ރާއްޖޭގެ ރައީސުލްޖުމްހޫރިއްޔާގެ މަގާމަށް ވަޑައިގެންނެވި ބޭފުޅަކު ރާއްޖޭން ބޭރަށް ކުރައްވާ ފުރަތަމަ ފުރަމާނަ ދަތުރުފުޅެއްގައި ފުރަތަމަ ފަހަރަށް ޗައިނާއަށް ވަޑައިގެން ރައީސް ޑރ. މުހައްމަދު މުއިއްޒު ތާރީހުން ޖާގަ ހޯއްދަވައިފި އެވެ.
ރައީސްގެ މި ދަތުރުފުޅަކީ ޗައިނާގެ ރައީސް ޝީ ޖިންޕިންގެ ދައުވަތަކަށް ކުރައްވާ ދަތުރެކެވެ. އެމަނިކުފާނާ އެކު ފަސްޓް ލޭޑީ ސާޖިދާ މުހައްމަދާއި, ކެބިނެޓް މިނިސްޓަރުންނާއި ސަރުކާރުގެ އިސް އޮފިޝަލުން ބައިވެރިވެވަޑައިގަންނަވަ އެވެ.
ރައީސް މުއިއްޒު ޗައިނާއަށް ފުރާވަޑައިގަތުމުގެ ކުރިން އެތަނުގައި ތިއްބެވި މަޖިލިސް މެމްބަރުންނާއި ސަރުކާރުގެ އޮފިޝަލުންނާ ސަލާމްކުރައްވަނީ: މިފަހުން ސަރުކާރާ ގުޅުނު ރައްޔިތުންގެ މަޖިލީހުގެ މެމްބަރުން އެތަނުގައި ތިއްބެވި -- ފޮޓޯ:އަބްދުﷲ އިޔާން/އަދަދު
މި ދަތުރުގެ ތެރެއިން ޗައިނާ ސަރުކާރާއި ރާއްޖޭގެ ސަރުކާރާ ދެމެދު މުހިންމު އެއްބަސްވުންތަކެއްގައި ސޮއިކުރާނެ ކަމަށް ބެލެވެ އެވެ. އެގޮތުން, އިގުތިސާދީ, ސަލާމަތާއި ރައްކާތެރިކަމާއި, އިޖުތިމާއީ އަދި އިންސާނީ ވަސީލަތް ތަރައްގީ ކުރުން ފަދަ ދާއިރާތަކުން ޗައިނާއާ އެކު އެއްބަސްވުންތަކުގައި ސޮއިކުރާނެ ކަމަށް ބެލެވެ އެވެ.
ފެހި ގާނޫނޫ އަސާސީގެ ފަހުން ރާއްޖޭގެ ވެރިކަން ކުރެއްވި ބޭފުޅުންގެ ތެރެއިން އެއްވެސް ބޭފުޅަކު ފުރަތަމަ ފުރަމާނަ ދަތުރުގައި ޗައިނާއަށް ވަޑައިގަނެފައި ނުވެ އެވެ. އެގޮތުން ކުރީގެ ރައީސުން ކަމަށްވާ މުހައްމަދު ނަޝީދު, މުހައްމަދު ވަހީދު, އަބްދުالله ޔާމީން އަދި އިބްރާހިމް މުހައްމަދު ސޯލިހު ވެސް ވެރިކަމުގެ އެންމެ ފުރަތަމަ ފުރަމާނަ ދަތުރު ކުރެއްވީ އިންޑިއާއަށެވެ.
ރައީސް މުއިއްޒު ޗައިނާއަށް ފުރާވަޑައިގެންފައި މިވަނީ ފަހުގެ ތާރީހެއްގައި ރާއްޖެ އަދި އަވަށްޓެރި އިންޑިއާގެ ގުޅުން އެންމެ ގޯސްވެ ނުތަނަވަސްކަމެއްގެ ތެރޭގައި އޮތް ދަނޑިވަޅެއްގަ އެވެ. އިންޑިއާއަކީ ސަރަހައްދީ ގޮތުންނާއި ބައިނަލްއަގްވާމީ މައިދާނުގައި ވެސް ޗައިނާގެ އެންމެ ބޮޑު ވާދަވެރިޔާ އެވެ.
މި ސަރުކާރުގެ ޔޫތު މިނިސްޓްރީގެ ތިން ޑެޕިއުޓީ މިނިސްޓަރަކު ވަނީ އިންޑިއާގެ ބޮޑުވަޒީރު ނަރެންދުރަ މޯދީއަށް މަލާމާތްކޮށް ފުރައްސާކޮށް ޓްވީޓު ކުރުމާ ގުޅިގެން ސަސްޕެންޑް ކޮށްފަ އެވެ. އިންޑިއާގެ ގިނަ އަދަދެއްގެ މީހުންނާއި ރާއްޖޭގެ ސަރުކާރު ތަމްސީލުކުރާ މީހުންނާ ދެމެދު ހޫނު ބަހުގެ ހަމަލާތަކެއް ބަދަލުކުރަމުންދާތާ ދެތިން ދުވަހެއް މިވަނީ ވެފަ އެވެ.
ރައީސް މުއިއްޒު ވެރިކަމަށް ވަޑައިގަތުމަށް ކުރެއްވި ކެމްޕޭން އެއްކޮށްހެން ބިނާވެފައި އޮތީ ރާއްޖޭގައި ތިބި އިންޑިއާ ސިފައިން ފޮނުވާލުމާ ގުޅޭގޮތުންނެވެ. އޭރުގެ އިދިކޮޅުން ކުރިއަށް ގެންދިޔަ "އިންޑިއާ އައުޓް" ކެމްޕޭނާ ގުޅިގެން ރައީސަކީ ޗައިނާއަށް ތާއީދުކުރައްވާ ބޭފުޅެއް ކަމަށް އިންޑިއާ މީޑިއާތަކުން ސިފަކުރި އެވެ. އެމަނިކުފާނު އެ ތުހުމަތުތައް ދޮގުކުރައްވަ އެވެ. ވިދާޅުވީ އެމަނިކުފާނަކީ "ޕްރޯ މޯލްޑިވްސް" ބޭފުޅެއް ކަމަށެވެ.
އެމަނިކުފާނު ހައުސިން މިނިސްޓަރަކަށް ހުންނެވިއިރު ރާއްޖޭގައި ހިންގި އެންމެ ބޮޑު ޕްރޮޖެކްޓުތައް ހިންގާފައި ވަނީ ޗައިނާގެ ސަރުކާރާ ގުޅިގެން ޗައިނާގެ ކުންފުނިތަކުންނެވެ. އެގޮތުން, ސިނަމާލެ ބްރިޖާއި ހުޅުމާލޭގައި އިމާރާތްކޮށްފައިވާ ފްލެޓުތަކުގެ މަސައްކަތް ފާހަގަކުރެވެ އެވެ.
އެހެން ނަމަވެސް, ރައީސް މުއިއްޒު ވިދާޅުވަނީ ދުނިޔޭގެ އެންމެ އާބާދީ ބޮޑު ދެ ގައުމު އަދި އިގުތިސާދީ ދެ ބާރުގެ ކޯޅުމުގެ ތެރެއަށް ރާއްޖެ ނުވަންނާނެ ކަމަށެވެ. އަދި ރާއްޖޭން އަބަދުވެސް ހިފަހައްޓާނީ ރާއްޖޭގެ އެންމެ މަތީ މަސްލަހަތު ކަމަށް އެމަނިކުފާނު އަންނަނީ ވިދާޅުވަމުންނެވެ.
