ދައުރު ހަމަވި ފަހުން ވެސް ރެހެންދި ފްލެޓް ހުސްނުކޮށް, ބޭނުންކުރި މައްސަލާގައި 1.1 މިލިއަން ހޯދަން ކުރީގެ ނައިބު ރައީސް އަބްދުالله ޖިހާދާ ދެކޮޅަށް ދައުލަތުން ކުރި ދައުވާ އަނބުރާ ގެންގޮސްފި އެވެ.
ދައުލަތުން ޖިހާދަށް ރެހެންދި ފްލެޓް ހަމަޖައްސައި ދިނީ ނަިއބު ރައީސް ދިރިއުޅުއްވަން ދައުލަތުން ތަނެއް ހަމަޖައްސައިދޭން ޖެހޭތީ އެވެ.
ނަމަވެސް ދައުރު ހަމަވުމުން ރެހެންދި 3ގެ 05-01 އަދި 05-02 ދެ ފްލެޓް ހުސްކުރަން އެންގުމުން ވެސް އެކަން ނުކޮށް 2020 ވަނަ އަހަރުގެ ފެބްރުއަރީ މަހު 17އާ ހަމައަށް އެތަން ބޭނުންކޮށްފައިވާ ކަމަށް ބުނެ ރައީސް އޮފީހުން ވަނީ ބަދަލު ހޯދަން މައްސަލަ ކޯޓަށް ހުށަހަޅައިފަ އެވެ.
ރައީސް އޮފީހުން މައްސަލަ ސިވިލް ކޯޓަށް ހުށަހެޅީ ގާނޫނީ ހައިސިއްޔަތެއް ނެތި ދައުލަތުގެ މުދަލެއް ބޭނުންކޮށްފައިވާ މުއްދަތަށްވާ ކުލި ދައުލަތަށް ލިބެންޖެހޭ ކަމަށް ކަނޑައަޅައި ދިނުމަށް އެދި އެވެ. އަދި ކުއްޔާއި މެއިންޓެނެންސް ފީ އަދި ޔޫޓިލިޓީ ފީގެ ގޮތުގައި ދައްކަން ޖެހި ނުދައްކާވާ ޖުމްލަ 1,109,227.36 ރުފިޔާ އެއް ފަހަރާ ދައުލަތަށް ނަގައިދިނުމަށް އެދި އެވެ.
2020 ވަނަ އަހަރު ތެރޭގައި ސިވިލް ކޯޓަށް މި މައްސަލަ ހުށަހެޅި ނަމަވެސް, މިދިޔަ މާޗް މަހު ރައީސް އޮފީހުން ވަނީ މި މައްސަލާގައި ދައުވާ ކުރަންޖެހޭ ސަބަބެއް އޮތް ކަމަށް ނުފެންނާތީ ކަމަށް ބުނެ މައްސަލަ އަނބުރާ ގެންދިއުމަށް އެދިފަ އެވެ. އަދި މިދިޔަ ޑިސެމްބަރު މަހުގެ 21ގައި ބަންޑާރަ ނައިބުގެ އޮފީހުން ވެސް ވަނީ މި މައްސަލަ ބާތިލުކޮށްދިނުމަށް އެދި ސިވިލް ކޯޓަށް ސިޓީ ފޮނުވައިފަ އެވެ.
ރައީސް އޮފީހާއި ބަންޑާރަ ނައިބުގެ އޮފީހުގެ ސިޓީއާ ހެދި ސިވިލް ކޯޓުން މިއަދު ވަނީ ދައުވާ ފޯމު ބާތިލުކޮށް, މައްސަލަ ނިންމާފަ އެވެ.
