މޯލްޑިވްސް އިންޑަސްޓްރިއަލް ޑިވެލޮޕްމަންޓް ފްރީޒޯންގެ ނަމުގައި ސަރުކާރުގެ ސައްތައިން ސައްތަ ހިއްސާ އޮންނަ ކުންފުންޏެއް އުފެއްދެވުމަށް ރައީސް ޑރ. މުހައްމަދު މުއިއްޒު ނިންމަވައިފި އެވެ.
އެމަނިކުފާނު މި ނިންމެވުން ނިންމެވިކަން އިކޮނޮމިކް މިނިސްޓާ މުހައްމަދު ސައީދު ވަނީ މިރޭގެ ވަގުތެއްގައި ހާމަކުރައްވާފަ އެވެ.
"ރާއްޖޭގެ އިގުތިސާދީ ރައްކާތެރިކަން ކަށަވަރުކުރުމާއި، ވެލިއު އެޑްކުރުމާއި، ޓްރާންޝިޕްމަންޓް/ރިީއެކްސްޕޯޓް ވިޔަފާރިއަށް ހާއްސަކޮށް 100 އިންސައްތަ ދިވެހި ކުންފުންޏެއް، މޯލްޑިވްސް އިންޑަސްޓްރިއަލް ޑިވެލޮޕްމަންޓް ފްރީޒޯންގެ ނަމުގައި އުފެއްދެވުމަށް ނިންމެވި ނިންމެވުމަށް ރައީސަ މަރުހަބާ ދަންނަވަން," ސައީދު ކުރެއްވި ޓްވީޓެއްގައި ވިދާޅުވެފައިވެ އެވެ.
މި ކުންފުންޏަކީ ރާއްޖޭގެ ގައުމީ އުފެއްދުންތެރިކަން އިތުރުކުރުމަށް މަގުފަހި ކުރުމުގެ ގޮތުން ސަރުކާރުން އުފައްދަން ނިންމާފައިވާ ކުންފުންޏެއް ކަމަށް ބެލެވެ އެވެ.
މި ކުންފުންޏާ ގުޅޭ އިތުރު އެއްވެސް މައުލޫމާތެއް ސަރުކާރުން ހިއްސާކޮށްފައި ނުވެ އެވެ. ބެލެވޭ ގޮތުގައި މި ކުންފުނިން ޓްރާންޝިޕްމެންޓާއި ރީއެކްސްޕޯޓް ކުރުމުގެ ވިޔަފާރި ކުރާނެ އެވެ.
ވޯލްޑްޑް ބޭންކުން ލަފާކުރާގޮތުގައި މި އަހަރު ރާއްޖޭގެ އިގުތިސާދީ ދުވެލި ކުރިއަރާ މިންވަރު ހުންނާނީ 6.5 ޕަސެންޓުގަ އެވެ. އަދި އަންނަ އަހަރު އެ އަދަދު 5.2 ޕަސެންޓަށް ދަށްވާނެ ކަމަށާއި 2025 ވަނަ އަހަރު 5.5 ޕަސެންޓަށް އަރާނެ ކަމަށް ލަފާކޮށްފައިވެ އެެވެ.
