވަޅުތައް އަޅާނެކަން ކަށަވަރު ކުރުމަށް އެދިވަޑައިގެންފަ އެވެ.
