ރައީސް ޑރ.،މުހައްމަދު މުއިއްޒު އިންޑިއާއަށް ވުރެ ކުރިން ޗައިނާއަށް ވަޑައިގެންނެވުމުން އިންޑިއާގެ ނޫސްތަކުން ފާޑުކިޔާތީ ޗައިނާއިން އެކަަމަށް ރައްދުދީ، އިންޑިއާއަށް ވަރުގަދަ މެސެޖެއް ދީފި އެވެ.
ޗައިނާގެ ވެރިކަންކުރާ ކޮމިއުނިސްޓް ޕާޓީގެ ސިޔާސަތުތަކާއި ޝުއޫރުތައް ފާޅުކުރާ " ދަ ގްލޯބަލް ޓައިމްސް" ނޫހުގައި ޖެހި އެޑިޓޯރިއަލްއެއް ގައި ބުނީ ޗައިނާއިން ރާއްޖެއާ މެދު އަމަލުކުރަނީ ހަމަހަމަ ބައިވެރިއެއްގެ ގޮތުގައި ކަމަށާއި ރާއްޖޭގެ ސިޔާދަތަށް އެގައުމުން އިހުތިރާމްކުރާ ކަމަށެވެ. ރާއްޖެއިން އިންޑިއާއާ އެކު ބާއްވާ ގުޅުމަށް ވެސް ޗައިނާއިން އިހުތިރާމްކުރާ ކަމަށާއި ރާއްޖެ އިންޑިއާއާ ދެކޮޅުވާން ޗައިނާއިން ނުބުނާ ކަމަށް ވެސް އެ ލިއުމުގައި ބުންޏެވެ.
ގްލޯބަލް ޓައިމްސްގެ އެޑިޓޯރިއަލްތައް ބައިނަލްއަގުވާމީ މީޑިއާ އިން ނަގަނީ ޗައިނާ ސަރުކާރުގެ ބުނުންތަކުގެ ގޮތުގަ އެވެ. އެކަމަށް ޗައިނާ ސަރުކާރުން އިންކާރެއް ވެސް ނުކުރެ އެވެ.
"...ދިވެހިރާއްޖެއާ އިންޑިއާއާ ދެމެދު އޮތް ގުޅުމަކީ ދެކޮޅުވެރިކަމެއް ނުވަތަ ނުރައްކަލެއް ކަމަކަށް ޗައިނާއަކުން ނުދެކެ އެވެ. ޗައިނާ އޮތީ ޗައިނާ، އިންޑިއާއާ އަދި ދިވެހިރާއްޖެ ޓްރައިލެޓްރަލް ގުޅުމެއް [ތިން ގައުމު ބައިވެރިވާ ގުޅުމެއް] އުފައްދަން ވެސް ތައްޔާރަށެެވެ،" ގްލޯބަލް ޓައިމްސްގެ އެޑިޓޯރިއަލްގައި ބުނެފައި ވެ އެވެ.
އެ ލިއުން ނިންމައިލަމުން ބުނީ އިންޑިއާއިން ހުޅުވައިލެވިފައިވާ ވިސްނުމެއް ގެންގުޅެން ޖެހޭ ކަމަށާއި ދެކުނު އޭޝިއާގެ ގައުމުތަކާ އެކު ޗައިނާއިން ބާއްވާ ގުޅުމަކީ އެއްފަރާތަށް ފައިދާވާ ގޮތަށް އޮތް ގުޅުމެއް ނޫން ކަމަށެވެ.
ރާއްޖޭން ޗައިނާއާ އެކު ބާއްވާ ގުޅުމާ މެދު އިންޑިއާއިން ކަންބޮޑުވާ ކަންބޮޑުވުމަށް ފާޑުކިޔަމުން ޗައިނާގެ ލިއުމުގައި ބުނީ އިންޑިއާ ސަރުކާރުން އުއްމީދުކުރަނީ އެގައުމުން ޗައިނާއާ މެދު ގެންގުޅޭ ދެކޮޅުވެރި ގޮތް ރާއްޖޭން ވެސް ގެންގުޅެން އިންޑިއާއިން އުއްމީދުކުރާ ކަމަށެވެ.
"...އިންޑިއާއަށް ވުރެ ކުރިން ޗައިނާއަށް ވަޑައިގަންނަވަން މުއިއްޒު ނިންމެވުމުގެ މާނައަކީ ކޮންމެހެން އެމަނިކުފާނަކީ ޗައިނާއާ އެެއްކޮޅު އިންޑިއާއާ ދެކޮޅު ބޭފުޅަކަށް ވުމެެއް ނޫނެވެ. އޭގެ މާނައަކީ މުއިއްޒު އިންޑިއާއާ މެދު އާއްމު ވިސްނުންފުޅަކުން އަމަލުކުރެއްވުމެވެ. އަދި އިންޑިއާއާ ދިވެހިރާއްޖެއާ ދެމެދު އޮތް ގުޅުމަކީ ދައުލަތަކާއި ދައުލަތަކާ ދެމެދު އޮންނަ އާއްމު ގުޅުމަކަށް ބަދަލުކުރެއްވުމެވެ،" ގްލޯބަލް ޓައިމްސްގެ ލިއުމުގައި ވެ އެވެ.
ރާއްޖެއާ ޗައިނާއާ ދެމެދު އޮތް ގުޅުމަކީ ޒަމާންވީ ގުޅުމެއް ކަމާއި ދެގައުމުގެ ދެމެދުގައި 1981 ވަނަ އަހަރުން ފެށިގެން ވިޔަފާރިއާއި އިގުތިސާދީ ގޮތުން ގުޅުން ބަދަހިކުރަމުން އަންނަަަކަން އެ ލިއުމުގައި ފާހަގަކޮށްފައި ވެ އެވެ.
ރައީސް މުއިއްޒު ޗައިނާއަށް ދަތުރުފުޅެއް ކުރައްވާކަން އިއުލާނުކުރުމާ އެކު އިންޑިއާގެ ބައެއް ނޫސްތަކުން ސިފަކުރީ އެއީ ޗައިނާއާ އެއްކޮޅު "ޕްރޯ ޗައިނާ ބޭފުޅެއް"ގެ ގޮތުގަ އެވެ. އަދި އޭގެ ފަހުން އިންޑިއާގެ ލަކްޝަދީޕް ޕްރޮމޯޓްކުރައްވަން އެގައުމުގެ ބޮޑުވަޒީރު ނަރެންދުރާ މޯދީ ކުރެއްވި ޓްވީޓަކަށް ރާއްޖޭގެ ބައެއް އޮފިޝަލުން ރައްދު ދެއްވިލެއް ހުތުރުކަމުން އެގައުމުގެ ބައެއް މީހުން އަންނަނީ ރާއްޖެ ބޮއިކޮޓްކުރަން ގޮވައިލަމުންނެވެ. އެކަމުގެ ތެރޭގައި ރައީސް މުއިއްޒަށް ފާޑުކިޔައި އެމަނިކުފާނަކީ "ޗައިނާގެ ދަށުވެފައިވާ ބޭފުޅެއް" ކަމަށް ވެސް ގެންދަނީ ސިފަކުރަމުންނެވެ.
އެއާ އެކު ޗައިނާ ސަރުކާރުގެ ސޯޝަލްމީޑިއާ އެކައުންޓްތަކުން ރާއްޖެ ޕްރޮމޯޓްކުރުމުގެ ކެމްޕޭނެއް މިހާރު ވަނީ ފަށައިފަ އެވެ.
