ދިވެހިރާއްޖޭގައި ތިބި އިންޑިއާ ސިފައިން ފޮނުވާލުން ފަސޭހަ ނޫން ކަމަށާއި އެކަމުގައި ގޮންޖެހުންތަކެއް އެބަހުރި ކަމަށް ސަރުކާރުން މިއަދު ބުނެފި އެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ޕަބްލިކް ޕޮލިސީ ސެކްރެޓަރީ އަބްދުﷲ ނާޒިމް ވިދާޅުވީ، އިންޑިއާ ސިފައިން ފޮނުވާލުން ފަސޭހަނުވާނެކަން ސަރުކާރަށް އަބަދުވެސް އެނގޭ ކަމަށެވެ.
"އެ ވައުދު ފުއްދުމުގައި ދިވެހި ސަރުކާރު އޮތީ ސާބިތުކަމާއެކު. އަބަދުވެސް އަޅުގަނޑުމެން ދެކެމުން އައީ މިއީ ފަސޭހެ ކަމެއް ނޫންކަމުގައި. އަދި ގޮންޖެހުންތަކެއް ހުރި ކަމެއް ކަމުގައި. ޑިޕްލޮމެޓިކް އުސޫލުތަކާއި ހަމަތަކާއި ދުނިޔޭގެ ރީތި ތަހުޒީބު ނިޔާ ކުރާ ގޮތުން މިކަން ކުރަންޖެހޭނެ ކަމަށް. ގާނޫނީ އިމުގެ ތެރެއިން މިކަން ކުރަންޖެހޭނެ ކަމަށް،" ނާޒިމް ވިދާޅުވި އެވެ.
މިހާތަނަށް އިންޑިއާގެ 88 ސިފައިން ރާއްޖޭގައި ތިބިކަން ޔަގީންވެފައިވާކަން ފާހަގަ ކުރައްވަމުން ނާޒިމް ވިދާޅުވީ، އިންޑިއާ ސިފައިން ފޮނުވާލުމުގެ މަސައްކަތުގައި ވަރަށް މުހިންމު ބައްދަލުވުންތަކެއް ކުރިއަށް ތާވަލުކޮށްފައިވާ ކަމަށާއި މިހާރު ވެސް 10 ބައްދަލުވުމެއް ބާއްވާފައިވާ ކަމަށެވެ.
"މިކަމާ ގުޅިގެން ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގެންނެވި އެންމެ ފުރަތަމަ ދުވަހުން ފެށިގެން ވެސް ތަފާތު މަރުހަލާތަކުގައި ތަފާތު މަރުހަލާތަކުގައި ތަފާތު މަޝްވަރާތައް ފެށި ސަރުކާރުގެ އެކި ލެވެލްތަކުގައި 10 ބައްދަލުވުމެއް މިހާރު ވަނީ ބޭއްވިފަ. ކުރިއަށް މުހިންމު ބައްދަލުވުންތަކެއް ވަނީ ތާވަލު ކުރެވި، ރޭވިފައި. މިކަމުގައި މުހިންމު ކުރިއެރުންތަކެއް ލިބެމުންދާ ކަމަށް ކެބިނެޓުގައި ވަނީ ފާހަގަ ކުރައްވާފައި،" އޭނާ ވިދާޅުވި އެވެ.
ނާޒިމް ވިދާޅުވީ އިންޑިއާ ސިފައިން ރާއްޖޭގައި ތިބުމަކީ ދިވެހިން ވަރަށް ކަންބޮޑުވާ މައްސަލައެއް ކަމަށާއި އިންޑިއާ ސިފައިން ފޮނުވާލުމުގެ މަސައްކަތް ބޮޑު އަހައްމިއްޔަތެއް ދީގެން ސަރުކާރުން ކުރަމުންދާ ކަމަށެވެ.
"ދިވެހިރާއްޖޭގައި ތިބި އިންޑިއާ ސިފައިންގެ މައްސަލައަކީ ދިވެހިން ވަރަށް ކަންބޮޑުވާ މައްސަލައެއް. ޑރ. މުހައްމަދު މުއިއްޒުގެ ސިޔާސަތުގެ ތެރޭގައި ހިމެނޭ ވަރަށް ވެސް މުހިންމު އެއް ސިޔާސަތު،" އޭނާ ވިދާޅުވި އެވެ.
އޭނާ ވިދާޅުވީ އިންޑިއާ ސިފައިން ފޮނުވާލާނެކަމުގެ ޔަގީންކަން ރައްޔިތުންނަށް ދޭ ކަމަށާއި ސަރުކާރުގެ އެދުމަކީ "ދިވެހި ރައްޔިތުން އެކަމާ މާޔޫސްނުވުން" ކަމަށެވެ.
