މާލެ އާއި ހުޅުލެއާ ދެމެދު އަޅާފައިވާ ސިނަމާލެ ބްރިޖުގެ މަސައްކަތްތައް ކުރި ޗައިނާ ކޮމިއުނިކޭޝަންސް ކޮންސްޓްރަކްޝަން ކޮމްޕެނީ ލިމިޓެޑް (ސީސީސީސީ) ގެ ވެރިން ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ އަރިހަށް އިހުތިރާމުގެ ޒިޔާރަތެއް ކުރައްވައިފި އެވެ.
ރައީސް މުއިއްޒު ގެންދަވަނީ ޗައިނާއަށް ފުރަމާނަ ދަތުރުފުޅެއް ކުރައްވަމުންނެވެ. އެމަނިކުފާނުގެ މި ދަތުފުރުޅުގެ ތެރެއިން ސީސީސީސީގެ އިސްވެރިންނާ މިއަދު ވަނީ ބައްދަލުކުރައްވާފަ އެވެ. މި ބައްދަލުކުރެއްވުމުގެ އިތުރު މައުލޫމާތެއް ސަރުކާރުން އަދި މިހާތަނަށް ހާމަކޮށްފައި ނުވެ އެވެ.
ޗައިނާގެ ފޫޖިއާން ޕްރޮވިންސްގެ ޝިއަމެން ފްރީޓްރޭޑް ޒޯނަށް ވެސް މިއަދު އެމަނިކުފާނު ޒިޔާރަތްކުރެއްވި އެވެ. އެ ޒޯނުގެ ތައާރަފު ވީޑިއޯއެއް ބައްލަވާލެއްވުމަށް ފަހު އެމަނިކުފާނު ވަނީ އެ ތަނުގެ މުހިންމު ތަންތަން ބައްލަވާލައްވައި އެތަންތަނާ ބެހޭ މައުލޫމާތު އޮޅުންފިލުއްވާފަ އެވެ.
ސިނަމާލެ ބްރިޖަކީ ރައީސް މުއިއްޒު ހައުސިން މިނިސްޓަރު ކަމުގައި ހުންނެވިއިރު ޗައިނާގެ އެހީގެ ދަށުން ކުރިއަށްގެންދިޔަ ބޮޑު މަޝްރޫއުއެކެވެ. އެ ބްރިޖު ރަސްމީކޮށް ހުށަހެޅީ އޮގަސްޓް 30, 2018 ގައި އެވެ.
މިއީ ފަހުގެ ތާރީހެއްގައި ރާއްޖޭގައި ހިންގި އެންމެ ބޮޑު އިންފްރާސްޓްރަކްޗާ ޕްރޮޖެކްޓްތަކުގެ ތެރެއިން އެންމެ ބޮޑު އިންގިލާބީ ބަދަލެއް މާލެ ސަރަހައްދަށް ގެނުވި ޕްރޮޖެކްޓެކެވެ. ޖުމުލަ 1.3 ކިލޯމީޓަރުގެ ދިގުމިން ހުންނަ މި ބްރިޖުގެ ފުޅާމިނުގައި 20 މީޓަރު ހުރެ އެވެ.
