މިދިޔަ ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން ހުޅުމާލެއިން ގޯތި ދޫކުރި ސަރަހައްދުގެ ތެރެއިން ނުހިއްކާ އޮތް ބައި ހިއްކަން ފަށައިފި އެވެ.
އާބަންކޯގެ މެނޭޖިން ޑިރެކްޓަރު، ފަޒުލް ރަޝީދު މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ އެ ސަރަހައްދުގެ ބިން ހިއްކުމުގެ މަސައްކަތް ފަށާފައިވާ ކަމަށާއި ހުޅުމާލެއިން ގޯތި ލިބުނު ފަރާތްތަކަށް ވެލިފުކެއްގެ މިންވަރު ވެސް އުނި ނުކޮށް އެ ބިންތައް ލިބޭނެ ކަމަށެވެ.
"ހުޅުމާލެއިން ގޯތި ލިބުނު ފަރާތްތަކަށް ރައީސް ޑރ. މުއިއްޒު ވިދާޅުވި ފަދައިން ގޯތި ލިބިގެންދާނެ، ވެލިފުކެއްގެ މިންވަރު ވެސް އުނި ނުކޮށް، އިތުރަށް ފުރިހަމަ ކޮށްދެވޭނެ،" އެ ޕޯސްޓުގައި ފަޒުލް ލިޔުއްވާފައިވެ އެވެ.
މިހާރު ހިއްކަމުން ދަނީ ހުޅުމާލެ ފޭސް ތިނެއްގެ ސްޓޭޖު ދޭއްގެ ސައިޓު ބީ އެވެ. ކުރީ ސަރުކާރުން ވަނީ ސައިޓު އޭ ހިއްކައި ނިންމައިފަ އެވެ.
ހުޅުމާލެ ފޭސް ތިނަކުން ގޯތި ދިނުމަށް ބޭނުންވާ ބިން ހިއްކުމަށް ނިންމީ ކުރީ ސަރުކާރުންނެވެ. ހުޅުމާލެ ފަޅުން 62.6 ހެކްޓަރުގެ ބިން ހިއްކުމަށް ހަވާލު ކުރީ ފުށިދިއްގަރު ފަޅު ހިއްކުމުގެ މަސައްކަތް ވެސް ކުރަމުންދާ ލަންކާގެ ކެޕިޓަލް މެރިން އެންޑު ސިވިލް ކޮންސްޓުރަކްޝަން ކޮމްޕެނީ (ސީއެމްސީސީ) އާ އެވެ. ނަމަވެސް އެ މަސައްކަތް ކުރިއަށް ގެންދަނީ ސަބް ކޮންޓުރެކްޓަރެއްގެ ގޮތުގައި ނެދަލޭންޑްސްގެ ބޮސްކާލިސް ކުންފުނިންނެވެ.
ދިޔަނެރު ފަޅާއި ތިލަފުށިން ބައެއް ހިއްކުމުގެ މަސައްކަތާ އެކު އެކުންފުންޏާ އޭރުގެ ސަރުކާރުން ހުޅުމާލޭގެ ބިން ހިއްކުމުގެ މަޝްރޫއު ހަވާލު ކުރީ 259 މިލިއަން ޑޮލަރު (3.98 ރުފިޔާ) އަށެވެ.
ހުޅުމާލޭގެ ތިންވަނަ ފިޔަވަހި ތަރައްގީ ކުރަނީ ދެވަނަ ފިޔަވައްސެކޭ އެއްގޮތަށް ޗެނަލްތަކަކުން ވަކިކޮށްފައި އޮންނަ ވަކި ރަށެއްގެ ގޮތުގަ އެވެ. ތިންވަނަ ފިޔަވައްސާއި ދެވަނަ ފިޔަވައްސާ ގުޅުވައިލާނީ ހަތަރު ބުރިޖު މެދުވެރިކޮށެވެ.
ހުޅުމާލޭގެ ތިންވަނަ ފިޔަވަހީގެ ބިން ހިއްކުމުގެ އިތުރުން އެތަނުގެ ރިވެޓުމަންޓު ޖެހުމާއި ޝޯ ޕްރޮޓެކްޓު ކުރުމުގެ އިތުރުން މަގުތައް ހެދުމާއި ފާލަން އެޅުމުގެ އިތުރުން ޖެޓީ ހެދުން ވެސް ކުރާނީ ސީއެމްސީސީންނެވެ.
