މާލެއަށް މިދިޔަ ހޮނިހިރު ދުވަހުގެ ރެއިން ފެށިގެން މުޅި އާދީއްތަ ދުވަހު ކުރި ވިއްސާރައަށް ފަހު މި ހަފުތާގެ އެންމެ ދުވަހަކަށް ވެސް ކްރިމިނަލް ކޯޓުގައި މައްސަލައެއްގެ އަޑުއެހުން ތާވަލުނުކޮށް ހަމައެކަނި މުއްދަތު މަޖިލިސްތަކެއް ތާވަލުކޮށްފި އެވެ.
އާދީއްތަ ދުވަހުގެ ހެނދުނުން ފެށިގެން ކޯޓުގެ ހުރިހާ ދިމާއެއްގެ ސީލީނުން ފެން ވަދެފައިވެ އެވެ. ފެނުގެ އަސަރުކޮށްގެން ކޯޓުގެ ސާވާ ވެސް އެއްކޮށް ހަލާކުވެފައިވެ އެވެ. އެ ދުވަހު އިންޓަނެޓުގެ ހިދުމަތް ވެސް ނުލިބި، އަޑުއެހުންތައް ކެންސަލް ކުރަން ޖެހުނެވެ. އަދި އިދާރީ އެއްވެސް ހިދުމަތެއް ނުދެވުނެވެ.
އޭގެ ފަހުން ކޮންމެ ދުވަހަކު ވެސް ކޯޓުގެ ޝެޑިއުލްގައި އޮންނަނީ ހައްޔަރުކުރާ މީހުންގެ ބަންދު މުއްދަތާ މެދު ގޮތެއް ނިންމުމުގެ އަޑުއެހުންތައް އެކަންޏެވެ. ކޯޓުގައި ހިނގާ އެއްވެސް ޝަރީއަތެއްގެ އަޑުއެހުމެއް މި ހަފުތާގެ އެންމެ ދުވަހަކު ވެސް ތާވަލެއް ނުކުރެ އެވެ.
ކްރިމިނަލް ކޯޓުގެ މީޑިއާ އޮފިޝަލަކާ އެ ސުވާލު ކުރުމުން އޭނާ ވިދާޅުވީ ކޯޓުގެ ހަތަރު ބުރީ އިމާރާތުގައި ހުރި ސާމާނުތަކަށް ވެސް އެކި ވަރުގެ ގެއްލުން ލިބުމުން އެ ސާމާނުތައް މި ވަގުތަށް ބެހެއްޓީ އަޑުއެހުންތައް ބޭއްވުމަށް ކޯޓުގައި މި ވަގުތު ބޭނުން ކުރާ ކޮޓަރިތަކުގައި ކަމަށެވެ.
"މުއްދަތު މަޖިލިސްތައް ބޭއްވުމަށް އެއް ކޮޓަރި ހުރެފައި ދެން ހުރި ކޮޓަރިތަކުގައި މި ތަކެތި ބަހައްޓާފައިވީ، އެކަމަށް ކޯޓު ރޫމުތައް އޮކިއުޕައި ވެފައި އޮތީމަ އަޑުއެހުމެއް ތާވަލު ނުކުރެވި މި އުޅެނީ، އަޑުއެހުންތައް ބާއްވަން ފެށޭނެ ދުވަހެއް ބުނަން އަދި ދަތި،" އޭނާ ވިދާޅުވި އެވެ.
އޭނާ ވިދާޅުވި ގޮތުގައި ސާވާގެ މައްސަލަ މިހާރު ވަނީ ހައްލުކޮށްފަ އެވެ.
މީގެ ކުރިން ވެސް ވިއްސާރަ މޫސުމުގައި ކޯޓުގެ އިމާރާތުގެ ތެރެއަށް ފެން ވަދެ ހިދުމަތަށް ބުރޫ އަރާފައިވެ އެވެ. ކޯޓުގެ ސާވާއަށް ނޫނީ ސާވާ ރޫމަށް ފެން ވަދެގެން މީގެ ކުރިން ވެސް އެ ދުވަހަކަށް ތަވާލުކުރި އަޑުއެހުންތައް ކެންސަލް ކުރަން ޖެހިފައި އެބަ ހުއްޓެވެ.
ކްރިމިނަލް ކޯޓު މިހާރު ހިންގަމުން ދާ އިމާރާތުގައި ހިމެނޭ ހަތަރުބުރީގެ ބާ އިމާރާތް ބޭނުންކުރުން، މި އަހަރު ފެބްރުއަރީ މަހު ހުއްޓާލި އެވެ. އެ އިމާރާތް ބާވެ ބޭނުން ނުކުރެވޭ ވަރު ވެފައިވާ އިރު، މިހާރު ބޭނުންކުރާ އިމާރާތް ވެސް ހުރީ ވަރަށް ހާލު ދެރަކޮށެވެ.
އޭގެ ފަހުން މިދިޔަ 10 މަސް ދުވަހު ކޯޓު ހިންގީ ޖާގައިގެ ދަތިކަން ބޮޑުވެގެންނެވެ. އެހެންވެ ކޯޓުގައި މައްސަލަތައް ނުނިމި ދިގުލައިގެން ގޮސް، މައްސަލަތައް ހުރީ ފުނިޖެހިފަ އެވެ. އެ ސަބަބާ ހުރެ ކޯޓު ރިސެސްއަކަށް ވެސް ނުދެ އެވެ. އާންމުކޮށް އަހަރު ފަހުކޮޅު ކޯޓުތައް ރިސެސްއަށް ދެ އެވެ.
ކްރިމިނަލް ކޯޓުގެ އިމާރާތުގެ ބޮޑު ބައެއް ބޭނުން ކުރުން ހުއްޓާލާފައި ވެސް ވާއިރު، އިމާރާތުގެ ހާލަތު ވަޒަން ކުރުމަށްފަހު 2017 ވަނަ އަހަރު ގެޑޯ ޕްރައިވެޓު ލިމިޓެޑުން ތައްޔާރުކުރި ރިޕޯޓެއްގައި ވެސް އެ އިމާރާތް ބޭނުން ކުރުން ރައްކާތެރި ނޫން ކަމަށް ލިޔެފައިވެ އެވެ.
