ރައީސުލްޖުމްހޫރިއްޔާގެ އޮފީހާއި ފޮރިން މިނިސްޓްރީގެ ރަސްމީ ވެބްސައިޓުތައް ޑައުންވެ އާންމުންނަށް ނުވަދެވޭ ގޮތް ވެއްޖެ އެވެ.
ތަކުރާރުކޮށް މި ދެ ވެބްސައިޓަށް ވަންނަން އުޅުމުން ވެސް އެކަން މިހާތަނަށް ކާމިޔާބުވެފައި ނުވެ އެވެ. އަދި, ބައެއް އެހެން ފަރާތްތަކުން ވެސް ވަނީ ވެބްސައިޓުތަކަށް ނުވަދެވޭކަން ހާމަކޮށްފަ އެވެ.
ވެބްސައިޓަށް ވަންނަން މަސައްކަތްކުރުމުން މިހާތަނަށް ވަދެވޭ ގޮތް ނުވޭ
މިއީ ކޮން ކަމަކާ ގުޅިގެން ވެފައިވާ ކަމެއްކަން މިހާތަނަށް ސާފެ ނުވެ އެވެ. މިއީ ސައިބާ ހަމަލާއެއްގެ ސަބަބުން ހިނގި ކަމެއް ކަމަށް ބައެއް ފަރާތްތަކުން ސޯޝަލް މީޑިއާގައި ބުނަމުންދާއިރު އެކަމާ ގުޅޭ ގޮތުން ސަރުކާރުން ހާމަކޮށްފައިވާ ގޮތުގައި އެންސީއައިޓީ އަދި އެހެން އިދާރާތަކުން މިހާރު ދަނީ އެކަން ބަލަމުންނެވެ.
ރައީސް އޮފީހުގެ ވެބްސައިޓަކީ ރައީސުލްޖުމްހޫރިއްޔާ އާއި އެމަނިކުފާނުގެ ނައިބުގެ އެންމެހާ ހަބަރުތަކާއި ސަރުކާރާ ގުޅޭ މުހިންމު ނިންމުންތައް އިނގިރޭސިންނާއި ދިވެހިން ޝާއިއުކުރަމުންދާ ވެބްސައިޓެވެ.
ފޮރިން މިނިސްޓްރީގެ ވެބްސައިޓަކީ ރާއްޖޭން ބޭރުގައި ދިރިއުޅޭ ރައްޔިތުންނަށް މުހިންމު މައުލޫމާތުތެއް ހިމެނޭ ވެބްސައިޓެކެވެ.
ބައެއް ފަރާތްތަކުން ޓޫރިޒަމް މިނިސްޓްރީގެ ވެބްސައިޓަށް ނުވަދެވޭ ކަމަށް ބުނި ނަމަވެސް އެ ވެބްސައިޓަށް އަދި ވަދެވެ އެވެ.
